سلوى خطاب تتصدر التريند بلقائها في «كلام الناس».. فكريني لما تتجرجري من شعرك

حلت الفنانة سلوى خطاب، ضيفة ببرنامج "كلام الناس" المذاع عبر فضائية "إم بي سي مصر"، ومن المعروف عنها تصريحاتها الجريئة، فقد أثارت الجدل بلقائها مع الإعلامية ياسمين عز، والمعروف عن الأخيرة تحيزها للرجل بشكل كبير، وذلك خلال تصريحاتها ببرنامجها، حيث صدمتها سلوى خطاب على الهواء بعدد من التصريحات النارية والتي نستعرضها لكم:
صدمت سلوى خطاب، ياسمين عز خلال حوارها بالبرنامج قائلة: "عمتي كانت هتطلق عشان قالت لجوزها اقلع الجزمة وهي بتمسح، وأنا عارفة إن الكلام ده ضد ثوابتك".
وأضافت: "إحنا قولنا لعمتي مينفعش تطلقي عشان موضوع بسيط زي ده"، متابعة: "زمان العلاقات كان فيها مراعاة لظروف الطرفين مش كل واحد يبيع التاني بسرعة".
وروت سلوي خطاب ل ياسمين عز قصة تخص إحدى صديقاتها قائلة: "ليا واحدة صاحبتي لها آراء عكس آرائك كده وطول اليوم المرأة وحقوق المرأة والكلام ده".
وأضافت سلوى خطاب: "قولتلها أنا مستنية أشوفك متجوزة عشان أشوفك متجرجرة من شعرك، وفعلا حصل اتجوزت واتجرجرت في الريسيبشن من شعرها".
من جانبها، قالت ياسمين عز: "أنا ضد العنف، ولكن أنا مع أن كل طرف يمشي الأمور دون تعقيد أو مشاكل".
وتابعت سلوى خطاب: "الراجل مش مطلوب منه حاجة غير شغله وإنه ياخد باله من بيته"، وبدورها عقبت ياسمين عز: "الراجل مش لازم يعمل مجهود عشان يكون جميل.. هو جميل لوحده".
وحذرت سلوى خطاب ياسمين عز، قائلة: "كفاية رومانسية والنبي وابقي فكريني لما تتجرجري من شعرك"، لترد الأخيرة: "لا أنا لا أقبل ده عليا أو على غيري".
وكشفت الفنانة سلوى خطاب، سر حفاظها على رشاقتها، موضحة: "كنت مع الفنانة العظيمة هند رستم، كنا في مهرجان، سألتها عن سر رشاقتها هي وجيلها، ردت عليا قائلة: كنا بنلعب رياضة وبناخد تدريبات رقص، وكنا بنحرم نفسنا من الأكل، أنا مكلتش رز إلا بعد ما اعتزلت".
وأوضحت: "ساعات بسيب نفسي للأكل، لكن هما 3 أو 4 كيلو، مش بسيب نفسي أكتر من كده، لأن لو الوزن زاد عن كده هيكون في صعوبة إن أحاول أرجع تاني".
وردت الفنانة سلوى خطاب، على اتهام البعض لها بأنها عدوة للرجل، قائلة: "معرفش الاتهام جه منين، يمكن الستات طلعوه عليا عشان يوقفوا سوقي".
وأضافت: "مينفعش حد يعادي حد.. مش ممكن يكون في عداء، المرأة زي الراجل، أنا بعامل بني آدمين، اللي يهمني البني آدم شكله إيه أو البني آدمة شكلها إيه".
وأكملت: "أنا بحس إن الست المصرية شايلة مهام كتيرة قوي، مطلوب منها فوق طاقتها أكثر من الرجل".
وتحدثت الفنانة سلوى خطاب عن شخصية صباح التي قدمتها في مسلسل "نيللي وشريهان"، والتي أصبحت تستخدم تريند على السوشيال ميديا.
وأوضحت سلوي خطاب: "أنا في الحياة العامة كنت بقول الجملة الشهيرة للشخصية (أنا ست مؤدبة بس هما اللي بيستفزوني)، ولما اتعرض عليا الشخصية اقترحت على المخرج إن إحنا نضيف الجملة في المسلسل ووافق".
وأكملت: "دلوقتي كل حد عاوز يلقح على التاني بيحط صورتي، أنا مش بشغل نفسي قوي بحكاية التريند، وكان يوم أسود لما اخترعوا التريند".
اقرأ أيضا: سلوى خطاب: بحب مهرجان الأقصر وسعيدة بتكريم زملائي| فيديو