شباب‏25‏ يناير بحري وقبلي‏..‏ عتاب ساخن ع الفيسبوك

في جو من الصراحة كان هذا الحوار أو العتاب بين شباب من بحري وبين شباب من قبلي‏,‏ ونحن ننقل هذا العتاب كما جاء بتلقائيته علي الفيسبوك‏.‏ دودي محمد الشرقية
القاهره‏,‏ الاسكندريه‏,‏ المنصوره‏,‏ الزقازيق‏,‏ المحله الابيه‏,‏ السويس‏,‏ أمال فين الصعايده‏,‏ فين الصعايده و نخوتهم و حمشنتهم‏,‏ فعلا الصعيد الصيت ولا الغني‏,‏ ايه ياصعايده انتو فين؟
بهائي علي اسيوط
الصعايدة موجودين‏,‏ لكن تقولي إيه في الفضائيات‏,‏ ابقي شوفي كام فضائية راحت هناك‏..‏ ولا اساسا حد راحلهم ولو سيادتك بتعرفي تقري حتعرفي ان مظاهرات اسيوط وقنا واسوان ابتدأت قبل الدلتا
طه محمود سوهاج
المشكلة عندنا أنه ما فيش اعلام علشان يغطي الاحداث والمظاهرات اللي كانت عندنا‏,‏ وهما عندهم اعلام مغطي كل كبيره وصغيره‏,‏ وعلشان إحنا ما طلعناش في الفضائيات التلفزيونيه بقينا نسوان من وجهة نظرهم‏,‏ فريق صحفي حب يغطي المظاهرات في سوهاج ما قدرش اخد‏24‏ ساعه ومات من الرعب وما قدرش يكمل من شراسة المواقف في سوهاج واللي عايز يحب تأكد يتصل بالمصري اليوم ويسأل الفريق اللي راح سوهاج ليه رجع في نفس اليوم ؟؟
هشام عثمان نجع حمادي
الصعيد طلعت فيه مظاهرات لكن كانت علي استحياء‏...-‏ لانه ما كنش فيه الدافع المعرفي الكافي عند الناس علشان تطلع المظاهرات دي
ياسمين محمود المعادي
انا عارفة اني حصل مظاهرات في عدة مدن في الصعيد لكنها قليلة جدا جدا ومقدرش اشبهها بالمظاهرات الضخمة اللي حصلت في بحري‏,‏ يعني مينفعش اشبه مظاهرة فيها‏2000‏ واحد بمظاهرة فيها نص مليون‏!,‏ ويكون معلوم لحضرتك في الوجه البحري وبالاخص الاسكندرية والقاهرة والمحله‏...‏ للمتابع لحركات المظاهرات في المدن دي هيعرف‏...‏ اني دي مش اول مظاهرات تتعمل عندهم وحركات التغير وتنظيمات الشباب عندهم كتيرة‏-‏ غير المنظمات الحقوقية اللي عندهم يقوللي في الصعيد اخر مظاهرة بتنقد النظام طلعت امتي
احمد مصطفي المحلة
ياجماعة ياسمين عندها حق المظاهرات بدات تقريبا في سنة‏2004‏ في الصعيد ومن سنة‏2004‏ لااذكر ولايستطيع أي احد أن يذكر اسم مظاهرة واحدة وليها تاثير وكانت ضد النظام المصري
محمد نسيم طهطا
الصعيد بإ ختصار مطلعش مظاهرات بشكل حاشد لانه منفصل فكريا عن الوجه البحري‏-‏ ومش قصدي اقول يعني منفصل ثقافيا عن ثقافة الحرية السياسية في شمال مصر
اللي تقريبا الاعلام مسلط الضوء الاكثر عليها‏,‏ علي عكس الصعيد اقصي شئ فيه تجده مراسل لقناة ويبقي الف حمد وشكر لو المراسل ده معاه كاميرا بيصور بيها والف حمد وشكر لو لو فيه قناة ليها مكتب او فرع في الصعيد
باسم السمرة القاهرة
ياجماعة لاتظلموا الصعيد فثقافة الانترنت منتشرة اكتر في المجتمع القاهري والسكندري وبعض محافظات الدلتا والدليل علي كده عدد قليل جدا من المواقع اصحابها من الصعيد والغالبية من المواقع أصحابها من القاهرة والأسكندرية والوجه البحري‏,‏ وبرضه لا زم تعرفوا أن هناك فرق كبير بين نسبة مستخدمي الانترنت في الوجه البحري نسبة مستخدمي الانترنت في الوجه القبلي
أيمن الأسيوطي أسيوط
ياريت الأخت دودي تعرف أن الصعيد به اكبر نسبة سلاح ونسبة عصبيات موجودة ولابد أن تعرف أن اي خناقة كبيرة تقوم فيه يستعمل فيها السلاح الالي مش بالسنج والمطاوي‏!‏
خالد عبد العال قفط
عندنا في الصعيد المجتمع قبلي‏-‏ وبينظر واللي فيه بيحترم دائما كبير العيلة ومش هنكر واقول كتير عندنا بيحترموا الرئيس مبارك كأب وكبير وبقول كما ان الرئيس مكنش بينجح في استفاءاته الا بغالبية اصوات اهل الصعيد
محمود حداد‏6‏ أكتوبر
أيوه عندك حق ياباسم المظاهرات اللي طلعت دي مظاهرات انطلقت شرارتها من الانترنت‏-‏ من قبل مجموعة خالد سعيد ومجموعة‏6‏ ابريل وحركة البرادعي للتغيير بالله عليكم المجموعات و الناس دي ليها وجود في الصعيدوفيه كام ناشط‏..‏ حرام تظلمي الصعيد اللي متعودش علي الثقافة دي
يوسف عباس أرمنت
بما أن أخونا محمود حداد فتح موضوع النت وفيه كام ناشط علي الفيسبوك‏..‏ إسمحوا لي افكركم واسأل برامج التوك شو كام مرة تتذكر الصعيد يعني الاعلام اصلا ساهم بشكل كبير في شعورنا بأننا منفصلين عن بلدنا‏,‏ فإذا كان الاعلام القاهري نمي وطور ثقافة الاحتجاج عن اهل القاهرة واخواتها‏,‏ فالعكس كان في الصعيد المجهول تماما بالنسبة للاعلام
حمادة الغزالي طنطا
أعتقد ياجماعة أن الصورة إتضحت إلي حد ما والحوار اللي دار كشف لنا وفهمنا من حاجات كتير كنا بنجهلها عن الصعايدة‏,‏ فياريت يا جماعه محدش يحكي في الموضوع ده تاني‏,‏ لأنه اللي بيحصل في بحري بيأثر علي الصعيد والعكس صحيح يعني لما كان فيه اضطراب امني في الاقصر ومدبحة للسياح ده اثر علي مصر كلها اللي عاوز يحلل الامر يمسكة بالراحة وبدون عصبية واهانة للطرف الاخر ويشوف ايه السبب بالعقل وبالمنطق مش بالاهانة والتجريح ومحدش ينسي انها والله ثقافة‏-‏ هو الصعيد كدة منطقة ليها عادات وثقافة خاصة بيها وبكل صراحة ثقافة الثورة المعلوماتية وعولمتها لم تغزوا الصعيد بعد‏.‏