المصريون على الانترنت: الاتحاد الدولي للجواسيس يوقف "جرابيل" عشان أهبل

حالة من الجدل الشديد أثارتها أنباء القبض على الجاسوس الإسرائيلى إيلان تشايم جرابيل، وتسرب معلومات حول نشاطه فى مصر قبل أن يتم كشفه، وكواليس ضبطه والقبض عليه، حيث حل الجاسوس ضيفا على حوارات المصريين على مواقع التواصل الاجتماعى، مستخدمين سلاح "السخرية"، خصوصا أن قضية جرابيل أتت بعد عدة قضايا مشابهة منذ الثورة.
سلاح السخرية اللاذع انقسم حوله المصريون إلى معسكرين منهم من لم يصدق قضية الجاسوس وأنه كان بالفعل يتجسس على مصر لصالح إسرائيل، نظرا لما اعتبروه سذاجة سلوكياته وممارساته، التى سربتها التقارير الصحفية، ولا تتناسب إطلاقا مع أبسط مبادىء الجاسوسية، التى ألفوها مع حكايات ومغامرات "رأفت الهجان" أو رفعت الجمال، وجمعة الشوان وحتى "أدهم صبرى رجل المستحيل"، معتبرين تلك القضية تحديدا بمثابة "فيلم هابط" أشبه ب"أفلام وديع"، خصوصا بعد التصريحات الساخرة التى أطلقتها وسائل الإعلام الإسرائيلية حول القضية.
فعلى حد قولهم كيف يمكن لجاسوس إسرائيلى أن يأتى مصر وهو يحمل صورا شخصية بزيه العسكرى، التى حتما قد تكشف أمره وتدينه، أيضا ظهور صفحة "فيسبوك" شخصية للجاسوس أثارت جدلا واسعا بين المصريين، الذين راحوا يتابعوها ويترصدونها متهكمين كيف لشخص يعمل جاسوسا أن يكون له صفحة فيسبوك شخصية باسمه الحقيقي متاحة للجميع يضع عليها مجموعة صور له دون التحكم فى إعدادات الخصوصية، التى قد تقصرها فقط على أصدقائه، خصوصا كونه يضع فيها صورته الشهيرة جالسا أمام القبلة بأحد المساجد، محددا أن وظيفته هى "داعية إسلامى بالأزهر".
ولعل ما أثار الجدل أكثر هو تغيير إعدادات الصفحة الخاصة بالجاسوس حتى بعد إلقاء القبض عليه، حيث تم تفعيل إعدادات الخصوصية الخاصة به كى يقتصر عرض قائمة أصدقائه وأى معلومات تفصيلية أخرى على أصدقائه فقط، مما جعل المصريون يتساءلون ويتهكمون حول هوية الشخص المسئول عن تغيير تلك الإعدادات، الذى يملك كلمة المرور الخاصة بجرابيل، بينما تلقى السلطات المصرية القبض على صاحب الصفحة.
المعسكر الآخر، الذى يصدق قضية الجاسوس يرى أنها واقعية جدا، نظرا لكون مصر مستهدفة من أعدائها فى تلك الفترة الحرجة منذ بدء الثورة، بالإضافة إلى أن جرابيل لم يكن الإسرائيلى الأول المتباهى بنفسه، فقد سبقته إحدى المجندات الإسرائيليات فى وضع صورها بجوار ضحاياها من المعتقلين الفلسطينيين على صفحتها الخاصة على "فيسبوك"، إلا أن هؤلاء قد سخروا متهكمين من ما اعتبروه سذاجة مفرطة من قبل الموساد الإسرائيلى، داعين إلى تنظيم مظاهرة وقفة احتجاجية أمام السفارة الإسرائيلية لمنع تصدير الغاز لإسرائيل وتنديدا بتجسسها على مصر.
وما بين مصدق ومكذب أصبح الجاسوس هو حديث الساعة فى مصر، فعلى موقع "فيسبوك" تم تدشين عدد من الصفحات، التى أتت تهكما على الجاسوس تارة وعلى القضية برمتها تارة أخرى مثل: "الجاسوس الأهبل" ، "الجاسوس الإسرائيلى إيلان أعبط جاسوس فى العالم"، "إيلان جرابيل جاسوس وأهبل وزيمباوى كمان"، "قصة جاسوس"، وأخيرا "احنا آسفين يا جاسوس"، التى طرحت استطلاعا ساخرا للرأى على أعضائها حول مدى رضاء أعضاء الصفحة عن أداء الجاسوس فى المرحلة الانتقالية قبل الحكم عليه، وكان رأى غالبية الأعضاء "مش عاجبنى وعايزه يتصور صور أكتر".
وعلى "تويتر" لم يختلف الأمر كثيرا فقد انفجرت موجة من "الألش" والتويتات الساخرة حول القضية سواء من المصدقين أو المتشككين فى صحتها ومن أمثلة تلك التعليقات:
- احمدوا ربنا انهم مقلوش ان الجاسوس هو اللى اقتحم أمن الدولة و هو اللى حرق وفرم .. ههههه.
- احنا شعب زي العسل عشان كدة إسرائيل باعتلنا جاسوس أهبل يفرفش هنا ويتصور ويرجع تاني.. بجد جاسوس مسخرة.
- الجاسوس متصور فى الأزهر.. إسرائيل مستعدة تدفع كتير عشان تعرف صلاة الجمعة كام ركعة.
- جاسوس بيقول خطب في المسجد.. جاسوس ثيوقراطي سلفي
- الجاسوس يعلن: لم أكن أنتوي التجسس لفترة ثانية
- الجاسوس حاطط صورته في جامع وماسك الميكروفون وكاتب وظيفته: داعية في الأزهر .. ده جاسوس جاي يستظرف على مصر والمصريين بقى.
- الجاسوس الحق.. هو من يتجسس على البلاد ويتصور مع الدبابة، ثم يهدأ ليرفع الصوّر على الفيسبوك
- الجماعة اللى مش مصدقين موضوع الجاسوس ده زعلتونى منكم بجد عاوزين الدول المتقدمة تتريق علينا وتقول علينا متأخرين مش مواكبين التطور ..حبر سرى ايه بس ورأفت الهجان اللى انتم عايشين فيه ده.. دولوقتى كله بقى عينى عينك على الفيس وممكن يبعت لك فريند ريكويست كمان ...ده انتم متأخرين قوى.
- بعد التصوير بمهارة ورفع الصور علي حساب الفيسبوك السري .. بدل ميعمل تاج للموساد عمل تاج للمخابرات المصري..جاسوس أهبل
- النيابه: انت جاي تتجسس وللا جاي تهرج؟..الجاسوس :أنا جاي أهرج
- إذا الجاسوس يومًا أراد الحياة .. فلابد أن يعدل البرايفاسى اوبشنزعلى الفيس
- بعد فزاعة الإخوان والسلفيين والفتنة والبلطجية والفلول وأذناب الحزب وإسرائيل هتحتلنا.. إليكم أحدث منتجاتنا من الفزعات "الجاسووس".
- من الواضح أن الجاسوس هيشيل كل حاجه ده متصور فى التحرير- قرية صول- كنيسة امبابه ..ياخوفى ليطلع هو أدمن جروب خالد سعيد
- الجاسوسية أدب مش هز كتاف
- زمان كانوا بيبعتوا جواسيس بتسكر وتحشش دلوقتى بيبعتوا جواسيس سلفية بتروح الازهر
- اول مرة اشوف جاسوس اكبر امكانياته كاميرة موبايل و فلاشة 1 جيجا والمعلومات اللي بينقلها صور له؟ مكلفش الموساد تدريب ب 18 ج على بعض
- جواسيسنا مبيعمروش في إسرائيل والدليل فيلم 48 ساعة في إسرائيل بتاع نادية الجندي علي عكس الجاسوس إيلان اللي شكله كان ناوي يناسب من مصر ده كان فاضل له 3 صور وياخد الجنسية.
- فين ايام جواسيس الراديو الترانزستور والحبر السري والميكروفيلم ..خلاص بقت ايفون وكاميرا ديجيتال..فين ايامك ياجاسوسية.
- بيقولك الاسرائيليين هما اللي بلغوا عن الجاسوس بتاعهم لما لقوه عمال يبعزق فلوس الموساد على الفسح والخروجات.
- الاتحاد الدولي للجواسيس قرر إيقاف الجاسوس الاسرائيلي عن التجسس لمدة موسمين عشان أهبل وماشي بفلاشه عليها صوره.
- الموساد قام بعملية استخباراتية دقيقة وقفل البرايفسي أوبشن بتاع الجاسوس علشان ما نعرفش أصحابه على الفيس بوك.
- رأفت الهجان وجمعة الشوان يتقدمان ببلاغ للنائب العام ضد الجاسوس الاسرائيلي بتهمة الإساءة لمهنة الجاسوسية.
- هو الجاسوس اليومين دول بيتصور جنب الحاجات ويحط الصور عالفيس ؟
- ماكتنش أتخيل أن الجاسوسية دي ممتعة كدا ..خروجات وفسح وصور وبيقبضوا فلوس أد كدا ..هيا دي الشغلانات والا بلاش.
- كل جواسيس العالم بتيجي تحترف في مصر عشان عندنا نظام احترافي جامد. الجاسوسين الايراني والاسرائيلي كانو هايلعبوا علي النهائي قريب.
- اخدنا اسبوعين عجلة انتاج ..اسبوعين فئوية .. اسبوعين انفلات..اسبوعين فراغ.. اسبوعين انهيار اقتصاد .. اسبوعين عمالة .. اسبوعين جواسيس.
- من المخابرات المصريه للموساد الإسرائيلي: متشكرين يارجاله علي الكاميرا الكانون والميموري ال 8 جيجا.
- طالع في كل الصور باصص للكاميرا وبيضحك والمخابرات المصرية طلعت تقول صورناه صورناه ههههه.
- طيب بخصوص الجاسوس بقى يا جماعة الواحد يحط فى بطنه بطيخة صيفى ويقعد مطمن طالما كل جاسوس عينوله مرافق من المخابرات يتجول معاه ويصوره كمان.
- هو فى جاسوس يبقى ليه اكونت على الفيس بوك بشخصيته الحقيقية ؟ وحاطط صورة وانه من إسرائيل؟ ايه الجاسوس البجح ده لووووول.
- بعد هوجة التصوير مع الدبابة .. أقترح يجيبوا الجاسوس في التحرير وكلنا نتصور معاه ونحط الصورة على الفيسبوك ونعمله تاج كمان.
- تم الكشف عن اسم الظابط الذي قام بتجنيد الجاسوس، حيث أن الجاسوس كان مسجله على الأي فون بإسم كوووهين مهمة.
- حلوة قصة الجاسوس الإسرائيلي اللي ماشي باسمه الحقيقي وباسبوره وشايل صوره على فلاشه وهو في الجيش الإسرائيلي.
- وتنهد رأفت الهجان تنهيدة طويلة وهو يرى بروفايل الجاسوس على الفيس بوك قائلاً "المهنة لمت يا جدعان".
- يعني إيه كوك زيرو: يعني المخابرات تقول للشعب قبضنا على جاسوس والناس تدافع عن الجاسوس
- في السنة اللي مسكنا فيها الجاسوس الاسرائيلي هربنا رشيد وغالي وحسين سالم... مخابرات مصري .. ام الاجنبي.
- من الجاسوس الإسرائيلي إلى الشعب المصري .. نشكركم على حسن تعاونكم .. بجد صورتوني أحلى صور في حياتي.. أموووووه
- من عظمة مخابرتنا انها تركته يقوم بعمل ارشيف لتوثيق كل المعلومات علي (اللاب توب) وتصويره نفسه كثيرا لدجه انه ناقص يطلع لينا في الحمام.... وهو كرجل مخابرات بردوم محنك راح سايب كل المعلومات اللي تدينه علي ال(3)موبايلات واللاب عشان تبقي ذكره حلوه اوووووي ... والنعمه د/نبيل فاروق كان بيحترمنا اكتر من كده في رجل المستحيل.