البيت هو مملكة المرأة وهى اللأمر الناهى فيه، ولكن كما نعلم جميعا أن الديموقراطية لها أنياب فهى تعكر صفو تلك المملكة، حينما تبدأ الرعايا في التذمر والشكوى والبحث عن حقوقهم الضائعة، لذا فأمام كل ملكة أمر من اثنين إما أن تكن ديكتاتورية وتوأد أصوات الرعايا قبل أن تخرج من أفواههم، أو أن ترضى بالأمر الواقع وتعترف بخطأها، لذا اعترف وأقر إنى مضيعه السنه اللى فاتت 47 فردة شراب بس وحياة ولادى الهى يارب اتخن لو كنت بكدب - ايوة في تخن اكتر من كده اومال انت فاگر ايه ده انا عوصفووووور - الهى يارب المواعين تكتر في الحوض اكتر ما بتولد جواه لو كنت بضحك عليك بس فعلا انا معرفش بيروحوا فين انا مقدره موقفك انك آخر شراب قلعته خليتنى امضى على ايصال بالاستلام وخليت امى تمضى شاهد بس مش شايف انك نزلت بمستوى الثقة بينا اوى انا عارفه انك شكيت انى بعملهم اومليت الصبح مع البيض أو بضربهم في الخلاط مع تسبيكه الطماطم بس وغلاوتك ما حصل ومش بحوشهم علشان اعمل بيهم كره شراب والدليل انك بتلاقينى لابساهم فرده وفرده انا بدخلهم فردتين الغساله بس الشرابات مش بتخرج فردتين هما في بينهم مشاكل ومش طايقين بعض انافكرت انى أأجر مخبر يمشى وراهم أو أشترى جهاز تتبع بس حسيت انها حلول مش عملية...انا جربت كل حاجه حطيتهم في الكيس المخرم وضاعوا غسلتهم على ايدى وضاعوا عملتلهم باى باى من بعيد برضه ضاعوا بص الشرابات بتكره النضافه وبعدين انا مش لوحدى دى مشكله جيل الحل الأخير أن كل شراب يبقى في خاصيه أن ارن عليه..أو أنك تشترى كل شراباتك نفس الشكل واللون واللى يضيع يضيع واللى يتبقى صرف نفسك بيه مش هيبان ماكله شبه بعضه، غير كده اسجنى بالوصل اللى معاك لانى الشراب مش لاقيه الفرده التانيه بتاعته!