"بعد ما خلع الريس..منتخبنا مهيس" أكيد مكسبناش علشان علاء وجمال مارحوش الاستاد

"خلي أملكم في ربنا كبير..بعد معجزة التحرير مفيش حاجة بعيدة عن ربنا..الجماعات الإسلامية أعلنت الجهاد وهتدمر جميع المنتخبات سيراليون والنيجر وجنوب افريقيا مش هيبقى في المجموعة حد غير مصر .. وهنصعد بالتزكية" كان هذا تعليق إسلام الحفني على موقع "فيسبوك" بعد تعادل منتخب مصر مع نظيره الجنوب إفريقي، وضياع فرصته في التأهل لنهائيات الأمم الإفريقية.
قبل انتهاء مبارة مصر مع جنوب إفريقيا بعشر دقائق، دشن بعض الناشطين على موقع التواصل الاجتماعي "فيسبوك" صفحة، تطالب المعلم حسن شحاته، المدير الفني للمنتخب القومي لكرة القدم بتقديم استقالته وترك المنتخب وذلك بعد سوء النتائج الأخيرة.
أحمد علي كان في الملعب وسامع وشايف حسن شحاته بيعمل ايه وقال الخبر دا " عاجل ... شحاته فى اتصال تليفوني مع مبارك ..أي خدمه يا ريس نكدت على الشعب كله زى ما نكدوا عليك".. رد عليه خالد " زي ماقال الريس منتخبنا كويس وبعد ما خلع الريس منتخبنا مهيس"
أحد الأعضاء قال إن اللي حصل النهاردة إنجاز "حسن شحاته: ده راجل تاريخي..كان أحسن لاعب في افريقيا وكمان آسيا .. لما كان بيدرب المقاولون خد بيهم كأس مصر والسوبر وصعد بيهم للممتاز .. و لما درب مصر كسب 3 افريقيا و10 على العالم .. والنهارده بيضيف حاجه تاريخية جديدة وهي أول مرة منتخب مصر ميوصلش كأس الأمم كانت على إيده .. يبقي تاريخي و لا لا ؟".
أحمد رضا، أحد الأعضاء كان لسه متمسك بالأمل وقال "لسه الأمل موجود بس بشرط إن سيراليون تكسب زائير 2/6 وجيبوتي تتعادل مع توجو والسودان تجيب جون تسلل واليونان تكسب زائير تاني و سيدو كيتا ياخد إنذار والمكسيك تنسحب، أنا عايز أفهم مصطفي حاجي مالعبش ليه النهارده مع بايرن".
لم يكن أسامه فتحي غائبا عن المشهد ورد عليه بطريقة أكثر سخرية حيث قال "مش عارف ليه برضه مانزلش الخطيب كان خلص الماتش"
أحمد مودي فكر كثيرا ثم عرف السبب واقترح حلا مناسبا لكنه متأخر وقال " احنا أكيد مكسبناش علشان علاء وجمال مارحوش الاستاد وحسنى مارحش التمرين امبارح كنا ممكن نخرجهم زيارة عادى يعني".
ميدو دياب كان لديه قلق من مصير شحاته بعد المبارة، لأنه طبعا سيكون خارج المنتخب وقال إن شحاته لازم يفكر له في منتخب يقدر يوصل بيه لكأس تاني فقال "شحاتة مكانه الحقيقى منتخب طرة وده اللي يليق عليك مش منتخب مصر يا مدرب على ماتفرج".
أسامه كان لديه عرض لشحاته "هو صحيح مش كبير بس ينفع" حيث قال "لو سمحت يا شحاتة صفي حسابك و شوفلك فريق تاني كده جبرت قوي قوي وخد معاك جهازك الفني و روحوا جزر هاواي قضوا بقية حياتكم هناك".
أحد الأعضاء كان عنده سؤال محيره وكان نفسه يسأله من زمان " يا ترى إيه السبب فى خروج مصر من كأس الأمم الافريقية ؟ وقد إجابات للاختيار من بينها.
1/ حسن شحاتة
2/ عدم وجود علاء وجمال مبارك لموأزرة الفريق
3/ زي ما قال الريس منتخب مصر كويس
4/ تشكيلة حسن شحاتة
5/ عدم وجود روح الفوز مع اللعيبة
6/ خروج زيدان وشيكابالا
7/ اللاعب الأسمراني بتاع جنوب أفريقيا
ياسر الجوهري وصل للآخر وقال "والله ما نستاهل نوصل أصلا كله بسبب نجار المسلح اللي ماسك المنتخب هو وشوية السباكين اللى معاه حسبي الله ونعم الوكيل فيهم".
أيمن الشبلي بيدور من زمان على كاتلوج علشان يفهم شحاته "أنا عايز أفهم حاجة ..هو الراجل ده كتالوجه فين..قصدي اللي عايز يفهمه يروح له منين..تغييراته واختياراته فى قمة الغباوة..يعني أنا عايز أعرف مين يقول إن واحد زي السليه ده ينزل وأحمد حسن قاعد بره..طب حتى ياراجل لعبه علشان ياخد لقب عميد لاعبي العالم على الأقل..وأهو يبقى استفدنا حاجه".
وظهر على الصفحة بيان لشحاته للرد على المطالبة برحيله" أيها الإخوة الجماهير لقد واجهت الموت مرات عديدة في السودان و الجزائر و مالاوي..إن الأغلبية الساحقة من جموع الجماهير المصرية تعلم من هو حسن شحاتة ... عشت ست سنوات أقود منتخب مصر على الدكة وسأموت على الدكة واتحاد الكوره سيسجل ما لنا وما علينا .. وفق الله منتخبنا المتين".
أحمد سعد فاهم وعرف سبب الهزيمة من جنوب أفريقيا " أقسم بالله.. حسن شحاته ما ينفعش مديرفني لمصر، أقولك ليه في 2006 كان الشعب بيدعيله وفي 2008 كان الشعب بيدعيله وفي 2010 كان الشعب بيدعيله وفي 2011 الشعب مش فاضي.. الشعب بيبني مصر".