عايش في مدينة البط

تخيل نفسك عايش في مدينة البط الجميلة وسط بطوط وأولاد أخيه سوسو وفوفو ولولو ومع حبيبته زيزى الجميلة اللى مستنياه من سنين كتيرة ( يابخته.. لسه حد بيحب حد ويصبر عليه وعلى ظروفه مش زى حالاتنا.. جتنا نيلة في حظنا الهباب ).. عم بطوط اللى كل مشاكله هي إزاى يربى ولاد أخيه وإزاى يتعامل معهم ( اختلاف أجيال زى مابيقولوا عندنا ) وأكبر مشكله في حياته إزاى يكمل قصة حبه مع زيزى ( مش مشكلته شقة ولاعفش ولا مهر ولامارينا ولا غيره لا مشكلته ولاد أخيه اللى عايشين عنده ).. عم بطوط اللى عمه أغنى أغنياء المدينة وأبخل واحد فيها.. عم دهب اللى بيحط القرش على القرش علشان يبقى جنيه والجنيه على الجنيه علشان يبقوا ثروة.. عم دهب الثرى الوحيد اللى نعرفه في مدينة البط ( عندنا في مصر نحو ؟؟؟ ).. واللى دايما بتطارده العصابة الشريرة ( برضوا عصابة واحدة ) بتاعة عم دنجل وأصدقائه الأشرار اللى لابسين مخطط بالعرض زى لبس فريق بلدية المحلة أو الإنتاج الحربى عندنا في مصر..
أما أهم شخصية في مدينة البط فهو ميكى ماوس.. أشهر فأر فيكى يادنيا.. فأر يعيش وسط البط ومصاحبهم لا وإيه كمان دا هو العقل المفكر اللى فيهم.. هو حلال العقد والمشاكل اللى كل أهل مدينة البط بيلجأو له علشان يحللهم مشاكلهم.. فيقوم إيه بقى ميكى يستعين بصديقه الكلب بلوتو ( فأر يصاحب كلب ويأمره كمان..!!) ولما يتزنق ميكى يروح لصاحبه المخترع عبقرينو اللى بيخترع إى حاحة لكل حاجة ( زى جهاز كشف الكذب أو جهاز كشف الإيدز وفيروس سى مثلا..).. وزى مابطوط عنده مشكلة مع أولاد أخيه وحبيبته زيزى.. ميكى حلال العقد والمشاكل عنده مشكلة مع أولاد اخيه برضو ( جيل جديد وثوار بقى وفى تعارض في وجهات النظر ) ومشكلة تانية مع حبيبته ميمى وأزاى يكملوا قصة حبهم دى بالجواز والذي منه ( متخليش خيالك يوديك لبعيد وتفتكرها صافيناز في ليلة الدخلة )..!!
ياااااااااه تخيل بقى هي دى العيشة في مدينة جميلة فاضلة.. لا فيها تلوث ولاضوضاء ولاأزمات مرور أو تعليم ولا مظاهرات ولا انتخابات ولا أزمة كهرباء ولا مياه.. مدينة كل عدد سكانها اللى نعرفهم واللى بيظهروا ويختفوا من وقت للتانى مايزدوش عن عشرين واحد.. مدينة فيها ثرى واحد وعصابة واحد بس ( دا إحنا غلابة قوى ياخال..)، مدينة فيها قصص حب ومفيهاش خيانة الحبيبة بيصبروا على بعض ( مستنين بعض من زمااااااااااااااااااااان ولسه ما اجوزوش..) ومشفناش حد فيهم بتشرط بمهر أو عفش أو شقة ولا غيره.. ( زى حالاتنا بالظبط..)، والأهم من دا كله بقى هو وجود قائد واحد وشخص واحد ملهم ومفكر وحكيم.. قائد واحد كلهم بيروحوا له وقت الأزمات والمشاكل وبيسمعوا بنصيحته وبأخدوا بكلامه.. قائد واحد مخلص وأمين معندوش سبوبة ولا مصلحة ولا بيدور على منصب ولا كرسى وكل الناس بتحبه ومش بتحاربه ولابتشكك في كلامه وذمته.. قائد بيعمل من أجل الجميع وبيدور على مصلحة مدينة البط..!!
ياااااااااااه.. نفسى أعيش وسطهم وأتعلم منهم وأبقى عايش في مدينة البط..!!