"جدو" بعد فقدانه الذاكرة: خفت أكون وصلت ل2025 وأنا مش حاسس

روي محمد ناجي "جدو" مهاجم نادي المقاولون العرب، تفاصيل إصابته بفقدان مؤقت للذاكرة، بعد ارتطام كرة في رأسه سددها زميله اللاعب محمود فتح الله، خلال مران الفريق، "قائلا": "خفت لا أكون وصلت ل 2025 وأنا مَش حاسس.. ونسيت اللبس اللي كنت جايبه معايا وقلت: أنا جبت اللبس ده إمتى؟".
وأضاف جدو، خلال لقائه في برنامج "معكم.. منى الشاذلي" المذاع عبر فضائية "سي بي سي" اليوم الخميس: "من كتر ما كنت ناسي حاجات كتير خفت لا يكون كل اللي حصل مقلب وكل الناس بيمثلوا عليا، كل الناس حاولت تشتغلني وفيه واحد قاللي انت خدت مني فلوس وأنا ما اخدتهاش".
وتابع: "أنا السبب في أن فتح الله جه نادي المقاولين.. وكان نفسي أنساه لما فقدت الذاكرة، من الحاجات اللي كان نفسي أنساها إلى الأبد حادثة النادي الأهلي المؤسفة في استاد بورسعيد".