حكايات صحفية

بصراحة احنا مفجوعين.. أهم حاجة نحشر ونملا بطونا.. إزاي مش مهم!! آخر حاجة بنفكر فيها هيا إننا نستطعم الأكل وكمان نهضمه كويس.. كله عايز يبلع ويفَّول التنك.
في العاصمة الإيطالية روما وبدعوة من السفير إسماعيل خيرت رئيس الهيئة العامة للاستعلامات حضرت مع رؤساء التحرير مأدبة عشاء في أحد المطاعم الشهيرة بإيطاليا والتي اختارها بعناية حاتم عبدالقادر المستشار الإعلامي المتميز لسفارة مصر هناك.
الأكل في إيطاليا له أصول وقواعد وقد يستغرق العشاء ساعتين أو ثلاثة أو أربعة.. الوقت مش مهم.... أهم حاجة الأكل بالراحة، وطبعا احنا مش واخدين علي كده.. عايزين كله مرة واحدة.. المطعم يقدم العشاء علي 6 أو 7 مرات.. طبعاً عينات.. إشي سلطات وإشي بابا غنوج.. طبعاً غنوج إيطالي.. وبعدها أنواع من المكرونات اللي ما لا عين رأت ولا أذن سمعت.. أسماء غريبة.. وأنواع من المكرونة بألوان وأحجام مختلفة.. اللي أحمر واللي أخضر ثم بعدها مجموعة من أطباق البادنجان.... طبعاً البادنجان ورانا ورانا مش عاتقنا حتي في إيطاليا.. بدأنا نزهق لأننا قعدنا أكثر من 3 ساعات رغم إن الشيف سمير وهو مصري الجنسية ويقيم في إيطاليا منذ سنوات طويلة حاول يسلينا وقدم لنا مجموعة من السلطات ذات المذاق الممتاز.. لكن احنا طبعا كنا عايزين الهبر.. عايزين الطبق الرئيسي.
لم يقطع علينا الوقت سوي دخول فوج من الأجانب كبار السن ولاحظت أن الشيف سمير ابن الإيه شغال بوس ... أي واحدة في الفوج بيبوسها.
انتهزتها فرصة وقلت يا واد اقلبها دندرما.. وسألت سمير وزعقت له وقلتله : انت شغال بوس يا جدع انت وسايبنا نرن انت مابتعتقش!؟
كانت المفاجأة إن آخر سيدة قبلها جاءت بالقرب مني وقالت بلغة عربية ركيكة: أنا أصلي إيطالية ولكني عشت في مصر واتولدت في مصر... وأبويا كان جواهرجي في كوم الدكة في الإسكندرية قبل ما نسيبها من 04 سنة.. وقالت إنها تأتي للمطعم بسبب وجود الشيف المصري سمير الذي يذكرها بأجمل أيام عمرها التي عاشتها في الإسكندرية.. ونظرت إلي ضاحكة وقالت: عرفت سمير بيبوسني ليه.. لو عايز تبوسني انت كمان بوسني.. أنا بحب مصر أوي.
وأقسم بالله العلي العظيم أنا مابوستها.. بصراحة انكسفت.. وبيني وبينكم كان عندها أكثر من 07 سنة..!!
ممتاز القط