"البوابة نيوز" تنشر قصيدة" الحكاية دي قديمة" ل إبراهيم عبد الفتاح

خص الشاعر إبراهيم عبد الفتاح "البوابة نيوز"، بقصيدته التي كتبها منذ سنوات طويلة وحلم بان تغنيها كوكب الشرق "أم كلثوم".
وقال عبد الفتاح في تصريح خاص للبوابة:" الحكاية دي قديمة أوي كل اللي فاكره أني اتمنيت أكتب غنوة للست وتغنيها وطبعًا دي مجرد أحلام بس طاوعت خيالي وكتبت الغنوة ومعرفتش أوصلها ليها، والله يرحمها توفت سنة 75 يعني تخيلي الغنوة مكتوبة قبل ما تتوفى بتلات سنين تقريبًا.
الذكرى بتنده على ماضي كان قلبي قرب ينساه
وبتملالي الكأس الفاضي وتقولي أشرب واملاه
والأفكار بتاخدني بفرحة على أول مشواري معاك
والأغصان بتميل م النشوة وتفكرني بيوم لقياك
ألقي سؤال بيدوب حيرتي غلبت إداريه
لو جه الماضي وصحي شعورك تعمل أيه
وان جالك يناديك وناداني
أيه رأيك لو نرجع تاني
رأيك أيه ؟
....
أنا عن نفسي ف بعدك دوبت وتوهت وشفت كتير
كنت باقول ع الفكر نسيته وابقي بافكر في التفكير
ياما ف ليلي باغمض عيني واسرح دايمًا فيَ وفيك
واستناك على شط حنيني واسأل قلبي أمتي الاقيك
ألقي سؤال بيدوب حيرتي غلبن إداريه
لو جه الماضي وصحي شعورك تعمل أيه
وان جالك يناديك وناداني
أيه رأيك لو نرجع تاني
رأيك أيه ؟
....
أيه رأيك لو نرجع تاني ماتقولي أيه رأيك.. أيه
نفتح صفحة جديدة وننسي سهر الجرح ونار لياليه
ماتقوليش في البعد ارتحنا ماتقوليش
بقي من غير الحب ياروحي قدرت تعيش
واسأل نفسك نفس سؤالي ورد عليه
لو جه الماضي وصحي شعورك تعمل أيه
وان جالك يناديك وناداني
أيه رأيك لو نرجع تاني
رأيك أيه؟