مبروك للزمالك الصعود إلي دوري المجموعات لبطولة إفريقيا لأبطال الدوري, وإن شاء الله نبارك اليوم للأهلي, ثم ندعوا الله ألا يقعا في مجموعة واحدة, ثم ندعوا لهما بالصعود إلي الدور قبل النهائي ثم ندعوا بأن يفوز أحدهما بالبطولة.. وهل نحن نملك إلا الدعاء وفي كل الأحوال.. بالأمس ظلت دعوات المحبين تجول وتصعد, يارب استر, برافو ياشناوي, سترك يارب, برافو جنش, وجاء هدف فريق بجاية ولم يكن لهم كل الغاية, ومع ضعف أداء الزمالك وهجومه بدأ اللي جنبي يخلع هدومه ويوزع علي من حوله همومه!.. وازدادت الدعوات والابتهالات, وتحولت من فردية إلي جماعية, يارب يا معين مش عايزين هدف في مرمانا يزيد البلة طين.. يا رب يا حنان يرجع الزمالك كسبان. وسجل حمودي هدف الزمالك.. تنفسنا الصعداء.. والواقف عي رجله جلس وهو يتنهد ويتشهد.. والجالس قام ووقف يسترجع عملية الشهيق والزفير.. واللي كان ناسي مشروبه جنبه مد إيده وشربه.. واللي كان طالب حجر شيشة استعجله, واللي كان مطنش الفيس بوك فتح واستخدمه. ثم بدأ الحوار: مادام اللعيبه قادرة تهاجم وتصنع الفرص وتسجل ما عملتش كدة ليه من الأول؟.. لازم نعمل زي الأسطي فاروق اللي بياخد وقت علي مايفوق؟.. ياعم دي مشكلة مدرب اللي بيلعب من غير رأس حربة!.. يعني كان هو عنده وما أشركوش!.. عندك مين, المحروس بسام اللي مشغول بقصات شعره, ده لحد دلوقتي عامل61 قصة وفاضله قصتين علشان يبقوا81 بعدد أهدافه في الموسم الماضي, ولا مايوكا الغلبان!.. طب وهو كهربا ينفع يبقي رأس حربة, شفت لما انفرد مرتين عمل إيه؟.. طالما وصل وانفرد يبقي ييجي منه, والمفروض المدرب يستفيد من إمكاناته وماتنساش أن كهربا لاعب هداف ويمكن المدرب يعيد اكتشافه في المركز ده, علي الأقل هو أفيد من غيره وراجل في الملعب وماتنساش هو اللي صنع الهدف.. بس تغيير حمودي كان صح, احنا كنا خايفين الراجل دماغه تضرب ويشرك شيكابالا, برضه حمودي مهاري وسريع ويعرف طريق المرمي بس مشكلته إنه بيبالغ حبتين في المراوغة.. ماشاء الله عليك ياكوفي, كل الكرات العالية بيشارك وياخدها ومقاتل.. آه ده حقيقي.. بص إحنا في الدفاع كنا كويسين لحد كبير واللعيبه اتحملت الضغط ومعاهم لاعبو الوسط معروف وحامد وتوفيق.. لكن ماتنساش, مش كل مرة حاتسلم الجرة.. ودوري المجموعات مافيهوش برة وجوة ولكن تجميع نقاط, يعني لازم الفريق ياخد باله ويبقي عنده نزعة هجومية. المهم إنهم صعدوا وبعدها يحلها الحلال.. يارب تكمل بالأهلي اليوم.. وكمان المقاصة وإنبي.. قولوا.. يارب.