أحيت الإعلامية رضوى الشربيني، الذكرى الأولى لوفاة والدتها، التي رحلت عن عالمنا في مثل هذا اليوم من العام الماضي. ونشرت رضوى الشربيني صورة تجمعها بوالدتها الراحلة، عبر حسابها الرسمي بموقع تبادل الصور والفيديوهات القصيرة انستجرام، معلقة عليها: "عدت سنة، سنة على فراقك يا أمي، سنة كاملة من غيرك، اكتشفت فيها أنا قد إيه بحبك، وقد إيه أنا من غيرك مش أنا". وأضافت: "صحيح أنتِ علمتيني أعمل حاجات كتير وأنتِ عايشة، بس ما علمتنيش إزاى أعمل كل الحاجات دي من غيرك، فراقك وجع ملوش دوا، غير بالصبر، ووجودك محدش هيملى مكانه". وقامت رضوى الشربيني بالدعاء لوالدتها الراحلة قائلة: "ربنا يرحمك ويغفر لك، ويجعل أعمالك الصالحة في ميزان حسناتك يا حبيبتي، ويجمعنا بيكِ في الجنة، وحشتيني". View this post on Instagram A post shared by Radwa El Sherbiny (@radwaelsherbiny) وانهارت رضوى الشربيني، في أول حلقة لها على الهواء مباشرة بعد رحيل والدتها العام الماضي ودخلت فى حالة بكاء حادة، وذلك فى حلقات برنامجها "هى وبس" المذاع على قناة "سى بى سى" سفرة. وقالت رضوى، خلال مقدمة البرنامج: كان عندى كابوس لمدة 50 يوم، مش قادرة ومش عاوزه أتكلم عن تفاصيله دلوقتى، أتكلم عليها لما اقدر أتكلم عليها هتكلم عليها، لكن إحنا كان لازم نطلع، لأن عندنا رسالة، والرسالة دى لازم نكملها، كمان كان لازم أطلع عشان أنا هى هى نفس الست اللى قعدت 5 سنين تقولكم إن مع العسر يسرا، وإن مهما حصل ومهما الواحد مر بحاجات مش كويسه، لكن ربنا موجود. وأضافت رضوى: "اختبار صعب، والحياة امتحان، كل واحد فينا عنده امتحان شكل، وكل واحد فينا بيمتحن قدر استطاعته، لكن أنا هى هى الست اللى كانت بتقولك هتعدى، وأنا كمان متأكدة إنها هتعدى، بالصبر والدعاء والصلاة هتعدى، وأنا طالعة النهاردة رغم إن كان عندى الاختيار إنى مطلعش وإنى استنا لحد بعد رمضان، بس أنا صممت إنى أطلع، عشان زى ما بشجعك أنا كمان بشجعنى". وتابعت رضوى: "كم الدعوات الكتير لأمى وهى عايشة وهى ميتة، لو كنت عملت فلوس كتير أو بقيت ملكة الدنيا مكنش هيحصل، ناس كتير وقفت جنبى أهلى وأصحابى أشخاص ربنا سخرهم عشان يكونوا حزء من اليسر، إحنا بشر وكل واحد بيحصلوا حاجات لازم يصبر عليها ويستحملها حتى لو كان العقل مش مستوعبها والقلب مش مستحملها، لكن ربنا قال وبشر الصابرين، فإحنا لازم نقول الحمد لله ونصبر".