لو انتى زوجة مصرية أصيله لازم تكونى حاجه من اتنين يا داخله جمعية يا ماسكه جمعية النوع الاولانى ده السهل انتى محتاجه فلوس علشان سبب وجيه وغالبا مش بره الأسباب دى 1_ تدفعى مصاريف المدارس بسلطاتها ببابا غنوجها 2_تشترى طقم الصينى لبنتك إلى في أولى اعدادى علشان تشيلى من على نفسك شويه من الجهاز 3_تنجدى الانتريه أو تغيرى الستاير قبل ما سلفتك تغيرهم زى ما كانت بتقول الأسبوع اللى فات وهما بيتغدوا عندك ساعه ما كانت بتدفس المحشى في بقها 4_تركبى تقويم لابنك اللى العيال شاطوا الكوره في وشه فأسنانه حدفت يمين 5_تعملى بروتين في شعر بنتك اللى مطلع عينك في التسليك كل يوم الصبح 6_نفسك تروحى شرم الشيخ بدل مطروح علشان تتصورى ووراكى الاجانب وتحطى الصورعلى الفيس بوك زى مديحه اللى ساكنه في الدور التالت 7_تحيبى تليفزيون أكبر من اللى عند حماتك وتقوليلها ابنك اللى صمم يجيبه علشان يشوف الكوره بس انتى حتتفرجى على المسلسلات التركى hd 8_ تجيبى موبايل سامسونج الجديد أو أي حاجه من التتش الجديده الغاليه الحلوة دى اللى العيال حياخدوها منك مفيش أسبوع و ايا كان سببك فانتى بتسالى طوب الارض على جمعية يكون دورك فيها في الأول وبعد ما تقبضى الفلوس تضربى نفسك ميه جزمه انا ايه اللى دخلنى جمعيات لحد ما تخلصيها وتشبكى في اللى وراها النوع التانى: انك انتى اللى ماسكه الجمعية وساعتها بقى لازم يتوفر في شخصيتك حاجتين الصبر والتناحه، الصبر لانك حتسمعى كميه كدب تخليكى تمسكى مقص وتقصى بيه لسان اللى بيكلمك خصوصا في مرحله ترتيب الادوار من أول انا عاوزه أأقبض الأول علشان هعمل عملية قلب مفتوح في حواجبى لحد لازم ااقبض الأول علشان في تسونامى حيضرب الريسبشن يوم الجمعه بعدالصلاه ولازم الحق اجيب عوامات ليا انا والعيال.. أما التناحه فبتحتاجيها علشان تلمى فلوس الجمعية لأن اللى عليه الدور يقبض بيكلمك كل 3 ثوانى علشان ياكد عليكى أنه محتاج الفلوس ضروى وعليه حكم ب369 سنه اشغال شاقه علشان مدفعش قسط السكوتر لابنه الصغير والبوليس واقف على الباب يا تلحقيه يا متلحقيهوش مع أن لسه النهارده 22 والجمعية بتتقبض يوم 10 وتبتدى رحله الكفاح مع أعضاء الحمعيه اللى كل واحد فيهم عنده أي حاجه تخليه مش قادر يدفع اللى رموشه بتقع واللى لسانه بيطلع ر واللى ودانه بتطرح مانجه واللى عنده ضيوف من اديس ابابا فمينفعش يسيبهم لحد ما ربنا يوفقك وتقفشيهم وتاخدى الفلوس بحمد الله مره تستخبى قدام الشقه ومره تستنى على باب الشركه المهم أن أي واحده ماسكه جمعية تنفع تشتغل في مباحث التهرب الضريبى وحتحيب لخزينه الدوله فلوس بالهبل.. وهكذا شهر ورا شهر وجمعية ورا جمعية حرقه دم واعصاب لحد ما تبطلى تمسكى جمعيات تدورى على واحده تدخلى معاها جمعية وتعملى فيها اللى كان بيتعمل فيكى ودوخينى يا لمونه دوخينى.
