كيف تخدعين خطيبك؟.. اتيكيت العزومات عند البنات

عزيزتى الفتاة، تعلمين جيدا أن أسلوب تعاملك مع كل شيء حولك هو مايلفت انتباه الاخر لك، فاحرصى دائما على الظهور في ابهى صورتك، فلا تتعاملى مع أي شئ بخشونة زائدة وأيضا لا تفرطى في النعومة، حاولى أن تتعاملى بالقدر اللبق المعقول، وخاصة لو انت في فترة الخطوبة، والتي يضعك فيها خطيبك تحت الميكروسكوب يرصد فيها اسلوبك وتصرفاتك، لكن كونى انت أكثر منه دهاء، كونى مثلما يريد أن يراكى، اما بعد الزواج سيكون قد وقع في الفخ..واعملى اللى على مزاجك!
*الاكل بالشوكة والسكينة: تاكلى بهدوء الشوكة في الشمال والسكينة في اليمين وتمسكيهم من الطرف وماتخبطيش في الطبق وانت بتاكلى وتقلبيها مهرجان شعبى.
*ماتدبيش أكل ورا بعضه الدنيا مش هطير وامضغى بهدوء وبين المعلقة والتانية ادى نفسك فرصة تتنفسى
* اما تيجى تاكلى الرز ماتمليش المعلقة كأنها ونش رافع أثقال، لازم يكونوا كام حباية في طرف المعلقة
* تقطعى اللحوم لقطع صغيرة ماتلمسش شفايفك وانت بتاكليها، اشربى الشوربة بالراحة من غير صوت، واوعى تشيلى الطبق على بقك وتقولى اصل بحب أشربها كدة.
* لو حبيتى تشربى مية، اوعى تشربى من الازازة، صبى في كوباية واشربى بهدوء على اكتر من مرة واوعى تخلصى الكوباية انت مش جاية من الصحرا.
* لما تخلصى أكل امسحى بالفوطة بالراحة يادوب تلمس شفايفك، مش تقعدى تحكى كأنك واكله في مسمط!
* اطلب عصير من نوع هادى يعنى لمون..برتقان.. مش تقوليه عاوزة فخفخينة ولا مشروب دوم، ولا سوبيا، واشربى بهدوء واوعى تخلصى الكوباية علشان ميقولش عليكى مفجوعة.
* اما تحبى تروحى الحمام، مش لازم تقوليله أنا عاوزة اروح الحمام.. قوليله هروح اظبط مكياجى
* وانت ماشية ماتقومش مستعجلة وتخبطى في الكرسى، قومى بالراحة شنطتك في ايدك امشى ماشية هادية رقيقة كأنك عارضة أزياء، ماتجريش وانت ماشية كأنك راحة تلحقى مكان في طابور الجمعية
* اما تروحى البيت ارجعى لطبيعتك تانى واهجمى على حلة المحشى المعتادة واشربى سوبيا وعيشى حياتك
ملحوظة: بعد الجواز انسى كل دا وعيشى حياتك زى ما انت عاوزة وكلى واشربى براحتك، ولو قالك انت اتغيرتى..قوليله لا.. أنا بس كنت بغشك لحد ماتقع في الفخ!