رئاسة الإنجيلية تنشر إرشادات لقاح كورونا

اجتمعت اللجنة الطبية الاستشارية لرئاسة الطائفة الإنجيلية، برئاسة د. فريدي البياضي، وعضوية كل من د. ياسر فرح، د. نادر قليني، د. عماد محارب، د. كارولين شفيق، د. أمير نخلة، بناء على توجيهات رئيس الطائفة الإنجيلية بمصر الدكتور القس أندريه زكي، وبعد متابعة اللجنة من خلال عدة مصادر تبين زيادة في الإصابات وقررت رفع هذه التوصيات بخصوص اللقاح للكنائس الإنجيلية كما هو موضح:
الاستمرار في تشجيع الناس على الحصول على اللقاح، وتطبيق بعض الإجراءات التي قد تساعد في ذلك، منها:
أولًا: قيام الكنائس بتعيين شخص أو أكثر للتواصل ومساعدة الناس في التسجيل لتلقي اللقاح.
ثانيًا: إنتاج تنويهات قصيرة تصلح لوسائل التواصل الاجتماعي لتحفيز الناس على الإقبال على اللقاح.
ثالثًا: تقوم الكنائس بتخصيص 30 - 60 ثانية في كل الخدمات والاجتماعات العامة لتحفيز الناس على التسجيل للقاح والالتزام بالإجراءات الاحترازية.
رابعًا: إذاعة التنويهات في جميع القنوات الفضائية المسيحية.
كما أصدرت اللجنة الطبية الاستشارية لرئاسة الطائفة الإنجيلية بمصر مجموعة من الاستفسارات التي قد يحتاجها شعب الكنيسة حول لقاح الكورونا وإجاباتها بحسب المعلومات والأبحاث المتاحة حتى اليوم وهي:
1- إيه هي الأنواع المتاحة في مصر؟ وأيهما أفضل؟
*الموجودين في مصر الآن نوعين اللقاح الصيني (سينوفارم) واللقاح الإنجليزي (أسترا زينكا)، مافيش واحد أفضل من التاني، كل واحد له ميزات وله عيوب.
2- هل ممكن يتنقل لي الفيروس من التطعيم؟
* لا مش ممكن
3- هل ممكن حد يجيله الڤيروس بعد التطعيم؟
* ممكن طبعًا. ودا حاجة من ثلاثة:
1- كان ابتدى الإصابة قبل التطعيم
2- أو جاله عدوى من شخص آخر بعد التطعيم بفترة قصيرة قبل ما يكتسب المناعة.
3- أو بعد ما اكتسب المناعة، لأن التطعيم برضه مش بيعطي مناعة 100٪؜ والفايدة منه مش أنه يمنع الإصابة، لكن الفايدة الأساسية ان لو حصلت إصابة لا تؤدي للوفاة أو تكون أعراضها بسيطة.
4- حماية اللقاح تحدث بعد فترة زمنية أد إيه؟ وتستمر لفترة أد إيه؟
* الحماية المستهدفة تبدأ بعد 15 يوم من الجرعة الثانية وغير معروف حتى الآن مدة الحماية لأن اللقاح لسه جديد، لكن لغاية النهاردة بنتكلم في 6 شهور، إنما بقى بعد الفترة دي في خلية محترمة بتفضل موجودة لفترة اطول بكتير يقال انها بتفضل لسنوات ودي برضه بتساعد في المناعة.
5- هل بعد ما أخدت اللقاح مش هاحتاج الكمامة ولا الإجراءات الاحترازية؟
-لا لازم الالتزام بكل الإجراءات لأن زي ما قلنا إن اللقاح لا يمنع الإصابة.
6- مين أهم الفئات اللي المفروض تاخد المصل؟
*في ظل تزايد الأعداد حاليًا كله المفروض ياخده إنما برضه الأولوية للطاقم الطبي وأصحاب الأمراض المزمنة من الضغط والسكر والبدانه وكبار السن.
7- أنا اتصبت بكورونا هل آخد المصل؟ وامتى؟
*آه حضرتك ممكن تاخد المصل بس بعد شهر من التعافي، ولو كنت أخدت علاج بلازما للڤيروس يبقى بعد 3 شهور.
8. أنا عندى دور برد هل آخد المصل؟
*ممنوع تاخد المصل وأنت عندك دور برد إلا بعد ما تتأكد تمامًا إن الدور ده مش كورونا وكمان الأعراض تنتهى عندك تمامًا.
9.آخد كام جرعة؟
* التطعيمات بتكون على جرعتين بينهم من 3 ل 4 أسابيع في اللقاح الصيني.. و3 شهور في أسترازينيكا.
10. لقاح (أسترازينكا) بيسبب تجلطات؟!
*في انجلترا لقوا إن كل مليون اتطعموا باللقاح فيهم نحو 4 أشخاص اتعرضوا لجلطات، ودي نسبة ولا حاجة إذا قارناها بنسبة الناس اللي بيحصل لهم تجلطات بسبب الكورونا.
يعنى ناخده ولا لأ ؟؟
ايوة ناخده لأننا بنتكلم عن 4 حالات لكل مليون ومش كل ال 4 حالات بيموتوا! وانجلترا إلى الآن شغالة تطعيم بيه ومبطلتش.
11. إيه الأعراض اللي محتمل تحصل لي بعد ما آخذ اللقاح ؟ احتمال يحصل ارتفاع في درجة الحرارة وتكسير وهمدان ودي أعراض عادية للقاح. ما تقلقش منها.. وخد باراسيتامول قرصين / 8 ساعات لحين اختفاء الأعراض.
12. هل الحوامل تاخد المصل؟
*لا
13. هل المرضعات تاخذ المصل؟
*لا، ما فيش دراسات كفاية لغاية دلوقت.
14. هل أصحاب أمراض المناعة ياخدوا المصل؟
*الأكثر أمانًا لأصحاب أمراض المناعة هو السينوفارم.
15. إزاي أقدر آخد اللقاح وفين؟
*بتسجّل في موقع وزارة الصحة ببياناتك وبتختار أقرب منطقة ليك وبيبعتولك رسالة بعد فترة بالمكان والزمان ودا رابط موقع التسجيل
https://egcovac.mohp.gov.eg/#/home
16. أنا سجّلت من فترة بعيدة وما جاليش أي رسالة بالميعاد، أعمل إيه؟
*تدخل على الموقع تاني وتعمل إعادة تفعيل للطلب أو تتصل بالتليفون ب رقم الخدمة 15335 وها يساعدوك.
أخيرا:
اللجنة بتحذّر بشدة لأن أعداد الإصابات، وشدة الإصابات، ونسب الإشغال في المستشفيات، والوفيات في زيادة رهيبة، وبنرجوكم بنرجوكم بنرجوكم منع أي تجمعات الفترة القادمة، والالتزام: "الكمامة، التباعد الاجتماعي، اللقاح".
نصلي إلى الله أن يحفظ شعب مصر والعالم من الوباء، ويشفى المصابين ويعزي المكلومين.