الكراكيب اللي جواك

ومين فينا معندوش في حياته صندوق في ورق أو كتب أو كشاكيل وبيقول على الحاجات دى أصلها ( كراكيب )، طب جرب كده وافتح درج مكتبك هاتلاقى في حاجات مش بتستخدمها ولا عارف امتى وفين وازاى اتحطط في الدرج اهى الحاجات دى برضو بتقول عليها ( كراكيب )، طب كلمنى كده عن دولابك اللى جواه هدوم انت مش بتلبسها ومش عارف محتفظ بيها ليه ؟! دول برضو ( كراكيب )، حتى النيش اللى موجودة في شقتك ومش بيتحرك من مكانه من يوم مااتحطط ولا بستخدم اللى فيه برضو ( كراكيب ) ( وتحس كده أنه مالهوش لأزمة )، والحاجات اللى فوق دولابك اللى انت مش فاكرة برضو ( كراكيب )، حتى المطبخ لو فتشت فيه هاتلاقى في حاجات ( مش عارفه ) محتفظة بيها ليه برضو ( كراكيب )، طب جرب كده تقلب في تليفونك هاتلاقيك محتفظ بأرقام ناس انت مش فاكرها وبتسأل نفسك مين فلان؟ مين علان ؟ برضو ( كراكيب )، دا حتى شنطتك ومحفتظتك برضو فيها حاجات صغيره كده شايلها ومش عارف ليه اسمها ( كراكيب )، ولو قلبت جواك هاتلاقيك محتفظ بوجعك وأحزانك وجرح وقافل عليهم وغاوى تفكر نفسك باللى فات وتنكد عليها برضو ( كراكيب )، طب اقولك على حاجة انت كل على بعضك كده مجموعة من الكراكيب، طب اسأل نفسك كده هو انت محتفظ بكل انواع الكراكيب في حياتك ليه ؟ هاتقولى ( مش عارف ) الحقيقة ( ولا أنا ) بس أقولك على حاجة جرب كده تشيل كل الكراكيب اللى في اوضتك...في مكتبك...في عربيتك...في شقتك...والأهم الكراكيب ا لموجوده جواك وأنت هتعيش مرتاح ( جرب ) !