بحبح.. عندليب المرج

كل واحد فينا عنده إمكانيات وطاقات داخلية تخليه شخصية مؤثرة وفعّالة في المجتمع.. الموضوع كله تعرف انت متميز في إيه وتحاول.. تكبره وتنميه.. ويا ريت تفهموا كلامي صح وميبقاش في سوء نية في الموضوع.. فيه حاجات ممكن تبقى عندك ومش عند غيرك.. حاجات بسيطة جدا وتافهة بس تكون سبب في نجاحك، من وجهة نظر بعض الناس ممكن تكون شاب بتلبس بنطلونات حمرا ضيقة وباديهات سبعة كارينا ومسقط البنطلون.. والناس تبصلك باحتقار وتبقى شايفاك عيل غلط.. في حين انك لو كملت في الطريق ده وتميزت فيه ممكن في يوم من الأيام.. تقدم برنامجًا على التليفزيون المصري زي الأستاذ شريف مدكور.. ممكن تبقى تخين جدًا والناس بتقولك خِس.. واعمل دايت.. في حين عندك الأستاذ عماد أديب والأستاذ معتز الدمرداش.. رموا كلام الناس ورا ضهرهم وكملوا في اللي هما فيه لحد ما بقوا نجوم التوك شو.. متهتمش بكلام الناس يمكن كرشك يكون ميزتك.. يديك ثقل قدام الناس وهيبة عمرك ماهتوصلها لو كنت رفيع.. ممكن تبقى شاب لسانه طويل زى أي شاب في مصر واخد الموضوع هواية.. في حين انك لو تميزت فيه وأبدعت ممكن تبقى زي الأستاذ مرتضى مندور.. بتطلع على كل التليفزيونات.. وماسكلك إدارة نادٍ أو اتنين وبتشتم في أحمد شوبير برضه عادي يعني.. ممكن نبرة صوتك المسرسعة تبقى سر شهرتك زي عندليب المرج.. أو تبقى إعلامي كبير زي الأستاذ أحمد موسى.. ممكن بستشوار كويس وعلبة ماكياج محترمة على شوية تمثيل تبقى مذيعة زي ريهام سعيد.. ممكن لو معاك قرشين تنتج فيلم لراقصة جديدة وتبقى منتج كبير وتتحكم في سوق السينما المصرية.. زي الأستاذ السبكي.