قصيدة غضب الغلابة ل"وجيه أمين"

بين البحور والنيل هواكي رايح جاي
يحف سعف النخيل يخضر من غير ري
يقطع سكون الليل النسمة تنعشنا
كل اللي زارك قال والله ما لك زي
نهارك الشمس ترمي شباكها على أرضك تدفيها
ليلتك قمرايا ضيها ينور كل مكان فيها
نيلك لو يوم عطشوه
ينزل عرق الجبين على زرعتك يرويها
أهراماتك أوتاد على أرضك تثبتها
أبو الهول نحتوه على أرضك لجْل يحرسها
المولى وصف أرضك لطالبين القوت يأكلوا من خيرها
على أرضك نهاية كل اللي حاول في يوم يدنسها
أرضك تشم الندى بسرعة تتخضر
ونيلك فارش بساطك من السندس الأخضر
نشم ريحة ترابك نسأل ونتحير
تراب ده ولا مزيج من المسك والعنبر؟
غرامك جوه القلوب شعلل نار الثورة في الأقلام
كلام كتير عنك بين الضلوع ساكن
من حالك المعسور أنا لا بأصحى ولا بأنام
مع إني طول عمري على جنبك أنا راكن
طول عمري عايش على أرضك وأنا مجروح
لكن لما بشوفك مزهزهة بأفرح
وأقول كفاية هواها له نسمة ترد الروح
وأنسى همومي وفي هواكي أسرح
ولا حاجة تقدر تشيل من جوه القلوب عشقك
ولا حد يقدر ينسى إن إحنا من طينك
عرقنا داب جواكي واسألي أرضك
ما إحنا عرقنا يا طاهرة منبعه نيلك
إحنا ولادك يا بلدي وإنت عرفانة
عايشين عليكي يا صبرة عالحلوة والمرة
آهين يا بلدي وألف آه يا أنا
بتطلعي من نقرة بتنزلي في حفرة
فكر الولاد انحصر بين أغنية وإشارة
كرهوا الولاد بعضهم وقسموا الميادين
ودودة الفرقة في العضم نخازة
حالفة بنجمة داوود لتقضي على الاتنين
طول عمرنا متجمعين وعدونا واحد
هوس المناصب دخل فرق الخلان
بشوف على دفتك في كل يوم واحد
نفسي في واحد يهدّي ثورة البركان
يا بلدي ليه بقيتي ع الكل غضبانة
إحنا غلابة ودي هوجة البهوات
اللي نماشيه في سكته يوصل وينسانا
نتوه مع اللي تاه ونبكي على اللي مات
يا مصر قومي وقومي للسادة والساسة
اللي ضميرهم مات أو في المناصب داب
فيه خلق عايشة في وسطكم طول عمرها منداسة
من النهارده لازم تعملوا لها حساب
صبر الغلابة طال ومره مررهم
ضهر الغلابة انحنى ومعادش متحمل
نظرة لحال الغلابة ممكن تصبرهم
غضب الغلابة طوفان هايعيدها من الأول