لن ننساكم

من قال أننا ننسي من يقدم لنا جميلا.. كيف ننسي مثلا السيد المخلوع وهو من ألهب فينا الحماس للقصاص منه علي ما أهدره من ثروات وما اضاعه من شباب وما قننه من فساد.. من قال اننا نستطيع ان ننسي الاستاذ صاحب الايادي البيضاء في لي عنق الانتخابات وغسل الاطباق المليئة بالاموال الحلال مولانا الامام احمد عز صاحب المزمار واول من أرخ للحديد الحلال في مصر
من قال اننا نستطيع ان ننكر فضل صاحب مقولة الفساد وصل لأصابع الرجل عفوا اقصد الركب كم كان بليغا هذا الرجل وهو يؤصل للفساد من باب براءة العينين ونظافة اليدين وكمان الاذنين
من قال اننا لا ندين بالجميل لاحمد النظيف جدا جدا وهو صاحب الحكومة الالكترونية وكمان الفيس بوك اللي زمانه بيلعن اليوم اللي قال فيه كمبيوتر لكل مواطن..شكرا لك يا مطور الالكترونية
من قال اننا لا نشكر سعادة الموهوم الكبير صاحب شعار علشان مستقبل ولادك ده انت يا راجل قضيت علي مستقبل احفاد احفادي
نشكركم جميعا علي حسن تعاونكم معنا المهم الفلوس فين يا اخوانا؟ فين راحت الملايين آسف اقصد المليارات؟ طيب هتعملوا بيها ايه خدوا مليون اتنين بلاش خدوا مليار وهاتوا الباقي.. طبعا مش سامعين ..حد يفهمهم.. مصمصتوا البلد.. يعني مفيش فايدة كل ده فساد ونهب وخراب هل انتم مصريون حقا؟ والله ما انا عارف المجلس والمحكمة والشعب هيعملوا معاكم ايه يمكن تطلعوا براءة والشعب يبقي متهم.. لا مش للدرجة دي طيب وهو الشعب اللي مش لاقي انبوبة.. ولا لاقي تمنها كان ريح نفسه وركب خط غاز من اللي اليهود بياخدوه حاجة ببلاش..
كده يبقي الشعب بريء مين المتهم؟ قول انت بقه
الغريب بلاش الغريب خليها العجيب ان اصحابنا بتوع آسفين يا ريس مش يمكن يكونوا هم اللي خدوا المليارات المنهوبة علشان كده هم آسفين مش هيقدروا يرجعوها.. مش عارف!!
مين اللي نهب وسرق ونشر الفقر والمرض مين لوث الزرع الماء والهواء مين يا آسفين اللي وصل مستوي التعليم لهذا الانحدار..مين اللي اعتقل المصلين في الفجر وأصل للفجور واللهو..مين اللي كان بيخلي الوزير ربع قرن.. مين ياآسفين اللي دبح الحرية وأهان المصريس في الداخل والخارج.. والله احنا اللي اسفين عليكوا رسالة الي المعتصمين
مش عايزين تقابلوا الجنزوري ومش عايزين تقولوا مطالبكم ومش عايزين تفضوا الاعتصام ممكن نعرف انتم عايزين ايه ولا دي كمان مش عايزينها؟ رسالة المجلس العسكري احنا ليه كل ما نفهم تخلونا نرجع في كلامنا وما نفهمش!!
المزيد من مقالات أيمن عثمان