سى السيد وأمينة والمونديال

السيد أحمد عبد الجواد:كل مابشوف المنتخبات التانية مشاركة في المونديال ماعدا احنا ازعل اوى واشوف البلاد اللى بتنظمه اموت في جلدى، بس هعمل اية كل اللى في ايدى انى ادعى لمنتخب الجزائر يمكن يقدر يعمل حاجة ماهو خلاص احنا المنتخب بتاعنا بقى بضاعة اتلفها الهوى، واللى يغيظك اكتر انك لازم تنزل تقعد على قهوة مشتركة في القنوات المشفرة اللى بتنقل الماتشات علشان تشوفه
أمينة: اجيب لك العشا ياسى السيد ماتزعلش نفسك كدة بكرة تروق تحلى وتتغير قواعد اللعبة ومسيرها احنا اللى ننظم المونديال، بس ياريت ياسى السيد تسمح لى انا كمان انزل اتفرج في أي كافى شوب من نفسى، علشان انت عارف انى بحب الكورة آخر حاجة، ومستعدة اعملك كانيلونى لو وافقت تاخدنى معاك، اشترى لك شور جيل تغسل بيه رجليك بدل الملح.
سى السيد: انت اجننتى ياولية تنزلى تروحى فين، دا انت لوعملتى كدة هقطع لك رجلك، بس أوعدك لو الجزاير عملت شغل كويس هخدك تتفرجى على النهائى، علشان ماتقوليش انى حرمتك من حاجة
فهمى: لازم نقاوم ونطالب أن المونديال يتنظم على ارضنا قطر مش أحسن مننا في شئ، الشئ الوحيد انها بتقدر ترشى الناس كويس، لازم نشكل جمعية سرية لتفجير كل مكان يتنظم فيه المونديال، وانا عن نفسى اقسم أن اكون أمينا لمبادئ الجمعية مستعدا لكل وقت أن افديها بحياتى، لازم يجى اليوم اللى نتغير فيه ونفتخر ونتفشخر قدام الكل اننا بنشارك في المونديال ولا حتى بنظمه، ماينفعش ندفن راسنا في الطين أكتر من كدة.
كمال: طول ما بلدنا مابتشاركش في المونديال ولا بتنظمه هفضل انام في حضن امى، حتى لو بقيت عريس، بصراحة كل يوم بعيش كابوس أن كل المتخبات بتضحك علينا وعلى خيبتنا، لاعارفين نشارك ولاى عارفين ننظم، طب بالذمة دا مش اسمه ظلم !
عيشة: انا عمرى ما اتجوز غير لاعب عليه القيمة انا مش اقل من سارة كاربونيرو وانتونيلا وغيرهم وغيرهم، انا يالاعب عالمى يامش متجوزة ابدا، وكمان لازم ياخودنى معاها في كل حتة واتفرج على كل الماتشات وألون شعرى والبس شورت واتفرج سيلفى مع كل أعضاء المنتخب
خديجة: يبقى مش هتتجوزى ابدا..انا صحيح وحشة بس السيد أحمد عبد الجواد مش ممكن يجوز الصغيرة قبل الكبيرة ابدا، بكرة ربنا يرزقنى حتى وولو بحارس مرمى في دوري المظاليم انسى ياحبيبتى ولو فاكرة نفسك هتتجوزى ميسى ولا حاجة تبقى غلطانة، انت اخرك واحد على دكة الاحتياطي!
السيد أحمد عبد الجواد: انتوا بستغفلينى ياأمينة بناتك بيتخانقوا على لاعيبة الكورة وبيتفرجوا على الماتشات من وراكى، وولادك واحد بيعملها على نفسه من الكوابيس والتانى طول اليوم قاعد بيتفرج على الماتشات، وانت كمان ياأمينة رغم انى حزرتك انك ماتقعديش على أي كافية خالفتى اوامرى وشوفتك امبارح وانت قاعدة في كوستا بتتفرجى على الماتش!، انتوا خلاص عياركم فلت ومفيش امل منكم!..انا خلاص مسافر قطر!
أمينة: في داهية ياسى السيد هنستريح منك، على الأقل أخرج اشرب لى كوباية كابتشينو واركب عجل، واتفرج على الدنيا بقى..داهية وغارت!