كُل واشبع

صبحي

شبرا.
لو وصلت لروض الفرج، ألف مين يدلَّك عليه. مُعاناة عشان توصل لترابيزة وكرسي وممكن دورك يبقي بعد ال100 مثلاً، أما بقي إن حَد ييجي ينضفلك الترابيزة ويجيبلك سلاطات وياخد طلبك، فده ممكن ياخد ساعة تقريباً مع إلحاح وزن شديد.
السلاطات بلدي وطحينة سخنة وطماطم بالثوم والعيش البلدي طازة. بيجيب عيش من مخبز جنبه شغال طول الوقت لصبحي مخصوص. عنده أحلي كفتة وطرب وحواوشي، والكبدة والقوانص باللية، ورز أبيض ورُز بسمتي، الطعم الأجمد لطاجن الملوخية، والأسعار مش غالية قوي يعني ممكن تدبها لحد الانفجار ب150 جنيه بس.
عم حسن
عابدين.
ممكن تستني الأكل فوق الساعة ونص، فممكن تضيع وقتك في حوارات تفتحها مع الناس اللي جنبك، ما احنا عارفين الشعب المصري بيتوحد في الشدة، ريحة الأطباق هتجننك، ريحة شوربة السي فود مع الصلصات المتسبكة وأكل من البحر كاليماري، وجمبري، وكابوريا، وأم الخلول، وجندوفلي، وخضرة الكرافس، والشبت.
الأطباق كلها صنف واحد عبارة عن وجبة متكاملة من أكل البحر، ومدفون تحتها مكرونة اسباجتي خرافية، والفرق بيبقي في الحجم بس، والأسعار بتبدأ من خمسين وستين لحد 100 جنيه.
شمر قميصك لحد كتفك عشان تعرف تضرب وتفصص بمزاج، وابعد الأيباد والمفاتيح عشان الريحة متكرفش عليها، دب الشوكة ولف المكرونة، واتسلي بقي بالكاليماري.
سمية
وسط البلد.
«فسحة سمية» محل حجمه صغير قوي فيه يا دوب 3 ترابيزات، وعلشان عدد الترابيزات قليل ممكن تنتظر دورك خارج المحل. الديكور بسيط وغريب شوية ونظيف جدًا. الجدران عليها صور فوتوغرافية لمناطق وسط البلد، والكنبات عليها شلتات بقماش عليه نقوشات الخيامية الشهيرة. ورغم أن فيه منيو إلا أنك ممكن تطلب طبق اليوم المخصوص وفي أيام الخميس بيكون فيه أطباق زيادة بتضاف للمنيو زي الممبار، والموزة بالفتة، ولحمة رأس، وفتة كوارع.
زبائن المحل غالبًا بيبقوا شباب، وبعض الأجانب اللي ساكنين في مناطق قريبة، وكل الأحاديث في الداخل بتتكلم عن الثورة وحقوق الإنسان. وعلشان المكان صغير مش هتحس بأي خصوصية، لدرجة أنك ممكن تفتح حوار مع جارك في الترابيزة اللي جنبك. كل الأكل بتعمله واحدة بس هي "طنط زيزي".
زيزو ZEZO
شارع المعز لدين الله.
هتلاقي ترابيزاته فارشها بعرض الشارع قدام كشك صغير، وجوه الكشك هتلاقي شخص واحد بيعمل الساندوتشات، ومجموعة بره بتوصل الساندوتشات علي الترابيزات.
هتقعد تاكل في الشارع، بس الشارع أشبه بلوكيشن سينما وسط الآثار والقاهرة العتيقة، السلطات عبارة عن بطاطس متبلة بالتوم والشطة والكزبرة، وطماطم بالتوم، وطرشي بلدي، أحلي ساندوتشات هناك السجق الاسكندراني، والكبدة، والبلوبيف بالبيض، والبسطرمة التركي، بس خلي بالك مشطشطة لأقصي درجة، وهتحلي بالسكلانس وده بيبقي عبارة عن ساندوتش محشي قشطة وحلاوة ومربي وعسل وممكن تزود مكسرات عليه. وأسعار الساندوتشات كلها تقريياً من 6 ل9 جنيه.
شعبان
المنشية.
"هو ده شعبان بتاع السمك اللي بيقولوا عليه"، دي لافتة كبيرة متعلقة علي السيراميك، وتحتها هتلاقي ترابيزات خشب كتيرة مرصوصة جنب بعضها، موجود ورا سيما ركس الشهيرة، المحل ده كان موجود قبل كل محلات السمك في إسكندرية، أكتر الزباين من القاهرة مش إسكندرية، ممكن تاكل في الشارع أو تقعد جوا المحل.
السلطات هناك بلدي خضار، وسلطة طحينة، وعيش طازة، وتبدأ بشوربة السي فود طعمها حكاية وكلها فسفور، هناك مفيش بلطي وبوري ومشوي ومقلي والكلام ده، ادخل علي الفسفور علي طول جمبري حكاية، وسبيط، وكابوريا، ومياس بالبطاطس، وبربون، والأكل كله بينزل سُخن بنار الفرن، والأسعار مش غالية لحد 60 جنيه تاكل لما تشبع.