من الشهرة لسائقة تاكسي.. عبير عادل تكشف كواليس 7 سنوات من الغياب

تصدرت الفنانة عبير عادل، مواقع التواصل الاجتماعي، مؤخرًا بعد تصريحاتها الصريحة والجريئة خلال استضافتها في برنامج «أنا غير» مع الإعلامية مجدلا خطار على قناة «المشهد».
وكشفت عبير خلال اللقاء عن الفترة الصعبة التي مرت بها بعد أن منحها التمثيل فرصة للظهور، لكنها اختفت عن الساحة الفنية لمدة حوالي سبع سنوات.
وأوضحت أنها لجأت في تلك المرحلة إلى خيارات مختلفة وأمور خاصة لتجاوز تلك الفترة الغيابية، مما أثار تفاعلًا واسعًا بين جمهورها ومتابعيها على وسائل التواصل.
اقرأ أيضا| في ذكرى رحيلها.. محطات فنية في حياة فايزة أحمد
وقالت عبير عادل: "الشغل شرف لأي إنسان ممكن يكون في متغيرات في حياته في الظروف المحيطة، مفيش شغل كانت الوسيلة اللي قدامي إني استخدم العربية علشان اشتغل، من ممثلة لسائقة توصيل، رد فعل الناس اتبنى عليه رد فعلي مكنتش متخيلة أن رد الفعل هيبقى بالشكل الإيجابي السريع أنا انبسطت من رد فعل الناس لأنهم شجعوني مكنتش متخيلة دا".
وأضافت: "بقالي 7 سنين غايبة عن الفن ومش بإرادتي السوق عرض وطلب مش بطلب، في الفن تتوقع أي حاجة لأن هي لعبة أنتي مش عارفة الدور بتاعك هيخلص أمتى بتبقى حاجة مؤثرة طبعا في اللي بيحب اللعبة دي لما بيطلع برا الملعب بتاعة أكيد زعلانة ونفسي أنزل اشتغل تاني لكن وجدت البدائل عشان الحياة تستمر".
وعن عملها كسائقة أوضحت عبير عادل: "لما لقيت الفترة طولت والاحتياجات والمتطلبات بتزيد دا طبيعي كان لازم أدور على بديل، في أول يوم وأنا بشتغل كنت خايفة لأن كل شغلانة ليها تفاصيلها وأدواتها ومكنتش عارفة أي حاجة بس اتعودت وبقيت عارفة، أول راكب كانت واحدة ست ووديتها منطقة كانت شعبية وبعد ما نزلت مبقتش عارفة أطلع من المنطقة إزاي وبقيت اسأل الناس وبعدها جالي طلب تاني من ست كانت لطيفة، الأولانة مرضيتش تقعد جنبي وقعدت ورا ومكنتش بتتكلم معايا وأنا أصلا مخضوضة وتجربة جديدة وهي زودتلي التوتر، التانية كانت ست لذيذة وقعدت تتكلم معايا ووصلتها المشوار بتاعها معرفتنيش لأنها مكانتش مصرية".