فى الهايفة واتصدر!

يُحكى أنه كان يا مكان فى بلاد العجائب فيه واحد اسمه “عم مصرى" وكان عنده حتة أرض استردها بعد ما كان اللى مسئول عنها بيسرقها وبيفسد فيها وقام عم مصرى غضب غضباً شديداً ورجعها بعد ما كان قرب يحس بأنها مش بتاعته!
وكان لعم مصرى أصحاب كتير.. عم أبو إسلام واسمه علام وعم اشتراك ولما استرد أرضه قرر إنه ينظم دنيته عشان يقدر يشغل الأرض تانى من بعد ما كانت هتبور وقرر كمان يعمل مجلس ويعين فيه أصحابه بعد مشاورة أهله فقام طالع عم أبو إسلام وقال أنا مش هاخد غير20 كرسياً من 100.
وبعدها قام عم أبو إسلام نقض كلمته وجاب أهله وعزوته وافتكرها عزبته وأخد 70 كرسياً فى المجلس اللى مهمته ينظم الحياة فى أرض عم مصرى.كانت مهمة المجلس يعرف كل واحد حقه وواجبه وكان عم مصرى وأهله منتظرين إنه يرد لهم كرامتهم وحقهم اللى اتاخد منهم، لكن العكس حصل، ففى مرة واحد من أهل أبو إسلام شاف واحد من ولاد عم مصرى بيتفرج على حاجات إباحية، وواحد تانى برضه بيتفرج على حاجات إباحية فثار غضبت عائلة أبو إسلام غضباً شديداً وماسألش أهل عم أبو إسلام ليه؟ لكن أكيد كانوا عارفين الإجابة لأن ولاد عم مصرى ما معهمش يعيشوا؟.. يبقى إزاى هيتجوزوا؟
وفى مرة كان عم مصرى بيسمع جلسة من جلسات المجلس واتفاجأ بواحد من أهل أبو إسلام بيقول «لازم المواقع الإباحية تتقفل عشان ولادنا».. واختلف أهل عم مصرى وكان فيهم المبسوطون بالقرار، لكن كان فى رأيهم إن «الإباحية» إنهم يلاقوا ولادهم وإخواتهم بياكلوا من صناديق الزبالة! وقالوا “يعنى هما سابوا كل المشاكل.. سابوا الأرض تبور ونقص السماد عشان نزرع ونعرف نأكل من أرضنا وقلة المرتبات ومسكوا فى المواقع إياها؟! قام واحد من عيال عم مصرى سأل: يابا هى إيه الهيافة؟.... قاله: تعال يا ابنى فى الهايفة واتصدر!!