الشاهد

كتب:حسين جعفر كان ليا صاحب نبي وكانلي صاحب شيطان وصاحب يكره ال اتنين وانا ما ليش دعوة تايه ما بين حسرتي ع الهرم وحزني ع القهوة. أكلم الشارع
عن الشارع
يرد الموت
وأسأل العامل عن المصنع
يموت الصوت
أشوف بروحي
اللي اختشوا ماتوا
واشوف قصادي
العريانين فاتوا
وأرفض افوت
وافوت
بعنيا ع الجورنان
تلطشني عناوينه
أفوق
قدام أساس الملك
ليه يا خلق ساجنينه؟
سؤال طلع غضبان
طلع مقهور
كان النبي
والشيطان
واللي يكرههم
وانا
بنسمع الأخبار
عن أرض جار أرضنا
جاها الطوفان قبلنا
وساعتها لرسال اتقطع
أو احنا تهنا مننا
أخدت ديلي ف سناني
وجريت لحد الغيط
سألتها ع السنبلة
قالت يا ريت
سألتها عن صاحبها
قالتلي هناك
بصيت
لقيت
جلابيته لحد الديل
وييجي يفرد ف عوده
غصب عنه يميل
والدمع ده
دمع عينه
ولا نهر النيل
سألت لسطي ع الطريق
بص باستغراب
الشمس كانت واخدة تعسيلة
ولا القمر هو اللي غاب
رن التليفون رديت
طمني...
ازي الحركة ؟
لضم الأحلام ف الخيط
لكني شميت
ريحة قلة البركة
ونسيت
اني انا ع النيل
كان ليا
صاحب نبي
وكانلي صاحب شيطان
وصاحب يكره ال اتنين
وانا بريء منهم