مي عز الدين: " mbc عاوزاني أقوِّم قناة لوحدي"

أعربت الفنانة مي عز الدين، عن استيائها من عرض مسلسلها الجديد "وعد" على قناة mbc مصر 2 فقط، ومن رد إدارة القناة عليها بعد طلبها منهم من زيادة عدد مواعيد العرض، وقالت عبر صفحتها الشخصية بشبكة التواصل الاجتماعي "فيس بوك": "طيب أنا قضيت اليومين اللي فاتو بحاول أطالب إدارة قنوات Mbc مصر، بزيادة إعادات المسلسل وعرضه على قناة Mbc مصر كمان، لأنه بيتعرض على Mbc مصر 2، فقط، ودي ناس كتير مكانتش تعرفها ولا منزلاها وهو المسلسل الوحيد اللي من إنتاج شركة تابعة ليهم، وبالتالي كان من المنتظر الاهتمام بعرضه على قنواتهم الإثنين، ومع ذلك مش راضيين يخلوه يتعرض على القناتين بتوع Mbc مصر وسايبينه على Mbc مصر 2 بس".
وأضافت: في الآخر الرسالة الوحيدة اللي وصلتني إن ده مقصود علشان دي الفرصة إن القناة تتعرف! يعني أنا كده مطلوب مني أقوم قناة لوحدي ! تمام وانا بقول لmbc قبلت المسئولية، وبإذن الله ربنا يكرم والقناة والمسلسل يتشافو، والحمدلله فيه علامات باينة من كم الإعلانات اللي جه من بعد أول حلقة للمسلسل، وغيره، وانا هاعتبره امتحان ليا يعرفني قدري عند الناس، وهل فعلا بيحبو مسلسلاتي أو لا، ونسبة الجماهيرية اللي وصلتها ايه مع اني مهما كان ليا جمهور اكيد كنت اتمني اني اتشاف من الناس اللي مش من جمهوري، لأن ساعات بتكون كا مشاهد ملكش في ممثل لكن لو قابلت حلقة لمسلسله بالصدفه وعجبتك بتقرر تتابعه وده في الاخر بيبقي خلاني كسبت مشاهد جديد بقي بيحب يتفرج على أعمالي وده طبعا مش هيحصل السنة دي لأن مفيش حد بيبقي معدي وبيشوف القناه دي بالصدفة الناس لسه اصلا بتتعرف على طريقها من خلالنا وبينزلوها... لكن قدر الله وما شاء فعل، وبالتالي عندي طلبين أولا بطلب من جمهوري وروابط الفانز بتاعتي تساعدني في نشر تردد القناه لكل الناس اللي مش عارفة تجيبها، وبطلب من صحافتنا تشهد انا بدأت رمضان بقناة كم الناس اللي عارفها قد ايه، وصفحتها حتى على الفيس بوك فيها كام، وبعد رمضان تقولولي بأمانة هل قدرت فعلا في ظل الظروف دي أنجح ولا لأ. ومتابعة نسبة مشاهدة القناة على آخر رمضان هتكون وصلت لأيه، ومشاهدة المسلسل على موقع شاهد دوت نت وصلت لأيه، لأنه المكان الوحيد اللي الناس تقدر تشوف الحلقة فيه لو موصلوش للقناة. شهادة الصحافة والجمهور ساعتها تعويض يكفيني".