عمر كمال: "أنا مع النقيب ومضيت إقرار أني مش هاقول كلام خارج"

أكد المطرب عمر كمال، أن "نوعية أغاني المهرجانات هي الامتداد الطبيعي للغناء الشعبي المصري"، مستكملا: "الأغاني دي الامتداد الطبيعي ل(السح الدح امبو) و(سلامتها أم حسن)".
وأضاف كمال، خلال لقائه في برنامج «الحكاية» للإعلامي عمرو أديب، "الست أم كلثوم كانت بتقول (أغدا ألقاك) والأستاذ أحمد عدوية كان بيقول (السح الدح امبو) وباع مليون نسخة وكسر الدنيا ب"زحمة يا دنيا زحمة" و(بنت السلطان)".
واستكمل: "يا جماعة ده في كل عصر مش إحنا بس.. الأستاذ عبد الحليم حافظ كان بيروح كازينو الليل يسمع أستاذ أحمد عدوية، وكان بيخليه يسمعه أغانيه".
وتابع عمر كمال: "أنا مع الفنان هانى شاكر في كلامه بأن لازم يكون في تقنين لكلمات المهرجانات ولكن لازم يكون في احتواء لمطربى المهرجانات ويتعمل شعبة مؤدى مهرجان زي ما في شعبة لمطربى الراب".
وأضاف عمر كمال: "أنا اتوقفت 9 شهور قبل كده اتعلمت فيهم الأدب بسبب لفظ في أغنية بنت الجيران، ورغم اني عملت أغاني حققت ملايين المشاهدات على اليوتيوب مقدرتش أمسك فلوس من الغناء اللايف، ولكن خلاص مضيت إقرار في النقابة بأني مش هاقول أي كلام خارج وأى أغانى أعملها بعرض كلماتها الأول وأخد موافقة عليها".
واستكمل عمر كمال: "لازم الفنان هانى شاكر ونقابة المهن الموسيقية تخلى شعبة لمطربى المهرجانات وتكون في تصاريح لهم بالغناء وتكون فيه موافقة على كلماتها قبل الغناء ووقتها هيخافوا يقولوا ألفاظ عشان ميتمنعش من الغناء، وحمو بيكا لازم ياخد تصريح مؤدى مهرجانات".
وأضاف: "لازم تقنين أوضاع مطربي المهرجانات، دلوقتي مفيش اعتراض على المزيكا، وعايزين كلام كويس، يبقى نقنن الموضوع، هتقولوا أصوات، هقولكم طيب ما أنتوا أجازتوا الراب.. الثقافات اتغيرت ولازم نتقبل ذلك، كل جيل وله مزيكته وشكله".
وأصدرت نقابة المهن الموسيقية، قرارا، بمنع 20 مغني مهرجانات من الغناء أبرزهم: حمو بيكا، حسن شاكوش، كزبرة وحنجرة، مسلم، وغيرهم.