«عبد الحفيظ» عن لقطة هدف الأهلي غير المحتسب: «ارجعوا لعلم التشريح»

تحدث سيد عبد الحفيظ مدير الكرة بالنادي الأهلي، بعد التعادل سلبيًا مع طلائع الجيش.
وقال سيد عبد الحفيظ، في تصريحات لبرنامج "الماتش"، الذي يقدمه الإعلامي هاني حتحوت، عبر شاشة "صدى البلد": "الحمد لله على اللي حصل، سبق وقولت قبل كدة مينفعش نلوم إلا نفسنا، مش بدي مبررات لكن بقول حقائق، لو ليا حق أخده".
وأضاف: "في شاشة إعادة، دي كورة، مش مقتنع إنها صعبة تتحسب، في حاجة اسمها علم التشريح، شوف الكورة والصورة، لما الرجل الثابتة تكون على الجول تبقى الرجل التانية المفرودة جوة".
وواصل: "مستحيل تبقى الرجل الثابتة على الخط وتبقى الكرة معديتش الخط، أنت أكيد مطلعها بوش رجلك، اضحك عليا وروح شوف الفار".
وأضاف: "تقنية الفيديو في 13 يوم ندهت الحكم مرتين فقط، انده للحكم وخليه يشوفها واضح عليا، لكن شوف كل الأسابيع الماضية أي جول بنجيبه حتى لو سهل، الحكم بيروح أو يقف يستنى يتأكد دقائق من صحة الهدف".
وأردف عبد الحفيظ: "هات الحكم قوله، دي مش مبررات، مفيش واحد عنده أي نوع من العقل والمنطق يشوف في مباريات كتير جدًا أنك متستدعيش الحكم للفار في حالة جدلية زي دي وتشوفها كويس".
واستكمل مدير الكرة بالأهلي: "أنا في أفريقيا لعبت 5 أو 6 مباريات بالفيديو، في 4 مباريات الفار نصفني، لكن في الدوري محصلش ومش بيستدعيه".
سيد عبد الحفيظ واصل تصريحاته: "اللي يزعلك أن كابتن محمود بسيوني حكم الفيديو متأكد قوي أنها مش هدف رغم أنها جدلية، في مباراة زي دي ومرحلة زي دي تعالى شوفها واديني حقي".