أنتم منهم

لكل اللي »بينتقدوا« ما حدث في انتخابات مجلس الشعب الماضية.. عاوز اسألهم وعاوزهم يسألوا نفسهم.. إيه اللي انتم »بتستغربوله«.. مستغربين ان فيه ناس »بتاخد« رشاوي علشان تنتخب أي واحد؟.. مش عاجبكم ان فيه بلطجية بياخدوا اللي عاوزينه بدراعهم؟. مش عاجبكم ان الأحكام اللي بتطلع من المحكمة مابتتنفذش؟!
طب إيه »الجديد«.. هو انتم غير الناس دي.. هو انتم مابتعملوش »زيهم«، ولا مش عايزين تعملوا زيهم.. لا »آسف« بلاش نضحك علي بعض.. اللي حصل في الانتخابات.. هوه نفسه اللي انتم بتعملوه يوماتي في بعض.. ده إذا ماكانش أكتر.. مفيش منكم ناس »بترتشي«.. وبالمناسبة افتح هنا قوس.. (الحكومة.. المحترمة.. اعتبرت ان اللي بياخد مرتب أو معاش ألف جنيه في الشهر من »الأغنياء«.. اللي لا يجوز له بطاقة تموين!!).. دول حيرتشوا ويرتشوا.. مستغربين من ان فيه ناس »بلطجية«.. ليه انتم مابتمشوش في الشارع وبتشوفوا البلطجة اللي علي أصولها.. مابتحاولوش تركنوا عربية أُدام محل وتنضربوا بالنار.. مابتشوفوش الناس بتعمل إيه في بعضها في أي حتة.. مش عاجبكم ان فيه أحكام وقوانين صدرت ضد »مرشحين« ولم تنفذ.. طب اشمعني دي اللي عاوزينها تتنفذ.. ما فيه أحكام كتير وقوانين أكتر لا تنفذ علي »الهليبة« اللي نازلين »سفح« في المواطنين ليل نهار.. اللي فارضين أسعار علي مزاجهم.. اللي بيسرقونا »عيني عينك«.. وافتح هنا قوس تاني.. (وزارة الصحة قامت في دماغها انها تعالج الغلابة لغاية الساعة واحدة الضهر وبعد كده العلاج يتحول استثماري بفلوس).. أنا مااعرفش غير حاجة واحدة.. قبل ما »تنتقدوا« بصوا.. لنفسكم.. للي حواليكم علشان تعرفوا ان محدش أحسن من حد.. وعلي رأي الموكوسة للهبلة لا تعايريني ولا اعايرك الهم طايلني وطايلك.