هالة صدقي تروى موقفين ل«سمير غانم» و«الزعيم» للرد على منتقدي حفل «الجونة»

ردت الفنانة هالة صدقي على منتقدي الفنانين الذين حضروا حفل زفاف أمس بعد مشاركتهم في جنازة الفنان القدير سمير غانم.
وكتبت هالة صدقي عبر صفحتها بموقع التواصل الاجتماعي "فيسبوك": "زي ما العزاء واجب الفرح كمان واجب، الفرح يوم في العمر وخصوصا لو حد عزيز عليه جدا ومنتظر أشاركه اللحظة دي، المعروف جدا أن أي فنان وأولهم الفنان سمير غانم وينزل يعرض ويضحك ويسعد جمهوره لكن قلبه من جوه كله حزن وأكبر مثال العظيم عادل إمام دفن مصطفى متولي صاحبه وجوز أخته الظهر ونزل يعرض بالليل وبعدما نزلت الستارة انهار، ومش عادل بس لا في غيره وغيره وغيره".
وأضافت: "للأسف الفنان بيبقي مطلوب منه فوق طاقته وأصحابه وحبايبه منتظرين منه أكتر، عمر الحزن ما كان باللون الأسود أو البكاء، ولاد سمير النهارده مؤكد لابسين ملون علشان مامتهم ما تعرفش باللي هما فيه هل ده معناه إنهم مش زعلانين ومقهورين على باباهم، وهي قدرات ممكن حد يقدر يتغلب على أحزانه وناس لأ، وعلى فكرة أنا مكنتش معزومة على الفرح اللي زمايلي كانوا فيه، كنت معزومة في فرح تاني خالص والنهارده كمان كان عندي فرح حد من أعز أصدقائي، كلنا عارفين الأصول أن لما حد يموت نقفل التليفزيون وبلاش مزيكا وحاجات كلنا عارفينها، لكن للأسف في ظروف خارجة عن الإرادة وبدل ما نحاسب البشر واحنا عندنا رب هو المسئول عن اللي في القلوب".
واختتمت هالة صدقي: "ندعي للزميلة والأخت العزيزة دلال عبدالعزيز، بأن ربنا يقومها بألف سلامة وترجع لبيتها وولادها وتتحمل فراقها لحبيب عمرها شكرا لتفهمكم".
شهد حفل الزفاف حضور عدد كبير من أهل الفن، الذين لم يكتفوا بالحضور فقط بل قاموا بالرقص على أغاني عمرو دياب الأمر الذى جعل الجمهور يهاجمهم بسبب عدم مراعاة مشاعر أبناء وزوجة النجم الراحل سمير غانم ليوجه لهم الجمهور عبارات عتاب ولوم ومنها : «جرحكم بيلم بسرعة أووي».