صور وفيديو| «بطل كل يوم».. قصص نجاح 7 أبطال وصلوا للعالمية

عرض المؤتمر الوطني السابع للشباب، منذ قليل، فيلم تسجيلي بعنوان: «بطل كل يوم» لأبطال تحدوا الإعاقة والإصابات وحققوا نجاحات كبيرة في مجالات عملهم المختلفة، ونعرض قصص نجاح هؤلاء الأبطال في السطور التالية.
محمد كيلاني
يقول محمد كيلاني، بطل ماراثون لذوي القدرات الخاصة ومهندس نظم معلومات: "أنا كنت مولود شخص طبيعي معنديش أي مشكلة، حتى حصلت لي حادثة في سنة أولى كلية، ودخلت العمليات وكنت حاسس ومدرك أني هيتعملي عملية بتر، وكل اللي حواليك شايفين القطر داس على رجلك دي حاجة ايه! ولما والدي بدأ يظهر عليه علامات الاكتئاب، وبعد 3 أيام روحت الجامعة، واتقالت لي كلمة الشباب كلها ماشية في الشارع اشمعنه أنت اللي حصلك كدا".
ويضيف «كيلاني»: "الحالة اللي دخل فيها والدي قررت أني هقوم وأكمل وأمارس حياتي عادي معنديش أي مشكلة، وأنا أول واحد في مصر يجري بطرف صناعي وأول مصري عربي إفريقي يمشي من القاهرة حتى العين السخنة بطرف صناعي في 3 أيام، وكملت دراسات عليا وشغال مهندس تكييف في بنك".
هيثم السد
أما هيثم السد مدرس وصاحب فكرة "عربية الحواديت" لتثقيف أطفال الريف المصري، فيقول: "كل اللحظات اللي مرت بيا بتقولي كمل، مفيش لحظة قالتي بطّل، وعملت عربية الحواديث، واتجول بها في القرى والعزب والنجوع والكفور، وأشحن العربية بالكتب وأوزع 68 ألف كتاب مجانا على أطفال الريف".
مريم عادل
ما مريم عادل عزب، فارسة حاصلة على الميدالية الذهبية في الألعاب العالمية للأولمبياد الخاص في أبو ظبي 2018، وتعلمت رياضات كثيرة ولعبت ألعاب قوى وتنس طاولة وآخر المسابقات الدولية التي شاركت فيها هي الفروسية، وتضيف: "أنا نجحت في ثانوي ودخلت جامعة، وأنا قوية جدا".
فرح الديباني
فرح الديباني أول مغنية مصرية وعربية في أوبرا باريس، تقول: "كنت في المدرسة الألماني في إسكندرية، وفي المدرسة كان تخصص الموسيقى مهم جدا، بجانب أن عيلتي كانوا متجهين لسماع الموسيقى، وكنت بلعب بيانو، وأغني في كورال المدرسة، حتى جاء مدرس وسمعني وقالي أنتي لازم تغني في الأوبرا، وقدمت لمدة 3 سنوات أنى أكون ضمن فريق أوبرا باريس، وكانت مسابقة عالمية فيها كل الناس بتقدم لحد ما اتخدت، وكنا 4 أشخاص ما بين 780 شخص مقدم، وأنا أول مصرية وعربية تغني في أوبرا باريس على مدار التاريخ وقدمت حفلات مختلفة ورحت الصين عملت حفلات مختلفة، ومنحوني جائزة أفضل مغنية أوبرا صاعدة لهذا العام".
منال مصطفى
أما حكاية منال مصطفى دهب، حاصل على بكالوريوس تجارة خارجية وصاحبة مشروع عربة طعام "أم دهب"، فتقول: "بصحى كل يوم 2.5 فجرا، وشغلي يبدأ 5.30 الفجر، وقدمت في كذا شركة لحد ما وصلت أني أكون في المشروع ده، مش بتكسف من شغلانة سوبر ماركت، أو ورش، ومن وقت ما وعيت على الدنيا وماما ظهرها محني عليّ، بعد ما خلصت البكالوريوس كان عيب أوى عليّ هي تكمل وأنا أبقى عبء عليها، ويومي يبدأ الساعة 11 وينتهي 4 فجرا، وبقالي 20 سنة، شقيت كتير وفرحت، لكن في الآخر جبر الخاطر على الله".
زينب مصطفى
أما زينب رمضان، مهندسة اختبارات بأكبر محطة طاقة شمسية في العالم بأسوان، تقول: "أول ما اشتغلت في هندسة الطاقة الشمسية أول حاجة سمعتها مش عاوزين بنات، طبيعة شغالي أنها بتكون في الشمس، بختبر كل الكابلات اللي في الموقع، وبختبر كل حاجة أنها مظبوطة ولا لأ، وكل كابل داخل أو خارج المحطة بعمل عليه اختبار أشوفه كويس ولا لأ".
مكتشفة علاج فيروس سي
وعرض الفيديو لقاء مع أصغر فتاة مكتشفة علاج لفيروس سي، فتقول: "أنا مريت بكل إحساس فشل ممكن حد يمر به، ولسه صغيرة، واحدة في 3 إعدادي جاية تقول فكرة علاج، وجات لي الفكرة أننا نحاول نقضى على مرض فيروس سي، ونطور من مركبات لها تأثير على الفيروس، واكتشفنا أنها تقدر تهاجم الفيروس في الكبد، وتقضي عليه تماما".
ويفتتح الرئيس عبدالفتاح السيسي، المؤتمر الوطني السابع للشباب، بالعاصمة الإدارية الجديدة، بحضور 1500 مدعو يمثلون كل فئات الشباب المصرى، إضافة لعدد من الشخصيات العامة والإعلاميين ورجال الدولة والأعمال وسفراء دول الاتحاد الإفريقى وممثلين لمؤسسات كبرى ومنظمات دولية.
كما يحضر المؤتمر، شباب من الجامعات والأحزاب والبرنامج الرئاسى لتأهيل الشباب للقيادة، والمبدعون والمبتكرون.