بالفيديو.. "مافيا" تجمع السمن "المدعم" من الأسواق

تداول رواد مواقع التواصل الاجتماعي، مقطع فيديو، يظهر أشخاصا يشترون كميات كبيرة من السمن بأحد فروع "كارفور"، مشيرين إلى أنهم تجار سوق سوداء يستعدون لتعطيش السوق قبل منتصف العيد الذي يزيد فيه استهلاك السمن.
وقال ناشر الفيديو: "النهاردة نزلت قبل الافطار اجيب حاجات من كارفور المعادي.. وكان رايق بس لقيت حاجة غريبة اوي واحد وواحدة ومعاهم شاب... ومعاهم 7عربيات وكل عربية فيها 15 كرتونة سمن يعني 105 كراتين".
وتابع: "طبعا شكلهم نرفزني وصورت اللي حصل وسمعت الحوار اللي دار وهو كالآتى: الراجل بيقول للكشير نفس الكمية اللي خرجناها من شوية يعني 105 فالكاشير كلم حد اسمه استاذ وحيد وقال للراجل استاذ وحيد جاي فالست اتخضت وقالتله وبعدين، فالراجل رد وقالها ما تشغليش بالك تبعنا".
وقال "جه اللي اسمه وحيد وسلم على الراجل وقال للكشير خرجه والكشير طلب من قال الراجل الحساب 10الاف و350 تقريبا فداله الفلوس وبدء الكشير يعد والراجل طلع فلوس تاني فئة 100 جنيه من جيبه وبدء يوزع على بتوع الأمن ومصورلكم الكلام ده.. المشكلة بقي أن جه واحد اسمه ياسر عرفت بعد كده أنه رئيس وردية الأمن وشاف اللي حاصل وسلم على الراجل والست".
واستكمل حديثه: "المهم بعد ما خرج سألت الكشير هو ده كده عادي فقالي لا طبعا لأن دول تجار والسمنة دي مدعمة بس طالما الأمن وافق انا ماليش دعوة.. فسألته يعني لو شيرت الفيديو اللي صورته مش هاتتأذي.طبعا اتخض بس حب يبين أن الموضوع عادي فقالي انشر عادي انا ماعليش أي مسئولية طالما الأمن واقف.. خرجت واتوجهت لواحد من الأمن شكله كده مسئول وقولت له هو اللي حصل ده عادي. فقالي اه عادي طالما بيدفعوا ثمن البضاعة ياخدوها قولت له دول تجار وهايبيعوها باضعاف تمنها.. قالي عارف وهاعمل لهم ايه"
وأضاف: "بدء أسلوب كلامه يتغير ولقيته بيقولي التصوير ممنوع هنا وشاور لي على يافطة بتقول كده فعلا وقالي انا من حقي اخد التليفون اللي صورت بيه... طبعا روحت مكشر ونبرة صوتي بقت رخمة قوي وقولت له لو راجل جرب تاخد التليفون وقانون ايه اللي يمنعني اني اصور حرامية بيسرقونا...وقولت له انا كده لازم انشر الكلام ده لاني لازم اخد حقي...قالي انشر زي ما تحب وما حدش هايعرف يعمل معانا حاجة لأن غيرك كتير صور ونشر وخد صابونة في الاخر.. فقولت له الموضوع مختلف شويتين لاني هافضحكم في الصحافة."