محمد سامي يوجه رسالة قاسية ل «طارق لطفي» بعد تصريحاته أمس

حرص المخرج محمد سامى على الرد علي التصريحات التي وردت فى حقه، والتى أدلى بها الفنان طارق لطفي فى أحد البرامج عن طبيعة دوره فى مسلسل "كلام على ورق" والذى تم عرضه منذ ما يقرب من 11 عاما تقريباً.
وكتب المخرج محمد سامى علي صفحته الشخصية بموقع التواصل الاجتماعي "فيس بوك".."رداً علي كلام طارق لطفي المنتشر اليومين دول أولاً طارق ممثل محترم وإنسان جميل واشتغل معايا مرتين، مرة في مسلسل "مع سبق الإصرار"، ومرة تانية في مسلسل "حكاية حياة"، وأعتقد الدورين كانوا مهمين ومحترمين جداً وحقق فيهم نجاحا مهما، بعدها عرضت عليه دور في مسلسل "كلام علي ورق" وحصل خلاف إنتاجي علي الأجر تقريباً وعلي مساحة الدور، وعمل الدور ساعتها الراحل الجميل الأستاذ حسين الإمام والكلام ده سنة 2014 يعني من 11 سنة".
اقرأ أيضا|«مش وصي عليها ».. أبرز تصريحات طارق لطفي على خلع زوجته الحجاب
وتابع محمد سامي: فوجئت إن طارق لطفي طالع دلوقتي بيقول إنه رفض يقدم الدور لأنه كان دور واحد ش.اذ وبدأ يتكلم عن المجتمع والناس وخوفه علي الجمهور وكلام غريب جداً بحاله من المبالغة والاسترسال لكسب ود الجمهور واللعب علي الحالة الدينية والمتحفظة عند الجمهور العربي، ولكن فاته حاجة مهمة إنه بيتكلم عن دور في عمل مصور وموجود والناس تقدر تتفرج عليه، والدور مش دور ش.اذ ولا ليه علاقة!!.
واستكمل: مش فاهم طارق قال كده ليه واخترع الموضوع ده إزاي و كمان عمل حكاية غريبة جداً أنا مش فاهمها وإنه خاف علي عيلته وأسرته وطلعني بروج لشيء غريب جدا، أنا أول مرة وسط عرض عمل ليا أسمح لحد ياخدني لموضوع جانبي ولكن كان لازم أرد، لأن لو طارق عنده عيلة فأنا كذلك.
وقال محمد سامي: ومع إحترامي ليك يا طارق كلامك مختلق وغير صحيح والدور موجود ينفع الناس تشوفه وكان حسين الإمام رحمة الله عليه طالع بيحب روجينا وهي حبيبة عُمره و أنتيمة ماجد المصري وأحمد زاهر وأشرف زكي، وكان جدع مايع عشان أمه رقاصة وصاحب كباريه وده اللي كان عاجبك في الدور وعملت معايا بروڤة أداء عليه وعلي مياعته وكان عاجبك، راجع نفسك يا صديقي قبل إلقاء قنابل تزعل زميلك منك، ومعلش إني رديت بالشكل ده ولكن لا بد من الرد للتوثيق، كلامك كان لازم يترد عليه وكل سنة وانت طيب وأسرتك الكريمة بخير ولو انت ترفض تقديم دور الش.اذ فأنا قبلك أرفض أخرجه!!
وجدير بالذكر ان الفنان طارق لطفي صرح أمس فى لقاءه مع أسما ابراهيم فى برنامج حبر سري وقال رفضت تقديم شخصية «شاذ» في مسلسل «كلام على ورق» إخراج محمد سامي، واللى تم عرضه عام 2014 لان عائلتي بالكامل هي اللي خلتني أرفض الدور.. وأنا كنت موجود قبل ما يتكتب ورقة واحدة، وكنت باني الشخصية مع محمد سامي بطريقة مختلفة، وكان هيظهر إن الشخصية مش شاذ ولكنه بيمثل الحكاية دي لأنه صاحب كباريه وبسبب طبيعة وظيفته، بيروح هنا بشكل وبيعمل حاجات بشكل.
ولكن «لقيت اللي اتكتب غير كده، وخفت جدا واستشرت مراتي وأولادي وأمي لأن كل ده يمسهم بشكل أو بآخر، وفي الآخر قررت إني مش هعمل كده ومش هقدر أقدم الشخصية دي ولا الشكل ده».