«اللي كان في البلكونة ومعاه كوباية شاي ولسه جاي لنا.. الكابتن محمود بكر بيقول لكم»:

«عارفين مين أحسن لاعب في الدوري حاليا»؟!

هو شخصية كروية شاملة، هو المعلق الكوتش، والاداري والمدرب واللاعب القديم كابتن محمود بكر.. يقرأ الملعب قبل ان تبدأ المباراة، وبخفة دمه.. ولو حد منكم جاي من البلكونة كان بيشرب سيجارة او كوباية شاي، الكابتن بكر لما سألته عن أحسن لاعب في الدوري حاليا..
فاجأني باختيار جديد.. قال: الولد الصغير اللي في حرس الحدود اسمه كريم نيدفيد.. بهرني الحقيقة.. والله شفته في كام ماتش ما صدقتش نفسي.. وعرفت انه معار من الاهلي.. ستايل حلو وكرته جميلة ورؤيته للملعب واضحة ومهارته عالية.. بجد احسن امكانات للاعب..
لو اهتموا به كويس في الاهلي.. وعملوا له شغل عضلي يبقي الخطيب او ابوتريكة من جديد.. ولازم نسأل عن العين اللي سابت ولد زي ده.. الله يسامحه جاريدو بقي.. لكن مستقبله كبير اوي ان شاء الله.. لو مشي مظبوط وعرف قيمة الاهلي والتزم كويس واتقي ربنا في موهبته.. ولد حتي شكله حلو.. ربنا يوفقه.. وابقوا افتكروا كلامي.. وتعالوا نشوف شهادتي علي العشرة:
اتوقفت 3 مرات
بتعليمات من مبارك
يؤكد محمود بكر انه كمعلق تعرض للايقاف عدة مرات، ويقول: اوقفوني 3 مرات بناء علي تعليمات او توجيهات الرئيس مبارك..
مرة كان مجتمعا مع بعثة مصر العائدة من لوس انجلوس وقال للكابتن محمد لطيف وعلي زيوار مش عايز رغي كثير في التعليق،
وقبلها بيوم كنت اعلق علي ماتش الاهلي والمصري وتكلمت كثيرا في الفنيات فاعتبروني مخالفا تعليمات الرئيس
واوقفوني،ك
ولما علقت علي مباراة مصر وانجلترا في مونديال 90 وحبيت اخفف من صدمة الهزيمة
وقلت ان دي انجلترا يا جماعة مهد الكرة في العالم، مبارك قال لهم ازاي.. بيشجع الانجليز وسايب ولادنا..
فأوقفوني!!ك
ومرة حتي وانا في اذاعة الاسكندرية وكل مرة بتوجيهات السيد الرئيس
وكنت ارجع تاني .. عدالة السماء!!ك
1- د. عبدالأحد جمال الدين : «يالهوي.. ده ألغي الدوري»! .. محمود بكر معجب كثيرا بشخصية ونجاحات د. عبدالاحد جمال الدين عندما كان رئيسا للمجلس الاعلي للشباب والرياضة ويقول: يالهوي.. ده الغي الدوري ولاهمه اي شيء عندما تعارض مع اعداد المنتخب لكأس العالم 90، وكان صاحب قرار ورجل سياسة بجد، وفر للجوهري 36 مباراة دولية وقدم الدعم للمنتخبات كلها، وكان يدعم الاندية التي فيها ابطال من الالعاب الاخري وكان يدعمنا في الاوليمبي لاعداد ابطال المصارعة والاثقال، وكان له قرار سياسي بهدوء وده درس للوزراء اللي بعد كده كانت قراراتهم تصادمية وبعيدة عن السياسة علشان كده فشلوا او مشيوا.
2- د. عبدالمنعم عمارة :«للأسف.. هؤلاء خانوه»! .. بكر يقدر كتيرا د. عبدالاحد جمال الدين ود. علي الدين هلال ويري لكل منهما تجربته الوزارية المهمة، ويتوقف باهتمام عند د. عبدالمنعم عمارة ويقول: كانت ميزته ان يديه جوه الاندية، ودعمه مستمر لها ولم يكن غريبا علي مسئولي الاندية، ونجح ان يلم الاعلام حوله، بطريقة او بأخري لكن مشكلته انه وثق في بعض الناس ولمعهم وقدمهم لاماكن مهمة منها اتحاد الكرة، لكن للاسف هؤلاء خانوه وظهر انهم ليسوا علي مستوي ثقته فيهم، هو سياسي قوي ومحنك واتخذ قرارات كثيرة مهمة.
3- صالح سليم : «اوعي تشوفه من بعيد»! .. يعترض بكر علي كل من يظن ان صالح سليم شخصية متكبرة.. ويقول: اوعي تشوفه من بعيد، لانك تظلمه، فهو متواضع وبسيط، لكنه محترم جدا ومحافظ علي الكبرياء الخاص به وبقيمة النادي الاهلي، وإلا ما كان اسمه يتردد ابدا حتي الان وبعد وفاته بسنوات، كان لاعبا فذا، وشخصية ادارية تدرس، كان ديمقراطيا جدا علي الترابيزة وحاسما وحادا في تنفيذ القرارات، ويختار مساعديه ورجاله بعناية ويكفي انه قرب منه حسن حمدي ووثق فيه ونجح معه وبعده لسنوات طويلة.. يعني عنده فراسة، واعتقد انه لما قال ان الجمهور لا يمكن ان يحكم الاهلي كان صائبا وكان هذا سر تميزه، حتي لما ابعد اللاعبين الكبار وهاجت الدنيا لم يهتز للجماهير وبني فريقا جاب الدوري للأهلي 7 سنين.
4- ابراهيم الجويني : «ماعرفش يخاوي»! .. يري محمود بكر ان محمد حبيب رئيس غزل المحلة الاسبق هو اهم شخصية رياضية تعامل معها وله نجاحاته الكبيرة، لكن يتوقف عند العميد ابراهيم الجويني رئيس الاوليمبي قبله ورفيقه السكندري والمعلق الكبير قائلا: هو رجل عصامي منذ جاء للاسكندرية من دمنهور لعب وتخرج في كلية التجارة والتحق بالبحرية ووثق فيه الفريق سليمان عزت كثيرا وجعله ذراعه اليمني، كان يحفظ قوانين ونظام كل الالعاب.. صاحب مجهود كبير لكنه ما عرفش يخاوي، ولم يقدم بجانبه قيادات جديدة، لكننا قدرنا نتعلم منه ونستفيد من غير ما يحس بنا، لان الاوليمبي اجيال بتسلم بعض.
5- الخطيب : «خطورته ظهرت بعد اعتزاله»!.. يري محمود بكر ان محمود الخطيب من اهم لاعبي الكرة المصرية في تاريخها وأكثرهم موهبة ويقول: هو اخذ كل الانظار من كل الاتجاهات لم يختلف عليه الاهلاوية او الزملكاوية، او غيرهم.. واحتفظ بحب وتقدير الجميع، لكن قيمته وخطورته النجومية ظهرت بعد اعتزاله لانه حافظ علي رونق نجوميته وعلاقاته.. لكنه كلاعب موهوب كان فلته.. آه لو كان هان نفسه شوية في الملعب، كان بقي حاجة تانية خالص، وبعدين هو استفاد من كوكبة النجوم من حوله، وواحد يقول لي هم اللي صنعوه، اقول لهم ماشي، لكنه ايضا حفظ مجهودهم وترجم عرقهم كلهم الي اهداف وبطولات، ممكن الفريق كله يخدم علي لاعب يضيع كل الفرص.
6- حمادة امام : «تحس انه بيطلع الكورة من قلبه»!.. محمود بكر يحب حمادة امام وتعليقاته ويقول: حمادة لانه كان ثعلب الملاعب وهداف مكار، تحس انه يعلق علي المباراة بقلبه، ويعيش مع الهجمة والتمريرة واللمسة.. كما لو كان في الملعب، بيلعب.. تحس انه بيطلع الكورة من قلبه.. النواحي الفنية عنده عالية ودائما كان يتميز بالايقاع المرتبط بخطورة الهجمة.. يعلي مع الكورة وخطورتها.. حمادة شخصية محترمة ومحبوب من الناس كلها، وطبعا له خبراته الكبيرة كلاعب فذ واداري كبير سواء في الزمالك او اتحاد الكرة.
7- حسام حسن : «نطلع الكبار.. ونقف عنده»!.. سألت بكر عن احسن مدرب في الدوري حاليا فقال: نطلع الكبار زي حسن شحاتة وفتحي مبروك وطلعت والعشري وطولان، لانهم اثبتوا وجودهم من زمان، ونبص نلاقي الدوري هذا الموسم افرز مجموعة هائلة من المدربين.. عاجبني جدا حمادة صدقي وحالة الهدوء والثقة، ونجاحه في سموحة ودجلة وايهاب جلال في المقاصة، لكن بصراحة نقف شوية عند حسام حسن لانه بصراحة مسك الاتحاد وعنده فقط 16 لاعبا ومهاجم واحد، ودخل عليهم بعد فترة الاعداد لكنه عمل فريقه له شكل ورفع اللياقة وينفذ اللاعبون جملا تكتيكية تدربوا عليها. واعتمد فقط علي حمدي ووردة.. والاتحاد يلعب بكفاح وروح عالية.. بصراحة برافو جدا حسام حسن.
8- مدحت شلبي.. : «هو ده بتاع بيبو وبشير»! .. يؤكد بكر ان مدحت شلبي معلق متميز ونجح كثيرا، ويقول: مدحت حفر في الصخر وبدأ من ايام القناة الثانية.. وانطلق بعدها، وهو ده بتاع بيبو وبشير، لان الجملة دي في هذه المباراة التاريخية كنت شهادة نجاحه، وهو كإعلامي اثبت وجوده ومستمر من سنوات.. هو لايزعل اي حد.. وله مشواره الناجح طبعا حتي الان.. وانا احب اشوفه كمعلق.
9- ميمي الشربيني : «بصراحة.. أحسن معلق أحب أسمعه».. يشيد محمود بكر بكثير من المعلقين الكبار والجدد، لكنه يتوقف عند ميمي الشربيني ويقول: ميمي دفعتي في التعليق سبقني بمباراة واحدة لكننا اعتمدنا معا في نهاية السبعينيات، وبصراحة هو احسن معلق احب اسمعه، صاحب مدرسة في تقديم الارقام والمعلومات واستاذ في توظيف هذه المعلومات، ووضعها في توقيت مناسب دون رغي او دوشة، تألق في مونديال 1986، وميزته انه يوصف الهجمة ويتابعها مع زيادة خطورتها ويفضل معاها لغاية ما تيجي جون ويدخل معلوماته وارقامه عن صاحب الهدف وكله في نفس واحد.. ودي ميزة كبيرة جدا، نفسي يرجع ميمي تاني للتعليق خسارة.
10- شوبير : «من الآخر.. يقود ولا ينقاد»! .. يقول بكر عن احمد شوبير: اعلامي جيد جدا، لكن عنده نوع من الشجاعة الاعلامية الزيادة شوية.. كثيرا ما يثير مشاكل وازمات ويقدم تحليلات واخبارا في اي وقت، وهذا يمكن سبب تميزه، عاشرته علي ترابيزة اتحاد الكرة مع سمير زاهر ووجدته دائما يبقي هو الرجل القوي وكلمته لازم تمشي وده لانه كان له دور كبير معاهم وسبب في نجاح معظمهم.. هو من الآخر يقود ولاينقاد.