حصاوي وآلة الزمن

المواطن الغلبان حسن حصاوي يغشي عليه من حين لآخر، وعندما يفيق لا يفهم ما حدث حوله من تغيرات ولكن أحيانا ما يجعل من يسمعه هو الذي يغشي عليه.
( نام حصاوي واستيقظ وفجأة بلا مقدمات فتح عينيه فوجد نفسه جالسا علي مقعد في داخل ما يشبه الأتوبيس ولكنه طائر، نهض مندهشا فوجد رجلا جالساً إلي مقعد وممسكاً بمقود غريب الشكل وأمامه أزرار كثيرة)
حصاوى
من فضلك .. لو سمحت أنا فين؟
السائق
أنت في آلة الزمن يا حصاوي.
حصاوى
يا نهار أسود.
المثقف
ليه هتسود النهار بس ؟
حصاوى
آه صحيح.دي ميزة. يعني أقدر أعرف المستقبل اللي جاي؟
السائق
ممكن طبعا ولكن ..
حصاوى
لكن إيه؟
السائق
فيه حد يبحث عن المستقبل قبل ما يعرف ماضيه واللي حصل فيه؟.
حصاوى
الماضي أنا عارفه كله وحافظه تقريبا لكن اللي لسه ما عرفتوش هو المستقبل
إيه اللي هيحصل لنا في الأيام والسنين اللي جايه.
السائق
مستحيل تعرف المستقبل من غير ما تعرف الماضي والحاضر كمان اللي أنت عايشه
حصاوى
يا سيدي عارفه.
السائق
ما تصدقش.بيتهيأ لك. يا ما حاجات قدام عينينا وبنشوفها بغير حقيقتها وغالبا بنشوفها بصورة مخففة وساعات بصورة وردية زى الواحد لما يحب واحدة
فيها العبر كلها، لكنه مغرم صبابة وعشان كده بيشوفها بعيون غير عيون الناس، لأن الحب أعمي.
حصاوى
أمري لله، وريني يا سيدي الماضي كان فيه إيه؟
السائق
من إمتي بالتحديد؟
حصاوى
من نصر أكتوبر اللي هنحتفل بيه بعد أيام .
السائق
ياه. افتكرت هتقولي إيه اللي حصل من أيام مينا موحد القطرين.
حصاوى
وإيه اللي خلاك ترجع كل الزمن دا؟
السائق
السبب إنها كانت أيام عظيمة لكن محدش بيفكر فيها غير عدد قليل من العلماء المصريين وآلاف العلماء والهواة من كل بلاد العالم إلا إحنا للآسف.
حصاوى
بعدين .. بعدين. خلينا في نصر أكتوبر.
السائق
طب قولي أرجعك لأصل الحكاية. لحرب 1948 ع الأقل.
حصاوى
يبقي مش هنخلص لا في يوم ولا عشرة، ولا ميه.
السائق
تحب أجيب من الآخر وأكلمك علي آخر فصل فيها وبنعيشه دلوقت؟
حصاوى
يا ريت عشان نخلص.
السائق
بس كده؟ حاضر( ويغير مقود الطائرة وفي ثانية يتغير المنظر من أعلي)
حصاوى
إحنا فينا دلوقت ؟.
السائق
إحنا فوق غزة الفلسطينية.
حصاوى
كويس. وإيه الناس اللي ماشيين دول؟
السائق
دول مجاهدين مسلحين.
حصاوى
رايحين يحاربوا طبعا
السائق
عليك نور يا حصاوي. بيحاربوا مين ؟
حصاوى
أكيد الضباط والعساكر اللي في الناحية التانية.بس دول سلاحهم أقوي منهم لأن معاهم دبابات ومصفحات ومدافع. دول أكيد من الجيش الإسرائيلي.
السائق
طلعت حمار فعلا يا حصاوي.
حصاوى
أمال إيه؟
السائق
دقق كويس. هنزل بآلة الزمن لتحت أكتر. هيه فهمت ولا نقول كمان؟
حصاوى
يا خير مطين دول باين زى ما يكونوا من الجيش المصري.
السائق
زي ما يكونوا ؟ هما فعلا الجيش المصري.
حصاوى
وبيعملوا إيه ؟
السائق
بيدافعوا عن أرض سينا المحتلة.
حصاوى
من إسرائيل ؟
السائق
لأ إسرائيل انسحبت من أربعين سنة وما رجعتش من ساعتها.
حصاوى
فهمت يبقي دول فلسطينيين وداخلين سيينا يعملوا منها أعمال ضد إسرائيل
السائق
( ضاحكا) لا طبعا. يقطعوا من سيناء حتة عشان يسكنوا فيها هما وجماعة القاعدة .اصل غزة مش سايعاهم وهما مش عايزين يعيشوا في الضفة الغربية مع بقيتهم عشان يبعدوا عن فتح. وويمكن ناويين بعد ما يحتلوا سيناء , يحتلوا الضفة كمان.
حصاوى
ليه ؟ أمال هما عرب وفلسطينيين أزاي؟ أمال حاربنا واستشهدنا من
سنة 48 ليه عشان خاطر مين؟ دول مش ممكن يكون عرب. مين دول؟
السائق
أنا عليا أوريك اللي حصل. أنما أنت عليك التفسير.
حصاوى
أنا مش لا قي لها تفسير. جاوبني مين دول؟
السائق
هنفضل طول عمرك حمار ؟ دول الإخوان يا حصاوي.
( حصاوى يكاد يغشي عليه
ثم يتماسك ويفتح النافذة ويلقي بنفسه من شاهق )