مفيش خدامة فليبينية إذن "الطلاق هو الحل"

أنا متجوزة من 5 شهور ونص وبجد زهقت ماكونتش عارفه أن الجواز ممل كده، انا شقتي احسن شقه هي دورين وفرحي كان معمول في فور سيزون وأي حد يتمنى اللي أنا فيه بس حقيقي مش مبسوطة، جوزي مش مثال للزوج اللي بتمناه من وقت مااتجوزنا مجبليش غير 4 هدايا بس صحيح كلهم دهب بس مش بحس بالحب والاهتمام وهو بيدهاني، بينزل الشغل بيرجع متأخر اويييييي 4 الفجر وانا لوحدي، وعدني نسافر كل شهر أي حته ماسفرنيش غير مره وحده تركيا انا الفارق معايا أنه بيخلف كلامه مفروض كان يسفرني، وآخر حاجه اللي محسساني ببخله انا كان عندي خدامة فليبينية ومشيت بدل ما يجيبلي زيها جابلي مصرية..
عايزه اطلق بس خايفه بابا ميرضاش ويقول عليا تافهة ؟؟ ساعدوني برأيكم
الرد:
الدمعه هتفر من عينى، انتى شايله ده كله لوحدك يا حبيبتى ومستحمله وساكتة ! ربنا يصبرك يا بنتي بجد وجعتى قلبى وباباكى الشرير ده ازاى يقولك تافهة ؟!!!!! هو انا مش عايز افاجئك بس انتي فعلا تافهة، عارفه انتى لو بنتى كنت نسرت شبشب الحمام على خلقتك.