طالب المئات من المواطنين بحارة عواد السيد، بمنطقة ميت عقبة التابعة لحى العجوزة، مسئولى الحى بالتدخل السريع لإنقاذهم وأسرهم من إهمال هيئة الصرف الصحى بالمنطقة، والتى تتعرض شهريًا للغرق بمياه الصرف الصحى، الأمر الذى يتسبب فى نشر الأمراض والروائح الكريهة، ويعوق حركة مرور السكان، والحياة فى تلك المنازل المتهالكة، حيث تعرض الشوارع من رشح وطفح أرضى مستمر. يقول «على م»، أحد سكان حارة عواد السيد بمنطقة ميت عقبة: «نعانى يوميًا، لأننا عايمين هنا فى المجارى، والريحة قذرة جدًا، والمشكلة الكبيرة فى الأطفال، لأنه صعب السيطرة عليهم، وتعرضهم للمجارى يتسبب فى أمراض خطيرة، ومفيش أسبوع يعدى إلا لما نغرق، ومحدش بيسأل فينا، والبيوت من تحت رشحت واتعرضت لتشققات، وإحنا اللى بنسلك المواسير، وساعات الحى بيبعت عربية ضغط عالى لأن المواسير مكتومة، والحى ولا بيقدم ولا بيأخر ولا يغير حاجة، وتعبنا من كتر شكاوينا، وكل اهتمامهم بالشوارع النضيفة، اللى مش محتاجة تنضيف». بينما أشارت أم أحمد، أحد سكان حارة، والذى تعرض منزلها للضرر الأكبر بعد غرقه بالكامل، قائلة: «عايشة فى الدور الأول وخايفة على أولادى إن حد فيهم يقع فى البلاعة أو يغرق فى مياه المجارى، حتى لما يسلكوا المجارى، الميه بتختفى، ولما بنشرب المياه بنلاقيها مختلطة بمجارى وميه حلوة الاتنين مع بعض». وتقول الحاجة أم على، أحد سكان الحارة: «مشكلة الصرف عندنا بقالها كتير، وتواصلنا مع شركة الصرف، ولم يستجب أحد، حتى لو المجارى اتسدت فى العمومى، محدش بيجى غير لما نعملها إحنا بنفسنا، غير إنى بعانى من حساسية على الصدر والريحة بتتعبنى». وقالت: «حلمنا بأن يتم حل المشكلة علشان عندنا أطفال ذنبهم إيه يجيلهم أمراض؟!».
