المرة دي أنا بريئة براءة الذئب من دم ابن يعقوب.. المشابك بتضيع لوحدها من غير أي دخل مني، أنا بحطهم في شنطة المشابك ومش بلاقيهم، صحيح انا كل تنشيرة بوقع مشبك ولا اتنين بس دة مينقصهومش النقص الفظيع دة.. صحيح أنا بقفل بيهم أكياس النسكويك والنيدو بدل ما أعبيهم في برطمان بس دول عشرة مشابك مخصصين للمطبخ، لا الموضوع دة فيه سر وأكيد النسانيس اللى أنا مخلفاهم ليهم دخل بيه.. جبت الاتنين ومسكت المعلقة الخشب ونكشت شعري.. بصراحة هو كان منكوش طبيعي وقعدتهم قدامي وقولتلهم فين المشابك؟ كمية البراءة اللي في عنيهم كانت لازم تخليني على الأقل ألم شعري بس كنت صلبة هاااااااااااااا العيال سمعوا الصيحة من هنا واعترفوا على بعض.. قطاقيطي الحلوين قرروا يعملوا مسابقه مين يحدف المشابك أبعد.. حاليّا مركبة لكل واحد فيهم عشرة مشابك في صوابعه واتنين في كل ودن وواحد في مناخيره عقاب يقعدوا كدة ربع ساعة علشان ميكرروهاش، اللي غايظني إنى سمعتهم بيقولوا لبعض عاوزين نعمل كده كل يوم علشان ماما تعملنا كدة.