حتى لا ينكسر الكوب !

مصرية أنا

من فترة اتشرخت عندى كوباية.. مش أى كوباية.. ولكن المفضلة عندي.. لونها صحيح أبيض شفاف لكن حروفها ذهبية رقيقة ثمينة.. واستحملت كتييير اوي.. وعشان هى جامدة شوية وإزازها سميك فكملت استعمالها.. وفى كل مرة كنت أحط فيها حاجة سخنة أبقى حذرة وخايفة عليها ومتوقعة إنها هتتكسر وتنزل ميت حتة.. بس ألاقيها صامدة ومكملة.. ومستحملة وزى الفل.. لدرجة إنى نسيت شرخها تماما.. وقلت خلاص هى جامدة والشرخ مش مأثر فيها.. ولا علم عليها.. ولانه من جوه فمش هيجرالها حاجة.. وإديت الأمان .. وبقيت أتعامل معاها عادى خالص.. ونسيت ضعفها تماما..
واعتمدت على أصالتها وقوة تحملها.. وتمردها على الانكسار ورفضها الاستسلام ..!..
لغاية لما فجأة !. وأنا بحط الشاى سمعت صوت الشرخ بيزيد.. وارتفع الصوت اكتر واكتر.. فكرت بسرعة الحق أحطها فى طبق او اتصرف اعمل اى حاجة لكن مالحقتش أنقذ الموقف.. وهوب.. الكوباية تحولت لفتافيت.. وبهدلت الدنيا..!
عارفين.. أهى الكوباية دى بالظبط بالظبط شبهنا وشبه علاقاتنا.. فكرة أنك تجرح حد وتلاقيه مستحمل ومكمل ومتعايش ده مش معناه ان جرحه زال .. بالعكس الجرح جواه بيكبر وانت مش واخد بالك.. ومع الوقت وتحاملك عليه ممكن ينفجر ف وشك.. فكرة إنك تظلم حد وتتصور إنه نسى أو إن الموضوع هيعدى ببساطة وان الدنيا عادية وطبيعية.. طبعا غلط تماما.. بالعكس اللى ظلمته هيفضل فاكر ومنتظر منك العدل والإنصاف.. أما حكاية ان الناس بتسامح وبتنسى ده كلام جميل نقراه فى الكتب او نسمعه على لسان الوعاظ والدروس النظرية فقط!..
حتى لا ينكسر الكوب.
رفقا !.