شعب ملوش كتالوج

يوميات الأخبار

الستات فى مجتمعاتنا العربية ألدّ أعداء للستات اللى زيهم.
الشعب المصرى بيثبت كل يوم انه شعب ملوش كتالوج..
- كل الناس بتشتكى على السوشيال ميديا ان مفيش حد ملتزم الا هما فى لبس الكمامة وتنزل تدوّر على الناس دى ولا تلاقيها فى الشارع، فص ملح وداب.
- احنا شعب فاكر اننا لو عملنا فرح والا خطوبة على الضيق الكورونا مش هتيجى عشان احنا قرايب فى قلب بعضينا بس بنسلخ أى حد تانى بيتجمع بأهله.
- احنا شعب اتصور مع محمد صلاح لما جاتله كورونا فوتوسيشن فى مستشفى العزل وصلاح كان باصص للعريس والعروسة من البلكونة وعملوا أحلى شغل.
- شعب ساب كل مشاكله وركز مع خناقة تامر حسنى ومراته عشان احنا شعب دمه خفيف بطبعه ومش بتعدى من تحت ايدينا حاجة.
- عندنا لما بتمشى بالعربية وتدّى اشارة يمين لازم هتلاقى العربية اللى وراك بتزنّق عليك عشان تدخل يمين قبلك كإننا فى سباق مع انك مدّيهم اشارة بس محدش هيسيبك تعدّى وكل العربيات هتكسر عليك.
- الراجل اللى بيريح مراته وبيخاف على زعلها ده اسمه فى مجتمعنا معموله عمل ومراته سحراله لكن استحالة يتقال عليهم متفاهمين وبيحبوا بعض..
- الست اللى داخلة على جواز لازم تجيب خمسميت ملاية وعشر أطقم حلل جرانيت وتيفال وطقم صينى ألف قطعة وتلتميت فوطة يا اما تبقى أمها مش مجهزاها كويس ولازم النيش يتملى على آخره كوبايات وكاسات وشفاشق وفناجين قهوة وأطقم چيلى وخُشاف عشان محدش يقول علينا حاجة.. والنيش بيتكتب عليه ممنوع اللمس مدى الحياة يعنى متفكرش فى يوم تشرب قهوة فى فنجان منه يا اما هتلاقى مراتك لمت هدومها وغضبت عند بيت اهلها..
- معروفة ان ابن خالتك لازم هتتعاير بيه فى أى مرحلة فى حياتك يعنى من أول ما تتولد لحد ما تموت هتسمع من أمك الجملة الشهيرة بتاعت (انت فرحان بنفسك على ايه؛ ما تشوف ابن خالتك....) حتى لو انت واخد الدكتوراة وابن خالتك بيفكّ الخط بالعافية لازم أمك هتلاقى فيه ميزة تعايرك بيها عشان تعلّى عليك.. ومحدش يعرف اشمعنى بتتعاير بابن خالتك مش ابن عمتك لحد يومنا هذا. بس هذا ما وجدنا عليه أجدادنا..
- احنا أكتر شعب لما بيتسئل عن عيوبه بيقول (طيبة قلبى وجدعنتى مودينّى فى داهية) ونص اللى بيقولوا كده سبب مصايب نص الكوكب.
- فى ستات بتخبّى انها حامل لحد نص التامن ولما واحدة تقولها مبروك فى الشارع تقولها ده مش حمل ده قولون مع ان اللى بتباركلها عندها 4 ولاد وحامل فى الخامس يعنى مش هتحسدها ولا حاجة!
- الراجل المصرى ممكن يتسامح معاكى فى أى حاجة الا انك ترزعيله باب العربية وانتى نازلة، كده ممكن يخليكى متعتبيهاش تانى مدى الحياة.
- احنا فى مجتمع بيسمّى البنت اللى بتتأنى فى اختيار شريك حياتها عانس على أساس ان قطر الجواز بيفوت أى بنت خلصت الجامعة ولسه متخطبتش..
- الستات فى مجتمعاتنا العربية ألدّ أعداء للستات اللى زيهم، يعنى تلاقى اللى بتهاجم أى ست على السوشيال ميديا أو فى الحياة العادية ست زيها وأكتر حد ممكن يتهم ست بالإهمال أو بالدلع ست برضه زيها.. يعنى استحالة تلاقى ست بتساعد ست تانية فى نفس المجال الا من رحم ربي..
- احنا فى مجتمع للأسف بيشوف الست اللى مش قادرة تسامح جوزها على الخيانة هى اللى غلطانة وهتلاقى أول جملة تتقال فى المواقف دى (أكيد انتِ اللى مش مريحاه عشان كده بص برا) يعنى الراجل مبيكونش عليه اللوم فى أى حاجة، الزوجة علطول هى السبب حتى لو قايدة لجوزها صوابعها العشرة شمع..
- الست المتطلقة فى مجتمعاتنا العربية للأسف بيخافوا منها وبيتهموها انها خطّافة رجالة بغض النظر عن أخلاقها وتربيتها وأكتر فئة مش بترحم المطلقات وبتسىء ليهم ستات زيهم.. مع ان الست اللى بتتطلق بتكون ليها أسبابها وفى منهم كتير أووووى اتظلموا ومحترمين أكتر من ستات متجوزة بس مبتراعيش ربنا فى جوزها..
- الأمهات عندنا بيتمتعوا بقدرات خارقة للطبيعة يعنى تبقى حضرتك مش لاقى البنطلون وبتدور عليه بقالك ساعة والحاجة تقولك (وان قومت ولقيته) فتقولها بكل ثقة: قومي... فتدبّ ايدها فى الدولاب تجيبه وهى مغمضة عنيها فلا تخرج قبل أن تقول سبحان الله! دى ظواهر احتار فى تفسيرها العلماء.
- احنا فى مجتمع لما حد بيتصل بشخص لازم الشخص ده يسمّعه موشح من نوع (انت فين يا ندل ومبتسألش ليه اخص عليك) مع انك انت اللى متصل بس بنتعامل مع بعض بمبدأ خدوهم بالصوت وبنفضل نعتذر ونبرر طول المكالمة مع اننا احنا اللى متصلين..
- احنا أكتر شعب بيدفع اشتراك الچيم وولا بيعتبه ونحسّ بعدها بسلام نفسى اننا كده عاملين اللى علينا؛ لأ وبنستنى نخس كمان عشان دفعنا الاشتراك بس واحنا بنلُغ عادى زى ما احنا..
- احنا لما بنعمل دايت بنطلب بيتزا لارج اكسترا تشيز واربع سندوتشات شاورما بس لازم معاهم بيبسى دايت.. وبنبقى مقتنعين اننا صح ومفيش جوانا أى احساس بتأنيب الضمير.
- احنا شعب لو توهنا فى الطريق واحنا سايقين، لازم نوطى صوت الكاسيت عشان نعرف نركز..
- احنا شعب لو حد تايه وسألنا على الطريق لازم نقوله (هو قالك فين؟) على أساس انه لو كان قاله يبقى الراجل هيسأل ليه؟!
- الأمهات المصريات عندهم قدرات جبّارة فى الفصال، يعنى تبقى انت هتشترى البلوزة بتلتميت جنيه وانت راضى وتلاقى الست الوالدة اتدخلت وكرمشتله خمسين جنيه، والغريبة ان البيّاع بيسكت وبيكون متراضى كمان..
- (الله أكبر) اللى بتقولها الأمهات فى الصلاة ليها معانى دقيقة جداً زى: (قوم اطفى على الحلة- وطى على الرز- ردى على التليفون اللى لسه هيرنّ- شغلى الغسالة لحد ما اخلص آخر ركعة) ولازم يصاحب التكبير زغرة بالعين وتبريقه عشان ازاى احنا مش عارفين ان معنى الله أكبر المرة دى انى أخيط زرار القميص المقطوع اللى لسه جاى من المكواة..
- الأمهات عندها قدرات لا يصدقها عقل فى انها تدفس الحاجة فى الفريزر بشكل محترف احتار فيه مهندسين العالم بحيث انها تجيب الحاجة من جوه الفريزر من غير ما كيس واحد يتزحزح من مكانه فى حين ان لو احنا اللى بنجيب الكيس ده كان كل الفريزر هيتقلب علينا..
- الست المصرية عندها قرون استشعار فلو قالتلك انها مش متطمنة لفلان صدقها واقطع معاه عشان هتلاقيه فى الآخر تاجر مخدرات أو مطلوب أمنياً وهيعكك معاه..
- احنا شعب ممكن يتلم على قنبلة وهى بتتفكك ويصورها عشان تنزل على الفيس بوك من غير ما ييجى فى بالنا ان القنبلة ممكن تنفجر ونموت وسبحان الله ربنا بيسترها معانا..
- أكتر كدبة بنقولها كشعب مصرى اننا فى الطريق خلاص لما بنكون متأخرين والصراحة اننا بنكون لسه مقومناش من على السرير وبنلحق نوصل فى معادنا عادى..
- الزوجة المصرية لو قالتلك انها مش راضية عن حاجة بلاش تعملها عشان متحلّش عليك اللعنة.. الست المصرية مخاوية وسرها باتع صدقنى..
-الراجل المصرى عنده القدرة انه يقعد على القهوة فى أى مناسبة وتحت أى ظروف؛ يعنى قبل امتحان الفاينال بيكون قاعد يلعب بولة استيميشن على القهوة.. يوم خطوبته أصحابه بيجيبوه من على القهوة.. لو فركش مع خطيبته والحزن مالى قلبه بيجرى على القهوة.. يوم فرحه قرايبه بيقوموه من على القهوة بالعافية.. لحظة ولادة ابنه البكرى بيشهدها من على القهوة وممكن حضرتك يتناقش مع مراته انهم يعملوا سبوع الواد فى القهوة وبيستغرب جدا ازاى هى موافقتش!
- الست المصرية لو زعلانة لازم لما تقولها «مالك؟» هتقولك «مفيش» ولو كررت السؤال هتقولك «ما انت لو مهتم كنت عرفت لوحدك». فلما تسمع الجملة دى خدلك ساتر واوعى تسيبها لان ده بيكون امتحان ليك أصعب من امتحان الثانوية العامة فاوعى تسيبها الا لما تقولك ايه اللى مزعلها يا اما هتعيش أيام أسود من قرن الخروب.
- احنا شعب طالع على ستاته سمعة ان الستات نكدية مع ان نكد الرجالة عندنا يكسب بس محدش بيجيب سيرة.. ربنا ما يوريك بوز راجل مراته مش فاهمة هو زعلان منها والا من مديره فى الشغل والا متنكد عشان فاته ماتش ليفربول.
- لو سألت أى حد عندنا فى الشارع على حاجة استحالة هيقولك معرفش لازم هيقولك معلومات لسه مألفها طازة وانت بتكلمه أو هيجوّد بمنتهى الثقة وهتكتشف بعدها انه لبّسك فى الحيط من كتر الفتي..
بس أجمل حاجة فى الشعب المصرى اننا ولاد نكتة بنحب الضحك وبنحب الحياة حتى لو الدنيا ملطشة معانا وبنحب نساعد حتى لو اللى معانا على القد.. قلبنا أبيض ومبنعرفش نزعل.. وهتلاقى عندنا أجدع رجالة وأجدع ستات فى الدنيا.. ومفيش عندنا أكتر من ولاد الأصول..