عايدة رياض تكشف أسباب قبولها الزواج من محرم فؤاد رغم فارق السن

كشفت الفنانة عايدة رياض، عن أسباب قبولها الزواج من المطرب محرم فؤاد رغم فارق السن بينهما، وسرعة الارتباط، قائلة: "ساعة ماوافقت عليه كنت في الوقت ده مرتبطة بحد تاني وكان فيه مشاكل تتعلق باختلاف الأديان فحبيت أغيظه".
وأضافت الفنانة عايدة رياض في لقاء خلال برنامج "كلمة أخيرة" عبر شاشة "ON" قائلة: "حبيت أغيظه كان ارتباط وكنت صغيرة وعندي 19 سنة وتزوجته".
وتابعت عايدة رياض: "عملت خطوبة عشان أغيظ بس مشي الموضوع ومعرفتش أفلفص واستمرت زيجتنا 12 عاماً وهي أطول زيجة له".
وأوضحت أن سبب طلاقها أنها رغبت في العودة للعمل قائل: "وعدني في الأول أني أمثل وبعد كده قالى لا مش عايزني اشتغل وأنا مخلفتش وقاعدة في البيت زهقت وأنا واخدة على الحركة وبلعب جمباز وبرقص وفرقة ومسرح.. قعدت بعد الزواج 8 سنوات في البيت وبعدين رجعت الشغل بأعجوبة وبعدين حصل الطلاق لأنه خيرني بينه وبين الشغل".
وعن عودتها للعمل بعد أربعة سنوات من زواجها؛ قالت: "قابلنا يونس شلبي بالصدفة في لندن كان بيسلم على محرم فؤاد وقله هعمل فيلم من إنتاجي وأنا قلت له خذني معاك ومش هاخد فلوس".
وواصلت: "بعد رجوعي مصر يونس شلبي كلم محرم وكان محرم بيحبه فوافق عشان يخلص من زني".