"مش دور شاذ ولا ليه علاقة بالشواذ".. محمد سامي يرد على رفض طارق لطفي التعاون معه

حرص المخرج محمد سامي، على توضيح موقفه من تصريحات النجم طارق لطفي، بشأن رفضه تقديم شخصية "شاذ جنسيا"، في مسلسل من إخراجه.
المخرج محمد سامي، علق على التصريحات التي أطلقها النجم طارق لطفي، خلال ظهوره في برنامج "حبر سري"، عن تفاصيل رفضه تقديم الشخصية.
وعبر صفحته في موقع فيسبوك، كتب المخرج: "ردا على كلام طارق لطفي المنتشر اليومين دول، أولا طارق ممثل محترم وإنسان جميل، و اشتغل معايا مرتين، مرة في مسلسل مع سبق الإصرار ومرة تانية في مسلسل حكاية حياة، وأعتقد الدورين كانوا مهمين ومحترمين جدا وحقق فيهم نجاح مهم، بعدها عرضت عليه دور في مسلسل كلام على ورق وحصل خلاف إنتاجي على الأجر تقريبا وعلى مساحة الدور، وعمل الدور ساعتها الراحل الجميل الأستاذ حسين الإمام والكلام ده سنة 2014 يعني من 11 سنة".
وتابع: "فوجئت إن طارق لطفي طالع دلوقتي بيقول إنه رفض يقدم الدور لأنه كان دور واحد شاذ جنسيا و بدأ يتكلم عن المجتمع والناس وخوفه على الجمهور و كلام غريب جدا بحالة من المبالغة والاسترسال لكسب ود الجمهور واللعب على الحالة الدينية والمتحفظة عند الجمهور العربي، ولكن فاته حاجة مهمة إنه بيتكلم عن دور في عمل مصور و موجود والناس تقدر تتفرج عليه، و الدور مش دور شاذ ولا ليه علاقة بالشواذ".
وأضاف المخرج: "مش فاهم طارق قال كده ليه واخترع الموضوع ده إزاي وكمان عمل حكاية غريبة جدا أنا مش فاهمها، و إنه خاف على عيلته وأسرته وطلعني بروج لشيء غريب جدا، أنا أول مرة وسط عرض عمل ليا أسمح لحد ياخدني لموضوع جانبي ولكن كان لازم أرد، لأني لو طارق عنده عيلة فأنا كذلك ومع احترامي ليك يا طارق كلامك مختلق وغير صحيح والدور موجود ينفع الناس تشوفه وكان حسين الإمام رحمة الله عليه طالع بيحب روجينا و هي حبيبة عمره و أنتيمه ماجد المصري وأحمد زاهر وأشرف زكي وكان جدع مايع عشان أمه رقاصة وصاحب كباريه و ده اللي كان عاجبك في الدور وعملت معايا بروڤة أداء عليه وعلى مياعته وكان عاجبك".
واختتم: "راجع نفسك يا صديقي قبل إلقاء قنابل تزعل زميلك منك، و معلش إني رديت بالشكل ده ولكن لا بد من الرد للتوثيق، كلامك كان لازم يترد عليه وكل سنة وإنت طيب و أسرتك الكريمة بخير و لو إنت ترفض تقديم دور الشاذ فأنا قبلك أرفض أخرجه".
النجم طارق لطفي، خلال ظهوره في برنامج "حبر سري"، مع الإعلامية أسماء إبراهيم، كشف خلال اللقاء عن سبب رفضه تجسيد دور "الشاذ" في مسلسل "كلام على ورق" للمخرج محمد سامي.
وقال طارق لطفي: "رفضت الدور بسبب عائلتي، أنا كنت موجود من البداية قبل كتابة ورقة واحدة من المسلسل، وكنت ببني الشخصية مع محمد سامي بطريقة مختلفة، إن هذا الشخص مش شاذ، لكنه يمثل الحكاية دي لأنه صاحب كباريه وبسبب طبيعة وظيفته".
وأضاف: "واللي اتكتب غير كده، وخفت جدًا واستشرت مراتي وأولادي وأمي لأن كل ده يمسهم بشكل أو بآخر، وفي الآخر قررت اني مش هعمل كده".