قضاء ربنا..إن واحد بقاله خمسين سنه نفسه الزمالك ياخد الدوري ومبياخدهوش

"يافريق الزمالك..يا جايب المهالك لجمهورك العظيم... لا نافع مدرب ولا لاعب مشطب مكسح مكحكح سقيم، يخبط ويضرب زمايله في ملعب.. يقولك فلوسي..وبعالج ضروسي.. وعقدي المزور ..وعقدي السليم..وكل ماتش يهرب.. خايف يتعب.. وباقى التيم.. يتعمد الهزيمة.. بعادته اللئيمة.. بلعبة قديمة..مالهاش أي قيمة.. في كل ماتش هيه.. اللعبة منتهيه..يا هزيمة يا تعادل"
تلك الكلمات الساخرة كانت افتتاحية احدى الصفحات الساخرة على صفحات موقع "فيسبوك"، والتي تعكس رأي الجمهور في فريق الزمالك، ولم يفوت الجمهور الأهلاوي فرصة دون أن يسخر من الزملكاوية خاصة بعد هزيمته من المصري ، لتنطلق النكات، حيث أصدر المجلس العسكري بيانًا بشأن الدوري هذا العام وقال:
أيها الأخوة المواطنون.. تصدر الزمالك للدوري كان مجرد نوعا من أنواع البلطجة في الشارع المصري.. وقد تمت السيطرة عليه بكل القوى الخارقة لحظر التجول.. ونهيب بالمواطنين الشرفاء أن الدوري أهلاوي السنة دي والله الموفق والمستعان.
الزمالك أم الأهلي من يربح في مباراة القمة، سؤال يتردد بين مستخدمي "فيسبوك" كل موسم، ولكن هذه المرة اشتعلت المنافسة بين الفريقين بشكل مختلفة، خاصة بعد أن كان الزمالك متصدرا لقائمة الدوري.
وعلق عماد أنور الزملكاوي وقال "نداء من جماهير الزمالك إلى المجلس العسكري : أرجوكم ألغوا نادي الزمالك لأنه فريق بيحرق دم الجماهير أرجوكم اقفلو هذا النادي وكل الزملكاوية يخرسوا" وقال نداء آخر ورجاء إلى لاعبي الأهلي الجدعان أرجوكم لا تهزموا الزمالك وده عشان خاطر جماهير الزمالك الغلبان المسكين .
فيما قال مسئول صفحة "الزملكاوية": سواء كسبوا خسروا بيخدوا فلوس اما احنا سواء شوفنا الماتش في البيت بندفع حق الكهربا ولو رحنا الاستاد بندفع حق التذكره و ياريت بنكسب و الله لينا الجنة.
وعلق أحمد حسن وقال: "و لو روحنا القهوه بندفع حق المشروب يعنى غرامانين غرامانين.. دا غير المهدئات و أدويه الضغط و السكر".
فيما رد أحمد علي الأهلاوي وقال: "عزيزي الزملكاوي":
ناديك يناديك..والمركز التاني مستنيك..وتاني تاني تاني راجعين للمركز التاني
وقالت سحر الأهلاوية تعرفوا فوائد الزوج الزملكاوي:
اولا: ده واحد راضي بقضاء ربنا ومبيعترضش .. يعني تلاقيه بقاله خمسين سنه نفسه الزمالك ياخد الدوري ومبياخدهوش وعادي جدااا مبيعترضش.
ثانيا : عنده حصانه ضد الضغط والسكر .. لأنه لو كان عنده استعداد يجيله... ضغط أو سكر كان جاله من زماااااااااااااااان.
ثالثا : أصيييييييييييييييل .. يعني بقاله سنييييييييين بيشجع الزمالك وعارف انه مش هياخد الدوري ومع ذلك عمره ما فكر يسيبه فصدقيني مهما عملتي ومهما كانت عيوبك مش هيفرط فيكي.
رابعا : متسامح .. يعني تلاقي أصحابه الاهلاويه كل شويه يعايروه .. وتلاقيه مبيردش عليهم .. مش عشان عينه مكسوره لا سمح الله بس عشان قلبه كبيييييييييييير.
خامسا : مختلف .. يعني مصر كلها بتشجع الأهلي وده طالعلك فيها بيشجع الزمالك وعادي جدااا معندوش أي مشكله وده في حد ذاته تميز واختلاف سادسا : هيلتمسلك الأعذار .. يعني مثلا يبقي عارف ان الزمالك كان أداؤه زي الزفت ومع ذلك ميحبش يلوم عليه أبدا .. تلاقيه بيقولك التحكيم .. مش عشان حاجه بس هو طبعه كده يحب يلتمس الأعذار لأي حد.
سابعا: مبيعرفش اليأس .. يعني تلاقيه واخد اصحابه ورايحين يشجعوا الزمالك في الاستاد .. ومع انه كل مره بيخسر .. الا انه مبيسألش .. كل مره بيروح يشجع علي أمل انه يكسب عادي جداااا.
أما محمود قال: "واحد زملكاوى جاله رسالة من فودافون بتقوله فيها، عزيزي العميل، حان الآن الموعد السنوي للمقولة الشهيرة "سنظل أوفياء"، وقال واحد زملكاوي مراته بتقوله مش أنت الراجل الأول في حياتي، قالها أنا زملكاوي ومتعود على التاني.
ورد عمر إذا أردت الدوري بشده فأطلق سراحه، فإن راح للأهلي فهو لم يكن لك من البداية، وإن عاد إليك فروح اديه للأهلي عشان أكيد كان واقع منه.
وفي النهاية قال محمد شعبان "الأهلي بطل الدوري".. هدفنا قبل نهاية الدوري أن كل زملكاوي يقدر يقرأ الجملة دي .. ويكتبها كمان.