إلا النبى

أنا حدّ بيحب النبي جدًّا والقلب ورده وعشقها فوّاح
وأمانه يا بلال لو جابوك تدّن
قول للنبي يعيّن سعيد مدّاح
....................
دا لإنّك:
أول واحد خشّ ضلوعى بجد وداس
ولإنّك:
أول واحد هدّ السد الفاصل بين الناس
ولإنّك:
أوّل بذرة حب اتزرعت جوّا الراس
ولإنّك:
أعظم كلمه أنا ممكن أقولها على الكراس
.................................. كلمة نبى

يا كل كائن فى ( الزمان اللولبى)
يا كل سلطان أجنبى
يا كل واحد عاش غبى وهيْموت غبى
............................... إلا النبى

أنا مش صبى وبيّاع كلام
........ عن أولياء الله وسيرة الأنبيا
ولا من هواة الضحك
........فى وشوش الكلاب والأغبيا
ولا من هواة الهرتله
ولا من هواة الأجوبه الفارغه
.................. اللى مالهاش أسئله
ولا نفسى أقف ع المدنه وأحدف قنبله
أنا بس شفت المسأله
إن اللى شايلين الرايات واقفين غلط
وإن اللسان فى الغرب بيحدّف زلط
ومن العبط
إنك تشوف رايتك هناك متنكسّه
وإنك تشوف كل الجيوش متقدمه
......... وجيوشك أنت مكسكسه
وإنك تطبطب فوق قلوب متيبّسه
وإنك تحسّ... إن الثوابت كلها طلعت فاشوش
وإنّ انت من جواك هاموش
وإن الرتوش صبحت علم
وإن القلم عمّال بيكتب أجنبى
وإن الكلاب فى الغرب بيسبّوا النبى
يا كل قلب بيتولد صافى وأبى وحرّ وخجول
يا شهقة الطاهره البتول
يا كلمتى المربوطه فى رقاب الخيول
كل المعانى اتهلهلت جوّا العقول
وانا نفسى أقف باولادى لاجل أفدى الرسول
أنا نفسى أقف وأهتف وأقول
إن الشعوب الطيّبه مالت
وإن الكواكب م المدى انزالت
وإن العيار الفالت اتحكّم
مش جاى أقول الشعر وأتهكّم
أنا جاى أقول الحق
إحنا خلاص داخلين زمان الرقّ
أنا نفسى أقول للأفعى جوّا الشقّ
إن الأساس خايخ
وإن السلام ويّا الكلاب بايخ
وإن الوجع شايخ على ضفاف القلوب
وإن الضمير جامد جمود الطوب
وإن الزمن مقلوب على دماغنا
وإن اليهود نازلين على صداغنا
وان احنا رغرغنا كما الأموات
يا أُمه عاشقه الأمريكان والجات
الحق مش محتاج معاه إثبات
الحق محتاج قلب جمّالى
أنا ليه بقيت بصرخ بصوت عالى؟
مش واقف أتفرّج
الناس فى سيرك كبير وبتهرّج
يارب يا مفرّج كروب الصدر
أنا ناوى أقوم وأدعى ف ليالى القدر
إنّى أتوهب لله ولأحبابه
وإنى ما أخبّط غير على أبوابه
وإنى ابتسم قدّام رسول الله
وأقعد معاه وأقعد مع أصحابه
يا أبو الكتاب الأول الآخر
ليه الكلاب عمّاله تتقدّم
وإحنا اللى ليه دايرين بنتّاخر؟
مين اللى حطّ الردّه ع الفاخر؟
ليه البواخر نايمه ع اللكتاف؟
أمريكا والدنمارك سيف واحد
وأنا دمّى مش هاين ومش خوّاف
وهاقولها حرّه وعلّقولى النّاف
أنا كلّى شوق للساحه والسيّاف
اللقمه حاف أكرم من الذّله
يا مأكّلانا الصمت م الصبّار
ومشربانا السم م القُله
طالعين وشايلين ع البدن مِلّه
ومتبّتين ع العلّه بالقفطان
طالعين وشايفين الرسول واقف
طالعين وسامعين الرسول فرحان
وانا مش جبان
لاجل إنى أخاف منّك وأطوف وأسعى
أنا عندى أشيل القصعه وأصبح حُرّ
يغرق شراعك أو يطول البر
لازم ندوس ع الشر بالجزمه
لازم نقف ويكون لنا لازمه
لازم نقول لكلاب غابات الله
سبّ الرسول عند الأُسُود أزمه
................
يا صاحبي يا واقف على باب النبي
بلّغ سلامي وقول له زاد الشوق
قول له إني قاعد في المقام الزينبي
عاشق بيغسل روحه بالمعشوق