مصطفى متولي يكتب: «شوية نجاح على مايه بيضا»

الخُلاصة

"كورس التنمية البشرية ب50 جنيه.. هندلك عَلِى طريق النجاح من هنا.. اتحرك أنت مش شجرة وهنعرفك إزاي تحقق المستحيل"..
النجاح مش سهل ولا بسيط ولا عبارة عن كورسين تنمية بشرية وشوية نصائح كده قالها كام واحد مشهور وشوية بوسترات عَلِى الفيس بوك و"ايڤيت" حضره المئات من الشباب فاكرين أن النجاح سلعة ممكن تشتريها.. أو النجاح مشروب هتشربه وهتبقى ناجح ومؤثر خلال يومين.
الفكره بكل بساطة إن مفيش حاجة بتيجي عَلى الجاهز.. يعنى أي نجاح لازم له عوامل زي المثابرة والاجتهاد والتعب والتعلم المستمر والحاجات الكتيرة أوي اللي بتسمع عنها ومكسل تعملها وبقالك سنين قاعد أنت وصحابك بتفكروا في مشاريع وتسرحوا بخيالكم اللي بتفوقوا منه عَلِى صوت القهوجي "الحساب يا رجالة".
بس المشكلة مش في كل اللي فات ولا كورسات التنمية البشرية اللي اغلبها ملهوش أي لازمة ولا النصائح اللي عمال تتفرج عليها في فيديوهات على اليوتيوب "كيف تصبح ثريا في أسرع في وقت".. و"10 أسرار للنجاح تعرف عليها"..
أسرار النجاح مش 10 زي الفيديو اللي بتتفرج عليه ما بيقولك.. أسرار النجاح مختلفة من شخص لشخص.. حتي أنت لو قررت واتحرك هيكون ليك أسرارك الخاصة و "خلطتك السحرية" اللي تقدر تحكي عنها فيما بعد.. مثلا أسرار النجاح عند الأمريكي إيلون ماسك الرئيس التنفيذي لشركة تسلا ومتصدر قائمة أغنى أغنياء العالم بثروة ضخمة.. تختلف خالص عّن جيف بيزوس مؤسس أمازون.. مختلفين من محمد صلاح لرونالدو لميسي.. مختلفين من أحمد زويل لمجدي يعقوب..
باختصار عوامل النجاح مختلفة من شخص لشخص.. وممكن تستفيد وتتعلم منها.. بس خليك فاكر كل واحد عاش تفاصيل ومشاكل وسهر أيام واتعلم واشتغل على نفسه.. كل واحد قرر يكون ناجح بدأ من نفسه وأتحرك وطلع من "منطقة راحته" اللي هي بالمناسبة مشكلة ناس كتيرة جدا.
"منطقة الراحة" اللي بتخليك قاعد مكانك مبتتحركش مستني تسمع نصائح النجاح وتقول "يااه لو تيجي الفرصة بس".. الفرصة دي محتاجة سعي.. ومش هتجيلك أول ما تتخرج وتستلم الشهادة.. هتجيبك لما تلاقيك جاهز وبتدور عليها مستعد بأدواتك الحقيقة اللي تنفعك في ظل التطور الرهيب الحاصل في العالم كله.. مش كورسات تنمية بشرية ب50 جنيه...
السعي والتعب ده اللي وصل صلاح أنه يبقى أسطورة في ليفربول أنه يبقي جاهز ومستعد للفرصة لما جت.. التعب والاجتهاد والالتزام خلى رونالدو في السن ده بيجري في الملعب وبيجيب أجوان.. وأنت بقالك سنين عاوز تاخد الخطوة علشان تشترك في "الجيم"
الخلاصة.. "النجاح مش بالساهل.. فخليك جاهز علشان الفرصة مش هتستناك تجهز"