مواجهة التطرف واستغلال الدين

قراءة في المحاضر السرية «8»

عبدالناصر يقول: إذا لم نمسك البلد بشدة.. الحرب هتكون في الداخل أشرس من الحرب مع الخارج
لازم قلبنا يبقي جامد ونضرب بكل قوة وأمن بلدنا هو الأساس
الجيش لازم يحافظ علي حقه ويحاكم من ارتكبوا جرائم ضده محاكمات عسكرية فورية
حسين الشافعي يقول: الإجراءات الأمنية ضد المتطرفين يجب ألا تنسينا المواجهة الفكرية
عبدالعزيز كامل: يجب مقاومة المتطرفين عن طريق المسجد وأجهزة الإعلام
ظلت قضية »التطرف واستغلال الدين»‬ تؤرق الدولة المصرية لعقود طويلة من الزمن، وقد واجه عبدالناصر هذه الظاهرة طيلة فترة حكمه بكل حسم وقوة.
وفي اجتماع مجلس الوزراء في 28 أبريل 1968، تطرق عبدالناصر إلي هذه القضية وفتح حوارًا حولها تحدث فيه الوزراء المختصون، خاصة بعد اكتشاف بعض العناصر الإخوانية التي تسللت داخل الجيش في هذه الفترة. وفي الحلقة الثامنة من سلسلة كتب »‬ناصر 67.. هزيمة الهزيمة» التي تصدر عن المكتبة الأكاديمية، يكشف الكاتب الصحفي الزميل مصطفي بكري عن فحوي هذا الاجتماع من خلال المحاضر السرية التي حصل عليها من د. هدي عبدالناصر والتي تنشر بتفاصيلها الدقيقة للمرة الأولي.
في البداية تحدث عبدالناصر قائلًا: هو أنا كنت اتكلمت مرة علي أساس إن فيه في القوات المسلحة عملية تنظيم بالنسبة للإخوان المسلمين مسكنًا أو مسكوهم قيمة 10 - 12 يوم حصل اعترافات من الضباط وطلعت العملية الحقيقة متصلة بناس مدنيين بالذات واحد مستشار فين؟
وقال أبو نصير (وزير العدل): مستشار مساعد في دار القضاء الحكومي.
وقال عبدالناصر: وهو اللي كان محرض يعني هم الأولاد كانوا الأول عملية دين وبتاع ولكن هو اللي حرض علي عمل اغتيالات وعمل تنظيم في الجيش وإدي فتاوي وقال لهم يعني إن أنا ممكن أعمل دستور مؤقت في نص ساعة ونعمل مش عارف إيه وكلام من هذا الشكل طبعًا علي ما قالوا علي أسامي الناس المدنيين يظهر الراجل عرف إن اتقبض عليهم فاختفي.
وقال أبو نصير: بقاله أسبوع مختفي.
وقال عبدالناصر: وهو قال إن معاه ناس.
وقال الفريق محمد فوزي: 3 مدنيين.
وقال عبدالناصر: نعم؟
وقال الفريق محمد فوزي: 3 مدنيين آخرين.
وقال عبدالناصر: لا.. هو قال في كلامه مع النائب إن معاه 15 واحد ومستعدين يقوموا بعمليات اغتيال وطبعًا الكلام كله إن الفساد والناس ومش فاهم إيه والبارات والكازينوهات والنسوان اللي بيمشوا بالليل وابتدت العملية في ضرب البارات ورمي القنابل، الضابط ده كان قبل كده كان فيه الإخوان المسلمين وكان في عملية قنابل سنة أظن 51، والمستشار ده كان قبض عليه في محاولة الاغتيال اللي عملوها الإخوان سنة 54، كان محامي وبعدين اتساب وبعدين دخل الحكومة الولاد اتكلموا يعني قالوا علي الضباط.
طبعًا هي العملية فيه تبليغ عنها من الأول من أول ما ابتدي الكلام علي
هذا الشكل أول ما طلع عنهم شكل صلاة وبس حصل تبليغ وكان الحقيقة أنا قلت للفريق فوزي تخلص العملية قبل مايتسعوا ونجيب ناس اكتر بدون داعي هم اللي أتمسكوا أظن 9 ضباط.
وقال الفريق محمد فوزي: 9 ضباط و3 و4 مدنيين والضابط اللي في المعاش.
وقال عبدالناصر: آه.. الحقيقة بالنسبة لعملية الجيش يعني هم كانوا كلموني وقالوا لي إن الجيش يباشر العملية ولاّ نديها للنيابة؟ أنا قلت الجيش يباشر العملية لسبب لا يمكن إن إحنا نسمح باللعب في داخل الجيش، لأن خصوصًا أنا في رأيي السنة الجايه هيحصل لعب كتير داخل الجيش من كل واحد وقانون الأحكام العسكرية فيه مادة من مواده، إن أي عملية مدنية أي مدنيين يدخلوا يشتغلوا في الجيش يطبق عليهم قانون الأحكام العسكرية، ده غير المادة اللي أنا قلت إن إحنا هنلغيها الخاصة بأي قضايا فيها مدنيين وعسكريين الأولانية بقرار من رئيس الجمهورية وطبعًا هذه المادة لا يمكن إن إحنا نتنازل عنها لأن ماحانش عايزين نترك الجيش كل واحد يدخل يعمل تنظيم يتصل بضابط ويقول له إعمل كذا وكذا.
فيه أي موضوعات عامة
وقال أبو نصير: بس في التحقيق سيادتك أمرت باحالة التحقيق.
وقال عبدالناصر: ما هو القرار مضيت أنا القرار مضيته.
»‬تطهير القضاء»
وقال: وانا باقول: إن إحنا لازم يعني لازم من الإجراءات اللي إحنا هناخدها علشان نطمئن إلي سيادة القانون إن إحنا نطمئن إلي القضاء وأنا باعتقد علشان نطمئن إلي القضاء لازم يبقي عندنا قضاء نظيف 100٪ أنا مش عايز قضاء متحيز إحنا لم نتدخل في القضاء طوال 16 سنة لدرجة إن إحنا أفسدنا القضاء تركنا فيه المفسدين يرتعوا فعلشان نطمئن إلي القضاء وعشان منرحش محاكم عسكرية يبقي لازم نطهر القضاء وده لازم زي ما هنطهر المحافظين والسلك السياسي وزي ما طهرنا الجيش وزي ما هنطهر رؤساء المدن وقطاعات الإنتاج يبقي لازم نطهر القضاة.
وأضاف: وعلي هذا الأساس يبقي الوحد يطمئن إلي الناس، لكن لو تعلم انت ما أعلمه أنا عما يدور في القضاة، وفي نادي القضاة معرفش أبو نصير يعلم ولاّ ميعلمش؟ أنا ماطمئنش ويعني هم حاسبين انهم عندهم استقلال قضا وفيه يمكن أبو نصير يقدر يشرحل لكم موضوع القضاة إذا حبيتوا.
وقال: دلوقتي فيه أحزاب وتكتلات وفيه فساد وفيه بلاوي، وأنا شوفت قضاة بنفسي بيضجوا من اللي بيحصل جوه وأبو نصير ملكش أي سلطه الحقيقة. هو عنده واحد وكيل وزارة هو ماسك الدنيا كلها والعملية الحقيقة إحنا من أول الثورة لغاية دلوقتي طهرنا في كل الدنيا طهرنا في البوليس وطهرنا في الجيش وهنا وهنا أما دول فاتسابوا بدليل الراجل المحامي اللي اتقبض عليه يوم حادثه إسكندرية أتعين بعد كده في القضاء ووصل إلي مستشار مساعد!
فحكاية الاطمئنان للقضاء أنا باقول: لسه مافيش اطمئنان للقضاء.
»‬لا تراجع»
وأضاف: وبعدين برضه يعني الحقيقة النهاردة لو نتراجع في هذا الموضوع إحنا بنطمع فين كل الدنيا وإحنا الحقيقة النهاردة يعني وضعنا أقوي بكثير مما كان عليه في الفترة اللي فاتت وأعتقد إنكم انتوا حاسين بهذا وأنا رأيي إن الموجة بتاعة الثورة المضادة بتنحسر. وفي تقديري انها بتنعزل وعايزين نعمل نشاط.
وقال: وبعدين الحقيقة السنة الجاية معرفش السنة الجاية هيحصل إيه إحنا مش هنحرر سينا السنة الجاية أبدًا يعني حل سلمي مافيش فايدة حل عسكري لسه مافيش السنة الجاية، إذا ماكناش هنمسك البلد ومنخليش أي واحد يتفلفص عشان الحرب هتكون في الداخل الحرب مش هتكون علي قنال السويس، وأنا يعني بالذات وتذكر يا د. مراد يوم ما جيت عندي في البيت قلت لك: إن إحنا داخلين علي وقت صعب وقد نحتاج إلي إن نتخذ إجراءات شديدة مش كده؟ وهنضرب وهنضطر نواجه القوي المضادة، أظن كل الإخوان اللي جم في الوازارة تقريبًا أنا قلت لهم هذا الكلام علشان كل واحد يعرف إحنا داخلين علي سنة عايزة مننا يبقي قلبنا جامد ومنتخدش بكلام يعني مانجريش ورا كلام أي حد طبعًا، الدنيا الناس اللي هي مضادة عايزة الدنيا تبقي لوز علشان ينتشروا إحنا معملناش حاجة ماقبضناش علي حد قبضنا علي 3 في الفترة دي من بعد مظاهرات الطلبة.. 3 بس اللي قبض عليهم.
وأضاف: وأنا قلت لهم: إن أنا مش هتخذ أي إجراء من الإجراءات الإدارية ولا البوليسية، هنواجه العمل السياسي بالعمل السياسي لغاية بعد الاستفتاء وبعد كده بنشوف عمليتنا هتكون إيه وبعدين هم حتي كانوا كلموني علي العملية بتاعة الجيش وقالوا نحولها لنيابة أمن الدولة أنا قلت لهم أبدًا لازم الجيش يعني نحافظ علي حقه أي واحد مدني يتدخل في الجيش، الجيش يقبض عليه ويحاكمه بمقتضي قانون الأحكام العسكرية وإذا تنازلنا عن هذا فيه 100 يد ويد هتلعب في داخل الجيش.
»‬استغلال الدين»
وقال: وانتوا الحقيقة مبتحسوش بهذه المواضيع لأن الواحد يحس بيها يعني أنا مثلًا قعدت الساعة 2 أقرا القضية وأقرا الأقوال وأقرا كذا واحد بيتكلم علي دين ويصلي ويروحوا يصلوا الفجر في الجامع ويجي واحد يخدهم ويقول لا ده جمال عبدالناصر هو اللي مسئول عن الفساد اللي في البلد، الفساد اللي في البلد ده موجود من أيام خوفو (ضحك) وعن النسوان اللي بتتسكع في الشوارع أيضًا أظن بتتسكع من أيام خوفو مش أنا! (ضحك)
وقال: باعتبر إن العملية هي عملية اجتماعية أكثر منها عملية يضربوا الستات ولا يمنعوهم من الشوارع يعني لو أوجدنا لهؤلاء الناس عمل واشتغلوا اجتماعيا وزودنا الدخل ميطلعوش يتسكعوا في الشوارع بالليل هم بيطلعوا بليل يتسكعوا ليه بيتسكعوا علشان يجيبوا فلوس لو إحنا عملنا هذا حسنا المجتمع واشتغلنا ممكن نغير من هذا. ولكن بيقولوا ده هو ده اللي مسئول والحل الوحيد هو الاغتيال. يعني طبعًا هذه موضوع عرفناه طبعًا فيه تلاقي قصد ده فيه مواضيع أخري مش عارفينها.
وقال عبدالعزيز كامل: لو أذنت لي بالكلمة في هذا الموضوع يعني الواحد بيلاحظ إن الظاهرة دي يعني فرخت ويمكن انها تفرخ يعني مرات المرات يعني وبحس انها يعني يكون فيها عنصريين أساسيين ينبغي إن إحنا برضه يبقوا في ذهننا واضحين.
العنصر الأول: هو العنصر المستغِل. والعنصر الثاني: هو العنصر المستغَل واحد منهم بيكون وقود لهذه الحوادث والثاني بيكون هو اللي حاطط نفسه وراها علشان خاطر يدفع دول ويستفيد من دول.
وأضاف: ولا شك إن هذه الدائرة لو قطعت مابين المستغِل والمستغَل ممكن جدًا إن إحنا نتجنب كتير جدًا من العناء والعذاب اللي إحنا بنلاقيه كأفراد وكمجتمع من تفريخ دوري لهذه المؤامرات.
وقال: الصورة في ذهني كما يلي: إن إحنا لما نيجي أولا كما قلت سيادتك إن إحنا عايزين نقاوم الفكرة بالفكرة ويقاوم هذا بالحل السياسي فهل من الممكن إن الأساليب التي تستخدم الآن للتغرير بهذا العدد من الشباب تكون هي في نفسها محل دراسة علمية وموضوعية وبعدين نبتدي نعمل لها طريقة مقاومة علمية أيضًا عن طريق المسجد وعن طريق أجهزة الإعلام ومش شرط هتكون المقاومة مباشرة ولكن نقدر ندي علي مدي طويل مثلًا صورة المجتمعات كما حدثت في تاريخ الإنسانية.
»‬الهوس الديني»
وقال عبدالناصر: هو طبعًا موضوع استخدام الدين ده موضوع قديم ماهواش موضوع جديد حتي من أوائل أيام الإسلام واستخدم الدين في الاغتيال وعمر قتل، وعثمان. وبعد هذا حصلت يعني مئات الاغتيالات لأكثر الناس غاندي قتل وابراهام لينكولن قتل وفيه فيه المهاويس الهوس الديني ده أنا معرفش إزاي تعالجه. وبرضه أنا أما اتكلمت معاك قلت لك إن العملية إحنا عايزين نلم الإخوان المسلمين الحقيقة وماحناش عايزينهم يبقوا مش عايز أحط حد أنا في السجن أنا عايز احط حد في السجن ليه ممكن عن طريق المساجد وممكن عن طريق الأئمة وممكن عن طريق الجمعيات الدينية وممكن عن كل هذه الطرق ننفذ الفكر والكلام اللي انت بتقوله لكن ده بيقولهم إيه إن الكلام اللي بيقولوه ده مش مسلمين الكلام اللي بيقولوه ده مش مسلمين والمسلم إذا إداك النصيحة إلي الأكبر منك هو بيتحمل التبعة بالنسبة ليك بيدوا فتوات زي الشيخ سابق ما كان بيدي الفتاوي سنة 46 و47 و48 الشيخ سيد سابق ما هو كان برضه بيدي فتاوي وبعدين بتبقي العملية إحراج الحقيقة معرفش انت اشتغلت في العمل السري يمكن اشتغلت بقت العملية توريط بعد العملية ما بقت توريط.
وقال عبدالعزيز كامل: اللي بيحصل انه بتورط.
وقال عبدالناصر: آه.. بيجي..
»‬توريط الشباب»
وقال عبدالعزيز كامل: يقول له أنا هدربك مثلًا وأدربك علشان ده جزء من دينك وبعد ما يدربه يتورط ويتعرف إنه يمسك سلاح فيضطر يمشي معاه في الشوط لحد آخره فلابد من أن المسألة تنقطع يعني بهده الطريقة صحيح كما قلت سيادتك إن المسألة قديمة ولكن طريقة استغلالها بتتغير مع تغير المجتمعات يعني النهاردة ممكن يجي يكلمه عن طريق مثلًا في مجتمعنا مش الكلام اللي هيقوله لو كان في عهد بني أمية أو في العهد العباسي فإحنا بدنا نشوف كيف تتجدد هذه الأساليب والأساليب الجديدة علشان نقدر نطلع منه المصل اللي نديه لشبابنا في هذه المرحلة بالذات ولهذا أنا باعتبر فعلًا إن هذه القضايا التي حدثت من الانحرافات السياسية باسم الإسلام لم يستفد منها حتي الآن علي أساس علمي سليم لتحصين المجتمع من أي انحراف مقبل لأنها لم تخضع لدراسة علمية موضوعية ثم توضع هذه الدراسة العلمية بعد هذا في خدمة المجتمع.
وقال عبدالناصر: أنا بتهيألي انت يمكن اكتر واحد يدينا دراسة عملية في هذا لأنك كنت.
وقال عبدالعزيز كامل: أنا مستعد يا فندم لو وضعت هذه الحقائق تحت أيدي.
وقال عبدالناصر: انت شوفت الناس دول كلهم.
وقال عبدالعزيز كامل: أيوه.. يا فندم.
وقال عبدالناصر: يعني اللي أنا عارفه شوفت الناس اللي كانوا معتقلين والناس اللي كانوا في السجن وتناقشت معاهم واتكلمت معاهم وبعدين أنا مشفتهمش وأنا بقرا التحقيق أنا بقرا التحقيقات يعني في قضية الإخوان المسلمين قريت التحقيق كله في كل القضايا دي بقرا التحقيق ولكن وأنا باقول: عملية الجيش دي مش العملية نمرة واحده دي العملية 500 من أول الثورة لغاية النهاردة أو اكتر من العملية 500 وبيجي أي واحد يقول أنا معرفش عباس ده دين حسني ده راجل دين ولا أصلا مدعي إسلام.وقال حسين الشافعي: في هذا أنا أذكر في سنة 54 يعني إلي جانب إجراءات الأمن برضه يعني كان فيه خط سير في مجال الدعوة ومجال الإقناع في المساجد فعلًا زي ما سيادة الرئيس تفضل وكانت دي إلي جانب دي فعلًا بتدي تكامل بالنسبة للموضوع إنما لما بيتاخد بس الجانب الأمن واحتياطات الأمن وإجراءات الأمن ويغفل الجانب الآخر فعلًا هيدي البيئة الصالحة اللي ممكن باستمرار استغلها واستخدمها وهم طبعًا أسطوات في هذا.
وقال عبدالناصر: مين اللي هم أسطوات؟
وقال حسين الشافعي: الإخوان يعني.
وقال عبدالناصر: (ضحك)
وقال عبدالعزيز كامل: أنا عندي دراسات تمهيدية في هذا ولكن مش كاملة لو حبيت يعني سيادتك يعني نحط خطوط رئيسيه للدراسات الأولية تحت نظر سيادتك ولو وجدتها صالحه إن أنا أتابع عليها ممكن ولو كنت تحب سيادتك إن يتحط عليها إضافات برضه قبل ما ابدأ في دراسة موسعة لها إني برضه آخد توجيهات سيادتك وحتي من أيام عملي في الاتحاد كنت تكلمت في هذا الموضوع مع السيد كمال رفعت وعملت تقرير تمهيدي في هذا الموضوع، كيف يمكن الناس بإرداتها إنها تخضع وإن الشباب ده نفسه يصان في أي مرحلة من مراحل التآمر إني أديله out light يقدر يطلع بيه.
وقال: المسألة يعني في الواقع مسألة جوهريه ومش بس متعلقة بالجيل بتاعنا ولكن متعلقة بشعب مؤمن طول عمره مؤمن وبيؤتي من ناحية يعتز بيها وهي دينه ثم بعد هذا تدفع هذه الناحية دفعا سيئًا شريرًا إلي إن يساء إلي الشباب والي الإسلام والي فهمنا الإسلام ثم بعد ذلك إلي نظر المسئولين إلي زيادة أقدر أسميه الكم الديني في نفس الشاب يعني النهاردة أصبح الشاب يخاف إنه يكون مسلم اكتر من اللازم شويه لئلا يكون مظنة إنه هيقال عنه كذا وكذا فبقيت مشكله الحقيقة يعني هم ممكن يكون طيب.
وقال عبدالناصر: لا يعني هو الأولاد دول بيصلوا ده إحنا حاطين في الجيش في كل وحدة إمام وعاملين مصلي وأنا أما طلعت في زيارة للميدان كلمتهم علي الدين وعلي المعاملة وعلي الإيمان يعني حنعمل إيه بقي إلا إذا كان الواحد يعزل من البيت يروح يعد في جامع ده هو هيبقي السبيل الوحيد لهذا الموضوع ماهياش كده العملية. العملية الحقيقية اختلاق الأسباب.
»‬الدين ليس هو المشكلة»
الجماعة دول من زمان موجودين ومعروف انهم ديانين وناس كويسين لم يؤخذ ضدهم ابدا أي إجراء معروف إنهم بيصلوا وبيصلوا بالعساكر وبتاع لكن أول ما تكلموا عن العمليات العنيفة واحد جه بلغ علي طول واحد منهم أيضًا واحد دين هو جه قال إن الموضوع بقي كذا كذا وهو بيعتبر إن ده ضد البلد إلي آخره.
ثم واحد أيضًا بلغ علي هذه الأساس مبقاش الدين هو المشكلة لأ بقي استغلال الدين هو المشكلة.
وقال عبدالعزيز كامل: يعني اللي بلغ لو هنا فعلًا يورينا اليقظة اللي موجودة فيه وده الشيء اللي عايزين ننميه دي النقطة يا فندم، إنه أول ما يحس إن فيه شئ بدا للانحراف علي طول يروح موقف الدائرة علي طول.
وقال: فالفيصل بين الحق والباطل والخير والشر هو اللي ينبغي أن يوضح وده يأتي عن طريق تصور سليم للدين وتصور سليم للمجتمع ولإمكانيات التطور فيه وتحت أمر سيادتك إن شاء الله وأحب إن أضيف إضافة أخيرة دون أن آخذ يعني كثير من وقت المجلس يعني برضه فيما يتعلق بالقوات المسلحة اتكملت مع الأستاذ حسين الشافعي والسيد الفريق أول محمد فوزي علي أساس إيجاد تعاون مابين الوزارة ومابين الأئمة علي أساس تكوين برنامج مشترك للأئمة نفسهم وتزويدهم أسبوعيا بخطوط رئيسية للعمل يستطيعوا إن هم يمشوا بيها ماشية مع الخط الرئيسي يعني مش خطبة نمطية ولكن آيات أحاديث نماذج من تاريخ الإسلام موجودة بمراجعها بحيث انها تكون عنده زاد فكري يستطيع إن هو يتكلم بيه ونفس حتي الإيمان يبقي ماشي كويس وهو يوجه اللي ورا منه.
متشكر أوي.