من غير ما نتكلم كتير، مين فينا محتاج للقلم، جايز يفوق ويشوف في إيه حواليه، ومين مات من الألم. مالك يا مرسي، محتاج لأيه علشان تعرّفنا الحقيقة، مين اللّي مات مظلوم برئ، ومين اللّي خان بلده في دقيقة، انطق وقول، امسك قلم واكتب على حيطان الزمن، عملت إيه في كتب التاريخ لما يذاكرها الولد، هيشوف بعينه اللّي اتهدم، أيامك انت اللّي اتعدم، خوف القلوب على بعضها، خلّيت حروبها ف أرضها، ولا كنت لينا في يوم سند. عرّفنا مين أخد القرار، لما قدرت على الفرار وبقيت عريس، وأظن ده كان اختيارك، شوف مهما كان نظام مبارك، أنت يا مرسي أسوأ رئيس. عارف يا مرسي فشلت ليه؟، علشان فيه ناس - أمثال كده أشكال حماس - بقوا همّا أولى من الولد ابن البلد، عارف يا مرسي هو مين؟، الجندى ده اللّي نهاره ليل، اللّي واقف لك ع الحدود يحرس وطن، اللّى أمه صرخت م الألم: كبدي اتقتل. مات غدر ليه؟، ومين السبب؟، علشان بيحرس في الوطن، جاوب يا مرسي عليها بس هات ميت قلم، واكتب شهيد الغدر ليه مات واندفن. جاوب يا مرسي، ليه انت غامض، ما خلاص بقيت في السجن رابط، شايف قصادك ألف ظابط بيفكروك بيوم الهروب، لمّا اتقتل فيه كل ظابط، معملش غير إنه التزم وحلف قسم، إنّه هيفديها بحياته ومماته مش هيكون ندم. مش انت كنت ف يوم رئيس؟!، حلو وعريس؟!، وكنت فرحان بالرئاسة؟!، وفاتح لي صدرك والحماسة واخداك بعيد؟!، اشرب بقى، واقفل زراير القميص، حواليك فيه ناس قلوبها والعة، ودموعها فاضت م البكا زي الهويس، علشان كده بضربة قلم، هنسيبك انت للحكم، وأنا قلت رأيي وحرّة فيه علشان أنا صاحبة قلم.