صح صح

زبالة حبنا

هوه الحب أيه غير شوية اهتمامات علي شوية انتماءات تربطنا ببعض.. واحنا كشعب ممكن نختلف في كل حاجة وعلي اي حاجة إلا الزبالة اللي بقت حتة مننا. الزبالة ما جمعتش المصريين بس..لأ دي حققت أهم مبدأ من مبادئ الثورة وهو العدالة الاجتماعية لانها ما بتفرقش بين غني وفقير. خلاص يا أحرار شوارعنا بقت واحدة وزبالتنا واحدة مالياها علي الصفين ودا إنجاز لازم نحترمه. فاكرين زمان لما الحكومة قالت هنجيب لكم شركات نظافة أجنبية تعلمكم النظافة ؟ راح المصري المعروف بقوة شخصيته وجبروته بهت عليها وخلاها هيه كمان ترمي الزبالة في الشارع.
طب فاكرين فلوس النظافة اللي بندفعها علي فاتورة الكهرباء من سنين لحد دلوقتي رغم صدور حكم ببطلانها؟ اهي دي بالذات الفلوس اللي عرفتنا قيمة نظافة الجيوب لتكفير الذنوب.. وحققنا المعادلة التي يعجز أي عقل عن تفسيرها وهيه إزاي كلنا بندفع رسوم النظافة مرتين عشان في الاخر ناخد زبالة مضاعفة؟ ودا ليه؟ عشان قلوبنا مش نظيفة لو كل واحد بيرمي زبالته كدا بحب في صندوق الزبالة كانت البلد نظفت. محدش مبسوط غير الناس اللي باشوفهم بيرموا زبالتهم في الشارع قبل ما يروحوا الشغل..انسوا مشهد الموظف بالبطيخة وجرنال دلوقتي عندنا مشهد المواطن أبو كيس زبالة ودا تغيير جذري في الشخصية المصرية.
نيجي بقا للزبالين اللي هما الهرم الرابع لمصر.. يا عزيزي الزبال البلد حصل فيها ثورتين ومعدش فيها استبداد خلاص ولا طبقية بين هاي كلاس وناس بيئة..وبقينا كلناعايشين في مقلب زبالة كبير عشان كدا ياريت مش كل اسبوع تغلي الاجرة هيه كانت دامت لمين ؟ امبراطورية الزبالة مادامتش لحد والدولة المتسخة بتقع علي دماغ اللي فيها. ومعلش يا زوجي العزيز سيبك من الفسحة في الشارع وسط زبالة حبنا..الفسحة في الشقة كلها فوائد.