خاص| دنيا سامي: نفسي أعمل "أكشن كوميدي".. ومبسوطة بنجاح مصطفى غريب

أعربت الفنانة دنيا سامي في حديث خاص ل"بوابة أخبار اليوم" خلال العرض الخاص لفيلم "الشاطر"، عن سعادتها الكبيرة بنجاح الفيلم، الذي يشارك فيه صديقها المقرب الفنان مصطفى غريب، مؤكدة أن العمل يتميز بطاقة شبابية ستُعجب الجمهور.
كما كشفت عن تفاصيل مشروعها السينمائي الجديد مع النجمة يسرا، وأمنياتها بتقديم تجربة "أكشن كوميدي" خارجة عن المألوف.
بداية.. كيف ترين أصداء فيلم "الشاطر"؟
أنا سعيدة جدًا بنجاح الفيلم وفرحانة جدًا بصديقي العزيز مصطفى غريب، وألف مبروك له ولكل أبطال العمل. إن شاء الله الفيلم يكسر الدنيا كالعادة، وأنا متحمسة جدًا أشوفه، وكل حد في الفيلم هيكسر الدنيا كمان، لأنه فيه طاقة جميلة وشغل واضح إنه معموله بحب.
نعلم أن هناك علاقة صداقة قوية تجمعك بمصطفى غريب.. هل حدثت مواقف طريفة بينكما ؟
أكيد طبعًا، إحنا صحاب من زمان، ودائمًا في بينا مواقف تضحك جدًا، خصوصًا إنه خفيف الدم ومش بيهزر في شغله، لكن في الكواليس بيخلي الجو كله ضحك. ودي من الحاجات اللي بحبها في شغله ومعاملته.
وماذا عن جديدك في السينما؟
بدأت مؤخرًا تصوير فيلم جديد بعنوان "الست لما"، بمشاركة النجمة يسرا ومن إخراج خالد أبو غريب. التجربة دي متحمسة ليها جدًا، خصوصًا إني بشتغل مع فنانة كبيرة ومهمة زي يسرا، والمخرج خالد أبو غريب اللي عنده رؤية جديدة ومختلفة.
كيف تصفين شعورك تجاه هذا المشروع؟
أنا متحمسة جدًا جدًا، الفيلم فيه تحدي جديد بالنسبالي، وتجربة أتمنى إنها تعجب الجمهور. التصوير بدأ من فترة بسيطة، لكن الأجواء مشجعة جدًا، وإن شاء الله نقدم حاجة مختلفة وجميلة.
هل هناك نوع معين من الأعمال تتمنين خوضه؟
بضحك لما أقول كده، لكن فعلاً نفسي أعمل "أكشن كوميدي"... حاجة مجنونة وتكسر الدنيا! نفسي أقدم تجربة تكون مختلفة تمامًا عن اللي قدمته قبل كده، حاجة فيها حركة وضحك وتطلع مني طاقة جديدة.
كلمة أخيرة لجمهورك؟
شكراً لكل حد بيتابعني وبيشجعني، وإن شاء الله الجاي دايمًا أحسن، ومستنياكم في "الست لما" قريب.
اقرأ أيضا| حسام حبيب ل شيرين: «أنتِ نجمتي المفضلة وأعتذر عن أي كلمة زعلتك»