القلب

ماشي عليها و مستهتر بتفاصيلهاماشي علي الكوبري تبرطع ناكر وجود نيلهاناكر وجود الشمس من بين البيوت طب و تماثيلها ؟ أستغفر الله العظيم يا سيد التكشير يا سادي في التدمير و تخصص التكفير و هدم الأمنيات النور في عينك مات مالك و مال الست دي ؟ تعرفها طيب ؟ دي اسمها مصر ماتنتظرنيش اعرفك بيها دلوقتي
و احنا في نهاية العالم..
و ماتنتظرش انك تصبح بني آدم
في يوم و ليلة و تعرف مصر
نسيت اقولك..
حط إيدك علي الناحية الشمال من صدرك
لقيت حاجة ؟
زي ما توقعت..
هنا مكان القلب..
الكرش اللي مدلدل علي حجرك
مايشوفش مصر
يمكن يشوف الشوارع
طرق للتوهة
و البيوت سقف بيتاوي
و الناس مجرد عدد
فشئ طبيعي ان البلد ماتكونش هي البلد
تعمل معاهدة مع الاجرام
و تقول علي التماثيل أصنام
نيجي نغني.. تقوللي حرام
نغني حب.. تقوللي حرام
نقول يا مصر.. تقوللي حرام
نقول يا رب ده والله حرام
يكفروا الهوا و المية
الحبر في قلمك كافر
و النسر في علمك كافر
سيد درويش كافر و نجيب
محفوظ كافر و أي أديب
و صلاح و فؤاد و سعاد طبعا
و بديع و التونسي و زكريا
و جميع سكان المطرية
و جميع سكان الأبجية
حتي الحمامة الامرية
صوتها مثير كافر كافر
يا كل ت مربوطة
مربربة و قطقوطة
الربربة من الربا و العياذ بالله
زينة السمار ح تخش النار
و البيضا نظرتها كافرة
الضحكة كافرة
و الطبطبة كافرة
و التمشية علي كويري قصر النيل
منعشة و كافرة
ما لقيتش قلب
لقيت مكان للغريزة
و عطش و شهوة للرمرمة و الفلوس
و خطاوي غشيمة تدوس
علي كل حاجة أصيلة
علي كل حاجة جميلة
و إيد..
رافعة علم متلون
و مستغرب شكله الجديد
يا هلتري يا ابيض يا بو السواد كله
دم الشهيد في عينيك كافر؟
أنا مش ح اسافر
و مش ح اسيب الميدان
ربك شايفني و شايفك
و ملاكه واقف جنبي
الله معايا أنا
عشان قلبي