صديق «عاطف سعيد» بعد وفاته: «مات بحسرته»

كتب الفنان الشاب عمر غانم، بوست عن الفنان عاطف سعيد، الذي رحل عن عالمنا، منذ قليل، يروي من خلاله تفاصيل أخر مقابلة معه، وذلك من خلال حسابه الرسمي عبر موقع التواصل الاجتماعي للصور والفيديوهات " فيسبوك".
وكتب قائلاً: "كنت كل ما أعدي من جنب قهوة صدفة، اللي جنب المعهد كنت ألاقي عم عاطف قاعد لواحده مهموم، كان أول ما يشوفني يقول لي تعالى أقعد أشرب معايا شاي، أقعد معاه يقعد يشتكي ليا من قلة الشغل، ويحكي ليا قد إيه هو بيحب الفن ومش عارف يعمل حاجه غيره، رغم ظروفه الصحية والمادية الصعبة، ويقعد يحكي ليا عن مواقف ووعود كذابة بياخدها من نجوم كبار".
أقرأ ايضا وفاة الفنان عاطف سعيد
وتابع: "كان عايز ينزل تصوير بأي شكل، وكانت آخر مرة شوفته كانت من حوالي أسبوعين، كنت في تصوير ولقيته هو وابنه اللي ربنا يتولاه من بعده، في اللوكيشن بالصدفة فبسأله بتعمل إيه هنا يا عم عاطف، رد وقال لي جي أسعى وأقابل المخرج والنجم فلان، علشان كان قايل لي إنك معايا في المسلسل اللي جي وقال لي يا عمر، أنا ممكن أعمل زي ناس كتير، وأنزل بوست وأطلب شغل وأعمل زي كل الي بيعملوا كده النهارده، لكن كرامتي متسمحش لي اعمل كده".
وأضاف "اللي مزعلني بجد إنه كان مكلمني من أسبوع، وطلب مني أني أروح معاه لشركة لما عرف إن صاحب الشركة صديقي، وأنا وعدته أول ما أرجع القاهرة هكلمه، ونروح سوى وسبحان الله كان في بالي امبارح إني أكلمه وأقول له إني راجع خلال يومين لكن ربنا افتكره".
واختتم: "عم عاطف كان راجل محترم ومكافح، وعنده عزة نفس كان فنان جميل، وقدر يعلم معانا بمشاهد بسيطة، لكن أثبت وجوده بيها وطول ما أنا معاه كانت الناس لما تشوفوا تجري تتصور معاه وكان يبقى فرحان أوي، الأستاذ عاطف مات بحسرته لكن راح لربنا العدل".
وأعلن الفنان محمد العمروسي، وفاة الفنان عاطف سعيد، منذ قليل، دون الكشف عن موعد ومكان الجنازة، مطالبًا من جمهوره بالدعاء له بالرحمة والمغفرة.
يشار إلى أن عاطف سعيد شارك في العديد من الأعمال الفنية منها، حديث الصباح والمساء، الليل وأخره، فيلم الجزيرة، مسلسل آدم، الخواجة عبد القادر، ومسلسل ابن حلال مع الفنان محمد رمضان.