حسن شاكوش ورضا البحراوي: «الموضوع اتحل على خير»

وجه حسن شاكوش ورضا البحراوي، اعتذار عبر مقطع فيديو على موقع التواصل الاجتماعي "فيس يوك" عبر الحساب الرسمي ل"شاكوش".
وقال "شاكوش" في المنشور المرفق بالفيديو: "احنا بنتأسف للجمهور الغالي علي اللي صدر مننا، والحمد لله الموضوع اتحل علي خير، وأحنا تحت أمر نقابة المهن الموسيقية والأستاذ هاني شاكر".
وتابع في منشور آخر" اعتذار رسمي من النجم رضا البحراوي لجمهور حسن شاكوش واهل حسن شاكوش ولاد منطقتي بولاق الدكرور بلدي واهلي وجميع محافظات مصر و بعتذر لي بلدي التانيه طنطا"
يذكر أن مجلس نقابة المهن الموسيقية، قد قرر وقف تصاريح الغناء لمدة شهر يبدأ من تاريخ القرار لكل من حسن شاكوش ورضا البحراوي وعدم مزاولتهما الغناء طوال مدة الوقف، لما بدر منهما من تنمر وتبادل كلمات أمام الجمهور.
وأكدت النقابة، أن ما حدث يحط من قيمة الفن المصري الذي ظل طوال عقود طويلة هاديا للقيم والأخلاق ولم يكن أبدا داعما لإهدار الأخلاق والفضيلة، وتأتي مثل هذه الممارسات من البعض الذين لا يستشعرون قيمة فضل الله عليهم في مقابلة جمهور له كافة الحقوق في تلقي ما يسمو بهم لا ما يحط من قدرهم.
وتدعو النقابة جميع الفنانين وحتى المؤديين للمهرجانات التمسك بمسؤلية الكلمة والأخلاق، مشددة على أنها لن تتوانى عن دورها في الحفاظ على قيم المجتمع الراسخة والرصينة.
وكان مصدر من نقابة الموسقيين، قد علق على واقعة التراشق بين المطرب رضا البحراوي ومؤدي المهرجانات حسن شاكوش عبر صفحاتهم عبر موقع التواصل الاجتماعي.
وقال المصدر في تصريحات صحفية: "حتى الآن لم يصلنا أي شكوى من أطراف الأزمة حسن شاكوش أو رضا البحراوي، وفي حالة وجود الشكوى يتم تحويل الطرفين إلى تحقيق إداري".
وتابع: "ما حدث مكانه أقسام الشرطة، والشق الجنائي يتم نظره أمام النيابة العامة، وذلك في حالة لجوء أحد لها، أو تقديم محضر عن الواقعة، ولم يحدث ذلك حتى الآن".
بداية الأزمة عندما وقعت مشادة قوية ومشاحنات بين حسن شاكوش، ورضا البحراوي وفرقته، وذلك في الحفل الذي أقيم مساء الجمعة الماضي بالساحل الشمالي، مع صعود حسن شاكوش، في حضور فرقة المطرب الشعبي رضا البحراوي، وبعد شد وجذب غادر الأول مكان الحفل، وصعد البحراوي إلى المسرح وقال: "شاكوش فين.. مشي.. كنت عايزه والله.. بس للأسف خد بعضه وجرى.. عايزه يدعي ل حمو بيكا".
وروى رضا البحراوي تفاصيل تلك الواقعة، ووجه عدة رسائل له ولنقابة المهن الموسيقية عبر بث مباشر على صفحته ب«فيسبوك» وهو ما سنرصده في النقاط التالية..
- حسن شاكوش كلمني عشان كان عاوز يعمل دويتو معايا وأنا لم أوافق.
- كان عندي حفلة في الساحل وكان موعدها الساعة 4 وحسن شاكوش طلع في معادي وأنا أعمل ب40 فرد ضمن فرقتي الموسيقية يعني بغني طرب مش على فلاشة.
- صاحب الحفلة كلمني قالي معلش يا رضا، حسن شاكوش هيقول أغنيتين بس وهينزل، وأنا قولتله ماشي براحته، والحفلة كانت مبنية على أساس رضا البحراوي وأهان فرقتي على المسرح وطالبهم بالمغادرة أثناء غنائه.
- كرامة فرقتي من كرامتي وقولتله أنا برد عليك بفني والمايك وحاول عدد من المقربين بيننا التوسط للصلح بيننا.
- تفاجئت بعدها أن حسن شاكوش في حفل له منذ ساعات قام بسبي أنا وأمي ووالدي وبيتي وأنا محترم وعندي استعداد ارد عليه ولكن مش هرد عليه بلفظ غلط عشان جمهوري اللي بيحبني.
- قال رضا ل"شاكوش": انت مش محترم وأقل من أني أرد عليك فأنا أعمل هذه المهنة وأمسك المايك قبل ولادتك.
- أوجه رسالة لنقابة المهن الموسيقية: أنا راجل نقابي وفرقتي نقابية وبدفع مثل أي عضو فيها ونحن بلد لها قانون وهيجيبلي حقي بعد شتيمة أهلي جهرا أمام الجميع.
- الناس اللي هترد عليك يا شاكوش وتسجيلاتك وأنت بتطلب دويتو معي هنزلها على صفحتي عشان الناس تعرف مين رضا ومين شاكوش وأنا مش بخاف إلا من الله والقانون وبلدي هيجبولي حقي.
من جانبه هاجم حسن شاكوش، الفنان رضا البحراوي، بعد حديث الأخير عن تعرضه للسب هو وأهله في الساحل الشمالي على لسان شاكوش وروى حسن شاكوش تفاصيل تلك الواقعة، موجها عدة رسائل له عبر بث مباشر على صفحته ب«فيسبوك».
وتتمثل الأزمة في فقرات غنائية ل«شاكوش» بالساحل الشمالي لكنه فوجئ أثناء الصعود على المسرح بوجود فرقة البحراوي، قائلا: «الأصول كل واحد ياخد حقه».
وأضاف: «بلغت مرة واتنين وتلاتة وفرقة رضا البحراوي على المسرح وأنا بغني هما كانوا بيحضروا وسامع أصواتهم خلفي ودة مينفعش وبعد ما خلصت الأغنية قولتلهم لو سمحت مش عاوز أشوف حد على المسرح والفرقة نزلت».
وتابع: «حد من الفرقة شتمني وعملوا حركة كأنهم بيزفوني وأنا نازل وأنا أما شفت دا أنا حر من بولاق الدكرور أما بشوف الغلط مش بعرف أسكت أنا عندي 12 مليون متابع على صفحتي وأنا مقدرش أغلط وأقول حرف فيه غلط».
ومضى في هجومه: «بعدها رضا البحراوي طلع قال: هو شاكوش فين هو هرب الصراحة كان نفسي فيه، ولكن أنا مجرتش أنا خلصت نمرتي وروحت بيتي».
ثم أكمل حديثه: «رضا البحراوي بيقول إني قمت بسب أهله ولكني بقول لم أقم بذلك لأن والدته في مقام والدتي لأنها من مقام أمي وأنا بقول أفيه في فيلم (حين ميسرة) وقولته في حفلة والناس رددته خلفي ولم أتطرق لسيرة رضا البحراوي».
وقال: «أنا مع كلام رضا البحراوي إن مفيش حد فوق القانون وكل واحد ياخد حقه لو هتبص على الغلط يا رضا فا أنت الغلطان وأنت اللي قولت عليا إني جريت».
وتابع: «انت قولت أنا بتصل بيك عشان عاوز أعمل دويتو معاك وهذا غير صحيح وهو لما تقول هو شاكوش فين أنا نفسي فيه هو دا الفن من وجهة نظرك.. انت قولت يا رضا إنك بتغني قبل ما أنا أتولد، فأنا عاوز أقولك بالأرقام: أنا قناتي 2 مليار مشاهدة عشان أنت بتتكلم على التاريخ وأنت بتغني قبل ما أنا اتولدت، أنت لو طلعت البطاقة هتلاقيني أكبر منك يا رضا وبحقق أرقام لو اشتغلت طول عمرك ولحد ما شعرك يبيض مش هتعرف توصل بس لنجاح بنت الجيران بس».
ثم أضاف: «أنا بطلع أغني شغلي مثل "وداع يا دنيا وداع" و"أشكرك" و"حبيبتي" و"بنت الجيران" لكن أنت ملكش أغاني بتغني أغاني مش بتاعتك وأنت ملكش "cv" وأنت بتاخد عالجاهز وأنا مش بطلع أتكلم على تاريخي وعلى نجاحي والجمهور هو اللي بيقيم مش الجمهور وتعبنا لحد ما نجحنا.. أنا اشتغلت مع نجوم كبار مثل أحمد سعد ، فبالتالي هغني معاك إزاي وياريت تطلع المحادثات اللي بينا اللي بطلب فيها الغناء معاك.. البلد فيها قانون فعلا زي ما بتقول وأنت اللي قولت: "هو فين حسن شاكوش أنا كان نفسي فيه".. وأنا مجبتش سيرتك».
واختتم حديثه بالقول: «لو على التاريخ والأرقام تعالى نشوف أرقام مين أكتر وأعلى أنا أغنية بس من بتوعي "بنت الجيران" حققت 700 مليون مشاهدة بتاريخك كله ومش بغني أغاني حد».